kraamaat@gmail.com
+ +92 333-430-6384


کرونا نال لوکائی دیاں اوکڑاں بے مہار ودھن لگیاں ٭مہاتڑاں تے ماڑیاں دی مالی مدد لئی پنجاب سرکار دے اُ چیچے جتن٭ رویل نیوز


نمائندا رویل April 06, 2020


لاہور (نمائندا رویل) مستحق خانداناں دی مدد لئی وفاقی تے پنجاب سرکار ہم قدم‘ پنجاب سرکار نے 25 لکھ غریب تے مستحق خانداناں لئی مالی امداد ری رقم 4 ہزار رُپئے توں ودھا کے 12 ہزار رُپئے کر دِتی۔ تفصیلات مطابق وزیر اعلا پنجاب عثمان بزدار دی خصوصی اپیل اُتے مستحق خانداناں لئی مالی امداد دی رقم وچ وادھا کر دِتا گیا اے۔ 25 لکھ ماڑیاںخانداناں لئی مالی امداد دی رقم 4 ہزار رُپئے توں ودھا کے 12 ہزار رُپئے کر دِتی گئی اے۔ وفاقی حکومت دے ”احساس پروگرام“ تے پنجاب سرکار دے ”وزیر اعلا پنجاب انصاف امداد پیکج“ دے اشتراک راہیں مستحق خانداناں نُوں دوہاں پروگرام دے تحت مالی امداد دی رقم دی سانجھی ادائیگی کیتی جاو ے گی‘ مستحق بندیاں نُوں کوائف دی تصدیق دے بعد اکٹھے 12 ہزار رُپئے ادا کیتے جان گے۔ غریب تے مستحق بندے 7 اپریل تک درخاستاں جمع کروا سکن گے۔ وزیر اعلا عثمان بزدار نے اعلان کیتا اے کہ پہلے درخاست جمع کروان والے بندیاں نُوں دُبارا درخاست جمع کروان دی لوڑ نہیں ہووے گی۔ اوکڑاں دی شکار لوکائی دی مدد لئی وفاقی تے پنجاب حکومت یکسو نیں۔ دوجے پاسے ملک وچ کرونا وایرس نال مجموعی مَوتاں 45 ہو گئیاں جد کہ روگیاں دی گنتی 2 ہزار 917 ہو گئی اے۔خیبر پختونخوا دے تفریہی مقام ضلع سوات وچ پچھلی رات ہور 2 بندے کرونا وایرس کارن چلانا کر گئے‘ جہدے بعد ایس وایرس نال سوات و چ مرن والیاں دی گنتی 3 ہو گئی اے۔ کرونا وایرس دے روگیاں دی گنتی دے حوالے توں پنجاب سر فہرست اے جتھے ایس وایرس نال متاثرا بندیاں دی گنتی 1196 ہو چکی اے‘ سندھ وچ ہُن تک 881 کیسز ساہمنے آئے نیں جد کہ خیبر پختونخوا وچ 372‘ گلگت بلتستان وچ 206‘ بلوچستان وچ 189‘ اسلام آباد وچ 78 تے ازاد جموں کشمیر وچ 12 کیسز رپورٹ ہو چکے نیں۔ ملک وچ کرونا وایرس نال ہُن تک 45 مَوتاں ہوئیاں نیں جہناں وِچوں سندھ وچ 15‘ خیبر پختونخوا وچ 14‘ پنجاب وچ 12‘ گلگت بلتستان وچ 3 تے بلوچستان وچ 1 بند کرونا کارن چلانا کر گیا اے جد کہ پوری دنیا وچ کرونا نال 65 ہزار ہلاکتاں ہو چکیاں نیں تے روگیاں دی گنتی 12 لکھ توں ٹپ گئی اے۔