kraamaat@gmail.com
+ +92 333-430-6384


آٹا تے کھنڈ بحران وڈے لوکاں نے وڈا نقصان اپڑایا:چیف جسٹس


نمائندا رویل April 08, 2020


اسلام آباد (نمائندا رویل) چیف جسٹس پاکستان جسٹس گلزار احمد نے ریمارکس دِتے نیں کہ حکومت نُوں آٹا کھنڈ دا مسئلا درپیش اے تے وڈے وڈے لوک ملک نُوں نقصان پہنچا رہے نیں۔ سپریم کورٹ وچ کرونا وایرس کارن ہسپتالاں دی بندش تے سہولتاں بارے کیس دی سنوائی ہوئی۔ چیف جسس نے پُچھیا کہ بلوچستان وچ ڈاکٹراں دے حوالے توں کیہ اطلاعواں نیں؟۔ ایڈیشنل ایڈووکیٹ جنرل بلوچستان نے دَسیا کہ سارے ڈاکٹراں نُوں چھڈ دِتا گیا اے۔ چیف جسٹس نے کہیا کہ کجھ ڈاکٹرز صورتحال اُتے حکومت نُوں بلیک میل کرنا چاہندے نیں پر ڈاکٹرز دی اکثریت بہترین فرائض سر انجام دے رہی اے‘ اٹارنی جنرل دے مطابق گرفتار ہون والے ڈاکٹرز دی مستقلی دا معاملا سی۔ جسٹس عمر عطاء بندیال نے کہیا کہ کہدی جرات اے حکومت نُوں بلیک میل کرے‘ حکومت قانون سازی کرے پھڑے ایہناں نُوں۔ چیف جسٹس نے ایڈیشنل ایڈووکیٹ جنرل بلوچستان نُوں حکم دِتا کہ موجودا صورتحال وچ ڈاکٹرز نُوں جہڑیاں شیواں چاہیدیاں نیں اوہ روزانا دی بنیاد اُتے فراہم کرو‘ جنیاں کِٹاں تے سہولتاں دستیاب نیں اوہ فراہم کرو۔ جسٹس عمر عطاء بندیال نے کہیا کہ مقامی حکومتاں ہوندیاں تے لوکاں دی ہیٹھلی سطح اُتے مدد ہوندی‘ حکومت نے مقامی حکومتاں نُوں آپ غیر مؤثر کر دِتا۔ چیف جسٹس پاکستان جسٹس گلزار احمد نے ریمارکس دِتے کہ حکومت نُوں آٹے تے کھنڈ دا مسئلا بنیا ہویا اے‘ حکومت آپ اپنے لئی مسئلے کھڑے کر رہی اے‘ وڈے وڈے لوک ملک نُوں نقصان پہنچا رہے نیں۔ اٹارنی جنرل نے کہیا کہ حکومت نُوں کریڈٹ دینا چاہیدا اے کہ آٹا‘ کھنڈ بحران دی انکوائری رپورٹ ساہمنے لیائی۔ چیف جسٹس نے کہیا کہ کرونا دی وباء نال لڑن لئی ہنگامی قانون سازی دی ضرورت اے‘ پارلیمنٹ نُوں نویں قانون بنانے چاہیدے نیں۔عدالت نے حکومت نُوں تفتان‘ چمن‘ طور خم اُتے فوری طور اُتے اِک ہزار بستریاں اُتے مشتمل قرنطینا مراکز بنان تے ایہناں نُوں اِک مہینے وچ مکمل فعال کرن دا حکم دیندیاں ہویاں کہیا کہ حکومت ایہناں داخلی راہواں اُتے کورنٹین سنٹر بنان وچ ناکام رہی‘ پورے ملک وچ ڈاکٹراں نُوں کرونا وایرس توں حفاظتی کِٹاں فوری طور فراہم کیتیاں جان‘ جے عدالتی احکامات اُتے عمل نہ کیتا گیا تے توہین عدالت دی کارروائی کیتی جاوے گی۔ عدالت نے کیس دی سنوائی پیر تک ملتوی کر دِتی۔