کرونا کیس ودھ رہے نیں،ساڈے کول وینٹی لیٹر نہیں ٭ماڑیاں تک بارھاں ہزار روپے اپڑاواں گے:وزیر اعظم پاکستان ------ رویل نیوز

اسلام آباد (نمائندا رویل)) وزیراعظم عمران خان نے اعلان کیتا اے کہ کل توں 17 ہزار تھاواں توں 12 ہزار رُپئے مستحق لوکائی وچ ونڈے جان گے۔ اسلام آباد وچ صحافیاں نال گل کردیاں ہویاں وزیراعظم عمران خان دا کہنا سی کہ پاکستان نُوں کرونا وباء ورگے وڈے چیلنج دا ساہمنا اے‘ احتیاطی تدبیراں اختیار کر کے اسیں بہت وڈے مسئلے توں بچ سکدے آں‘ جنے بُہتے لوک جمع ہون گے‘ بیماری اونی تیزی نال کھلرے گی‘ جہناں نُوں بیماری لگدی اے اوہناں وِچوں 85 فیصد لوکاں نُوں خاص فرق نہیں پوے گا‘ اوہ ہسپتال جائے بغیر وی ٹھیک ہو جان گے۔ وزیراعظم دا کہنا سی کہ ہر ملک وچ ایس بیماری دا کھلار مختلف اے‘ پاکستان وچ لوک سمجھدے نیں بیماری اوہناں اُتے اثر نہیں کرے گی‘ کئی علاقیاں وچ لوک احتیاط نہیں کر رہے‘ کسے نوجوان نُوں بیماری لگی تے اوہدے گھر وچ موجود بزرگاں نُوں خطرا ہو سکدا اے‘ اپریل دے آخر تک کرونا متاثرین دی گنتی ودھ سکدی اے‘ ہر 100 وِچوں 1 یاں دو بندے ایس بیماری نال مَر سکدے نیں‘ کرونا کیسز دی گنتی ودھی تے ساڈے کول اینے وینٹی لیٹرز نہیں نیں کہ اوہناں دا علاج ہو سکے‘ سبھ توں درخاست کردا آں خدا دا واسطا کسے غلط فہمی وچ نہ رہن۔ عمران خان نے کہیا کہ ملک وچ جدوں کرونا کیسز ساہمنے آنا شروع ہوئے تے اسیں 3 ہفتے لاک ڈاؤن دا فیصلا کیتا سی‘ لاک ڈاؤن دے پیش نظر اسیں سکول‘ کالجز تے جامعات بند کر دِتے‘ فیکٹریاں تے دُکاناں بند کیتیاں پر ایہ سوچ وی سی کہ جدوں اسیں لاک ڈاؤن کراں گے تے غریب ترین طبقے اُتے کیہ اثرات پین گے‘ پاکستان وچ 5 کروڑ لوک غربت دی لکیر توں تھلے نیں‘ ایس ویلے ساڈا سبھ توں وڈا چیلنج غریب طبقے نُوں ریلیف کویں دینا اے‘ اسیں 22 کروڑ لوکاں نُوں کھانا پینافراہم کرنا اے‘ فیصلا کیتا اے کہ زرعی سیکٹر نُوں مکمل طور اُتے کم کرن دینا اے‘ اوہناں نُوں کہیا اے کہ اوہناں لئی کوئی لاک ڈاؤن نہیں اے‘ 14 اپریل توں کنسٹرکشن سیکٹر نُوں کھولیا جا رہیا اے‘ اگلے 2 ہفتیاں وچ 144 ارب رُپئے ہیٹھلے طبقے تک ونڈ دواں گے‘ احساس پروگرام وچ کسے قسم دی سیاسی مداخلت نہیں اے‘ ایس ایم ایس راہیں لوکاں دا ڈیٹا آ رہیا اے‘ جہدی پُن چھان نادرا توں کروائی جاوے گی‘ کل توں 17 ہزار تھاواں توں 12 ہزار رُپئے مستحق لوکائی وچ ونڈے جان گے‘ 1 کروڑ 20 لکھ خانداناں نُوں کل توں پیسے ملن گے۔ایس موقع اُتے گل کردیاں ہویاں معاون خصوصی ڈاکٹر ثانیہ نشتر دا کہنا سی کہ سارے صوبے احساس پروگرام دا حصا نیں۔ 1 کروڑ 20 لکھ خانداناں وچ رقم ونڈی جاوے گی۔ فی خاندان نُوں 12 ہزار دِتے جان گے۔ معاون خصوصی ثانیہ نشتر دا کہنا سی کہ رقم دی ونڈ بائیو میٹرک دے بعد ای ممکن ہووے گی‘ اِک گھر وِچوں اِک بندا رجسٹرڈ ہووے گا۔