kraamaat@gmail.com
+ +92 333-430-6384


رمضان وچ کھان پِین دیاں شیواں 20فیصد تک سستیاں ہو جاون گئیاں ٭اقتصادی کمیٹی دی منظوری  ۔۔۔۔۔۔ رویل نیوز


نمائندا رویل April 09, 2020


اسلام آباد (اچیچی رپورٹ) کابینا دی اقتصادی رابطا کمیٹی (ای سی سی) نے 2.5 ارب رُپئے دے رمضان ریلیف پیکج دی منظوری دے دِتی اے۔ کابینا دی اقتصادی رابطا کمیٹی دا اجلاس مشیر خزانا عبدالحفیظ شیخ دی صدارت ہیٹھ ہویا جہدے وچ 11نکاتی ایجنڈے اُتے غور کیتا گیا۔ مشیر خزانا عبدالحفیظ شیخ دی صدارت ہیٹھ ای سی سی اجلاس وچ 2.5 ارب رُپئے دے رمضان ریلیف پیکج دی منظوری دِتی گئی جہدے تحت یوٹیلیٹی سٹوراں اُتے 19 لوڑی دیاں شیواں دیاں قیمتاں اُتے سبسڈی دِتی جاوے گی‘ شیواں 15 توں 20 فیصد سستیاں فراہم کیتیاں جان گیاں‘ اقتصادی رابطا کمیٹی نے بجلی صارفین نُوں ریلیف دین بارے سمری اُتے فیصلا کل تک مؤخر کر دِتا اے ایس ی سی کل ہون والے اجلاس وچ ایہدے اُتے فیر غور کرے گی۔ اقتصادی رابطا کمیٹی وچ کار کے کیس وچ لیگل فیس دی ادائیگی لئی 1.5 ملین ڈالر دی سپلیمنٹری گرانٹ دی منظوری وی دے دِتی گئی اے۔ اجلاس وچ احساس پروگرام دے تحت رقماں دی ترسیل اُتے 30 جون تک ٹیکس چھوٹ دی منظوری وی دِتی گئی اے‘ پورے ملک وچ 1 کروڑ 20 لکھ بندیاں وچ رقماں ونڈیاں جان گیاں۔ اقتصادی رابطا کمیٹی نے یوتھ بزنس لون لئی 84 کروڑ دی سبسڈی سنے سپلیمنٹری گرانٹس تے خیبر پختونخوا وچ ایف سی ٹریننگ سینٹر دے قیام لئی ایڈوانس فنڈز جاری کرن دی منظوری وی دے دِتی اے۔