لوکائی دی سہولتاں لئی موبائل یوٹیلیٹی سٹورز٭آٹا،کھنڈ تے گھیو سستا ویچیا جاوے گا:اسد عمر۔۔۔۔۔رویل نیوز

اسلام آباد (نیوز ڈیسک) یوٹیلیٹی سٹورز کارپوریشن نے ملک دے پسماندا تے دور دُراڈے علاقیاں وچ رہن والی لوکائی دی سہولتاں لئی موبائل یوٹیلیٹی سٹورز دا اجرا کر دِتا اے‘ وفاقی وزیر برائے منصوبا بندی اسد عمر نے اسلام آباد وچ موبائل یوٹیلیٹی سٹور سروس دا افتتاح کیتا‘ پہلے مرحلے وچ اسلام آباد وچ 8 موبائل یوٹیلیٹی سٹورز ہون گے‘ دوجے مرحلے وچ ملک دے مختلف حصیاں لئی موبائل یوٹیلیٹی سٹورز شروع کیتے جان گے۔ ایس موقع اُتے خطاب کردیاں ہویاں وفاقی وزیر اسد عمر نے کہیا کہ وزیراعظم نے کھان پین دیاں شیواں مستحقین تک پہنچان دی خاہش دا اظہار کیتا سی۔ موبائل یوٹیلیٹی سٹورز گھٹ آمدن طبقے دے گھر تک سامان پہنچان لئی نیں‘ مشکل دی ایس گھڑی وچ پورے ملک دی ضلعی انتظامیا اُتے بہت بھار اے۔ اوہناں نے کہیا کہ موبائل یوٹیلیٹی سٹورز دا مقصد غریباں تک لوڑی دیاں شیواں پہنچانا اے۔ وفاقی ویر نے کہیا کہ پورے ملک دی لوکائی نُوں آٹا‘ کھنڈ‘ دالاں تے گھیو سستے بھاء اُتے گلی گلی فراہم کیتے جان گے‘ وفاقی وزیر نے کہیا کہ حکومت لوڑی دیاں شیواں دی فراہمی متاثر ہون نہیں دیوے گی‘ لوکائی کرونا خلاف حفاظتی تدبیراں اُتے عمل کردیاں ہویاں گھراں تک محدود رہوے‘ لوکائی دی سہولت لئی 50 ارب دا پیکج منظور کیتا گیا اے۔ ایس موقع اُتے ایم ڈی یوٹیلیٹی سٹورکارپوریشن عمر لودھینے کہیا کہ پورے ملک وچ 4 ہزار یوٹیلیٹی سٹورز نیں جہڑے گھٹ نیں‘ دور دُراڈے علاقیاں لئی موبائل یوٹیلیٹی سٹورز شروع کر رہے آں۔ رمضان ریلیف پیکج دیاں ساریاں شیواں ایہناں موبائل یوٹیلیٹی سٹوراں وچ رکھیاں جان گیاں۔