kraamaat@gmail.com
+ +92 333-430-6384


کرونا خلاف جنگ دے وچ ساری قوم نے رَل کے لڑنا اے٭ماڑیاں تک پیسا اپڑانا اے ٭بدقسمتی اے کہ  صحت دے شعبے ول کسے دھیان ای نہیں دِتا:وزیر اعظم ....٭ رویل نیوز٭


نمائندا رویل April 11, 2020


اسلام آباد (بیورو رپورٹ) وزیراعظم عمران خان نے کہیا اے کہ لاک ڈاؤن دے اثرات پوری دنیا اُتے پے رہے نیں‘ ایہدے نال ملکی معیشت نُوں بہت نقصان ہویا‘ اثرات بہت دیر تک رہن گے۔ نجی ٹیلی وژن نال گلبات کردیاں ہویاں وزیراعظم دا کہنا سی کہ کرونا وایرس دی صورتحال دے پیش نظر امریکا نے 2200 تے جاپان نے 1 ہزار ارب ڈالر دا پیکج جد کہ پاکستان نے 8 ارب ڈالر دا پیکج دِتا اے۔ سانوں ہسپتالاں اُتے جنا خرچ کرنا چاہیدا سی‘ اونا نہیں کیتا۔ عمران خان دا کہنا سی کہ 14 دن وچ 144 ارب رُپئے 1 کروڑ 20 لکھ بندیاں وچ ونڈنے نیں۔ پیسے دی تقسیم وچ کوئی سفارش کوئی سیاسی وابستگی نہیں چلدی‘ اسیں سبھ توں مستحق لوکاں نُوں پہلے دے رہے آں۔ اوہناں دا کہنا سی کہ ساڈی طاقت نوجوان آبادی اے۔ کرونا دے 5 فیصد روگیاں نُوں ہسپتال جان دی لوڑ ہوندی اے۔ جنی احتیاط کیتی جاوے گی‘ کرونا وایرس گھٹ کھلرے گا‘ ایس وباء دے خلاف جنگ دا ساری قوم دے نال رَل کے ای مقابلا ہو سکدا اے۔ وزیراعظم نے افسوس دا اظہار کردیاں ہویاں کہیا کہ بدقسمتی نال صحت دے شعبے اُتے کوئی توجا نہیں دِتی گئی‘ کیہ جہڑا ملک ایٹم بمب بنا سکدا اے اوہ وینٹی لیٹر نہیں بنا سکدا سی؟ ساڈے ملک وچ کِٹاں یاں ماسک بنانا کوئی مشکل نہیں سی پر سانوں ہر شے باہروں منگوان دی عادت پئی ہوئی اے۔ اوہناں دا کہنا سی کہ جدوں وی ملک اُتے کوئی آفت آئی پاکستانیاں نے ودھ چڑھ کے مدد کیتی۔ میں 2005 وچ جدوں بھُچال تے سیلاب آیا‘ اوہدے وچ کم کیتا سی۔ فنڈز ایس لئی اکٹھا کیتا جا رہیا اے کہ اؤکھے ویلے وچ لوکاں دی مدد کر سکیے۔ اوہناں نے لوکائی توں اپیل کردیاں ہویاں کہیا کہ اِک دم اینے کیس ودھ جان تے امیر ترین ملک وی سنبھال نہیں سکدے۔ لوک جے احتیاط کرن تے اسیں وباء توں نکل جاواں گے‘ جحرے محدود‘ اوہ محفوظ نیں۔ جنی احتیاط کراں گے‘ کرونا گھٹ کھلرے گا‘ کوئی نہیں کَہ سکدا 2 توں 6 مہینیاں بعد کیہ ہووے گا۔