چالھی ہزار پاکستانی وطن واپسی دی تانگھ وچ نیں،سبھ دی بے چینی دا احساس اے: محمود قریشی۔۔۔۔٭رویل نیوز٭

اسلام آباد (بیورو رپورٹ) وزیر خارجا مخدوم شاہ محمود قریشی نے کہیا اے کہ حکومت نُوں اوہناں محصور ہم وطناں دیاں تکلیفاں دا پوری طرحاں احساس اے‘ ہُن وی تقریبن 40 ہزار پاکستانی وطن واپسی دے منتظر نیں۔ صوبائی حکومتاں وسیع تر قومی مفاد وچ‘ محصور پاکستانیاں دی وطن واپسی دے عمل وچ دفتر خارجا تے وفاقی حکومت دی معاونت کرن۔ جمعے نُوں بیرونی ملکاں وچ مقیم پاکستانیاں دے ناں اہم پیغام وچ وزیر خارجا نے کہیا کہ میں ایس مشکل گھڑی وچ تہاڈے نال مخاطب آں جدوں کووڈ19- دی صورت و چ اِک ناگہانی آفت نہ صرف پاکستان سگوں پری دنیا نُوں اپنی ولھیٹ وچ لے رکھیا اے‘ دوجی جنگ عظیم دے بعد دنیا نے اینا وڈا چیلنج نہیں ویکھیا جہڑا اج ویکھ رہے آں۔