کرونی شُوک

،،،،کرَونی شُوک،،،،،

ساڈے پِنڈ نوں پئے گئے چور نی
کِتوں آ کے کَلّر شور نی
جِہناں دِتیاں سانجھاں کھور نی
ساڈے رُل گئے مور چکور نی
جو سہنے سی کسے ہور نی
اسیں اوہ وی دُکھ جرے
اِک ٹالھی وین کرے

ساڈے پِنڈ وچ ودھ گئے روڑ نی
جِہناں دِتا سانوں توڑ نی
اسیں مُڑے نہ اگلا موڑ نی
ساتھوں رُس گئے پِپل بوڑھ نی
ساڈے وِچ شریہنیاں کھوڑ نی
ساڈے سُک گئے باغ ہرے
اِک ٹالھی وین کرے

ساڈے پِنڈ نوں کھا گئے نھیر نی
جِہناں دِتیاں چُھریاں پھیر نی
اسیں سوں کے کر لئی دیر نی
کِتے ٹُر گئی ہور سویر نی
کِسے کانی رُت دے بیر نی
اسیں چُگ چُگ ڈِھڈ بھرے
اِک ٹالھی وین کرے

ساڈے پِنڈ وچ آ گئے ناگ نی
جِہناں چھیڑ کے زہری راگ نی
ساڈی ہتھ وچ کر لئی واگ نی
ساڈے سِر تے بہ گئے کاگ نی
ساڈے ہتھوں کِر گئے بھاگ نی
ساڈے تھاں تھاں حق مرے
اِک ٹالھی وین کرے

ساڈے پِنڈ نوں چٹ گئے شہر نی
جِہناں ونڈ کے مِٹھا زہر نی
ساڈے نال کمایا قہر نی
اسیں تڑفے اٹھے پہر نی
سانوں بُھل گئی اوہ وی نہر نی
جِہدےوِچ سن چاء ترے
اِک ٹالھی وین کرے

ساڈے پِنڈ نوں چنبڑے روگ نی
جِہناں پیڑ لئی ساڈی چوگ نی
ساڈے ہتھ وچ رہ گئے پھوگ نی
ساڈے اندر اُگ پئے روگ نی
ساڈی بجھی رہ گئی جوگ نی
ساڈے پِن پِن دِن سرے
اِک ٹالھی وین کرے

ساڈے پِنڈ نوں لئے گئے کال نی
جِہناں کر کے مندڑے حال نی
سانوں کوہیا بُھکھاں نال بی
ساڈے وِک گئے جمدے بال نی
اسیں لڑیے کہندے نال نی
ساڈے کِہناں سُکھ چرے
اِک ٹالھی وین کرے

ساڈے پِنڈ وچ پئے گئی ہوک نی
اج ایس کرونی شُوک نی
ساڈے دِتے جُھگے پُھوک نی
اُتوں واء دے سخت سلُوک نی
ساڈے سڑ گئے چن ملوک نی
ساڈے سورج جان کھرے