kraamaat@gmail.com
+ +92 333-430-6384


بال ادب دی لوڑ تے کرس رڈل دی کتاب


راشد محمود بٹ April 13, 2020


بال ادب دی لوڑ تے کرس رڈل دی کتاب بال ادب دا اک وڈا ناں ایسٹرڈ لنڈگرن (Astrid Lindgren) ہوراں دا اے، اوہ اک تھاں لکھ دیاں نے "کتاباں توں بغیر بچپن، کوئی بچپن نہیں، اے انج ای اے جویں تہانوں کسے ودھیا تے موہ لین والی تھاں توں پرے رکھیا جاوے"۔ انج ای اک تھاں جیکولین کینیڈی نے آکھیا اے "تسیں اپنے بالاں دی دُنیا نوں وڈا کر سکدے او، ایہدے بہت طریقے نیں، جہناں وچوں کتاباں نال پیار سبھ توں ودھیا اے"۔

بال ادب نال اسیں اوہناں دی سوچن سمجھن دی صلاحیتاں دے نال نال اوہناں دی بولی دی مہارت وی ودھا سکدے آں، اج اسیں کتاباں توں انج ای دور رہندے اں،ایہدی اک وڈی وجھا نکے ہوندیاں توں ہی ساڈی کتاباں توں دُوری اے۔

بال ادب وچ اک وڈا ناں "کرس رڈل" (Chris Riddell) دا وی اے جہڑے اج دے دیہاڑ 1962ء وچ جمے۔ او ہن تیکر بال ادب کئی وڈے انعام جت چکے نیں، جہناں وچ تن واری "کیٹ گریناوے میڈل" وی شامل اے۔ او 2015ء توں 2017ء تیک برطانیہ دے "چلڈرنز لاریٹ" وی رہے نیں۔ اج اوہناں دے جنم دیہاڑ تے اوہناں دی 2013ء وچ آن والی مشہور کتاب "گوتھ گرل اینڈ دا گھوسٹ آف دا ماوس" (Goth Girl and the Ghost of a Mouse) اتے گل کراں گے۔

"گوتھ گرل اینڈ دا گھوسٹ آف دا ماوس" اک کڑی ایڈا گوتھ (Ada Goth) دی کہانی اے جہڑی اک وڈے قلعے ورگے گھر وچ اپنے پیو لارڈ گوتھ، جہڑا اک شاعر اے، تے کٹ ودھ ای اودھے نال گل بات کردا اے، تے کئی ملازماں نال رہ رہی اے۔ اک دیہاڑ ایڈا دی ملاقات ملازماں دے بالاں ولیم تے ایملی کیبج نال ہوندی اے تے او اوہناں نوں اپنے بھیت بھرے ایٹک کلب (چھت دے وچ بنیا کمرا) وچ لے جاندی اے۔ ایس طرحاں اوہناں دی یاری اگے و دھدی اے۔ ہن اوہناں اگے کئی پراسرار سوال نے جہڑے گھر وچ ہون والے واقعات دے متعلق نیں، فیر اک راتیں اوہدا ساہمنا اِک چوہے دے بھوت نال ہوندا اے جہدا ناں اشمایل اے۔ اے کتاب سانوں بُہت چنگی طرحاں اوس پورے قلعے دی منظر کشی کرواندی اے تے نال نال ایہدے وچ ہاس رس وی ساہمنے آؤندا اے۔

کتاب پڑھدیاں تہانوں میری شیلی دے کردار وی یاد آن گے تے نکیاں وڈیاں سبھ دے لئی اے اِک ودھیا کتاب اے جہڑی سانوں اپنے اندر دے خوف نوں باہر کڈھن دا موقع دیندی اے۔

ایڈا گوتھ دے کردار نوں لے کے ایس سیریز دیاں چار ہور کتاباں وی آ چکیاں نے، جہناں اُتے فیر کدی گل ہوئے گی۔

٭٭٭٭٭