گھر بندی دوران مسیحی برادری نے ایسٹر دا تہوار سادگی نال منایا۔۔۔۔۔٭رویل نیوز٭

روم (نمائندا رویل) کرونا وایرس دے کھلار دے پیشِ نظر لاک ڈاؤن کارن پوری دنیا وچ مسیحی برادری نے ایسٹر دا تہوار سادگی نال منایا۔ ویٹی کن سی وچ ایسٹر دی تقریب دے موقع اُتے پوپ فرانسس نے رلت کیتی جد کہ کرونا وباء دے پیش نظر تقریب وچ لوکائی نُوں سدیا نہیں گیا سی۔ ویٹی کن سٹی وچ کیتھولک مسیحیاں دے روحانی پیشوا پاپ فرانسس نے سینٹ پیٹرز وچ خصوصی سروس نال خطاب کیتا تے کہیا کہ کرونا وباء نال متاثر دنیا وچ چھیتی دُبارا خشحالی آئے گی۔ پوپ فرانسس نے کرونا وائرس وباء دا ساہمنا کرن وچ اوکڑاں نال دوچار غریب ملکاں دے قرضے وچ کٹوتی یاں معاف کرن دا مطالبا کیتا اے۔ پوپ نے خالی سینٹ پیٹرز باسلیکا توں لائیو سٹریم ایسٹر پیغام وچ کہیا کہ دُعا اے کہ سارے ملک ایس پوزیشن وچ آ جان کہ اوہ ایس لمحے دیاں عظیم ترین لوڑاں نُوں پورا کر سکن تے غریب ترین ملکاں دے قرضے بھار وچ توازن لئی معاف کر دِتا جاوے جے انج نہیں تے کٹوتی کیتی جا سکے۔ پوپ فرانسس نے ایسٹر دے موقع اُتے نوول کرونا وایرس نال ہلاک تے متاثرا بندیاں لئی دُعا کیتی۔ پیغام وچ پوپ نے کہیا کہ اج میری پہلی دُعا اوہناں لوکاں لئی اے جہڑے کرونا وایرس نال براہ راست متاثر ہو کے بیمار نیں جہڑے موت دے مونہ وچ جا چکے نیں تے اوہ خاندان جہڑے اپنے پیاریاں دے جان اُتے ماتم کناں نیں تے کئی کیساں وچ ایہناں لوکاں لئی جہناں نُوں آخری دیدار وی نصیب نہ ہو سکیا۔دوجے پاسے برطانیا دی ملکہ الزبتھ نے ایسٹو تہوار دے موقع اُتے اپنے سنیہےوچ کرونا وایرس دے کھالر نُوں روکن دی اہمیت اُتے زور دِتا۔ ملکہ برطانیا نے اپنے پیغام وچ کہیا کہ دور رہ کے اسیں اِک دوجے نُوں محفوظ رکھ سکدے آں۔