kraamaat@gmail.com
+ +92 333-430-6384


"الیاس عباسی ہوراں دا لیکھ" کرونا ، ویکسین تے جت دی جنگ


خاص لیکھ April 18, 2020


کرونا ، ویکسین تے جت دی جنگ

الیاس عباسی

ایس ویلے میڈیکل دنیا اندر کرونا دی وباء بنان دی ریس لگی ہوئی اے۔مغرب دیاں یونیورسٹیاں فارما دی وڈیاں کمپنیاں نال رل کہ ایس بیماری دا توڑ لبھن لئی رُجھیاں ہویا ں نیں۔ معاشی گرواں دا خیال اے کہ جیس کمپنی نے ایہدی دوائی پہلے بنا لِتی اَ تے سمجھ لو اوہنے کئی ورھیاں تیک اپنی معاشی ہوند نوں ہور تگڑا کرلینا اے ۔ کجھ چر پہلاں جرمن دی اک فرم ،،کیور ویک،، نے کجھ تحقییقی کم کیتا تے میڈیاراہیں پتا چلیا کہ اوس کمپنی دے سی ای او ہوراں نوں وائٹ ہاوؑس سدیا گیا تے کئی بلین ڈالر دی آفر کیتی گئی تاں جے ایہ ریسرچ امریکہ چ رجسٹر یاں پیٹنٹ کیتی جاوے۔ جد کہ جرمن سرکارولوں ایہنوں مندا کہیا گیا اے۔ اسیں اندازا لاسکنے آں پئی ایہ دوڑ ہن اک جنگ بن چکی اے۔

آکسفورڈ یونیورسٹی دی پروفیسر سارا گلبرٹ ہوراں اک تحقیقی ٹیم دی سربراہی کررہے نیں میڈیسن دی دنیا دا اِک وڈا ناں پروفیسر ساراگلبرٹ اے جہڑی اسی فیصد یقین رکھدیاں نیں کہ اوہناں دی ٹیم نے اجہی ویکسین بنائی اے جہڑی ایس کرونا دی بیماری خلاف کم کرے گی ۔ اوہناں آکھیااے کہ آکسفورڈ اک تعلیمی ادارا اے تے ایہدے لئی سوکھا نہیں کہ اوہ ایس ویکسین دی تیاری کمرشل سطح تے کرے ایسے لئی یونیورسٹی ولوں اٹلی دی فرم نال رابطا وی ہویا اے تے ایس ویکسین دی تیاری شروع کردتی گئی اے تاں جے رزلٹ ایہناں دیاں سدھراں مطابق آیاتے ویکسین دی اپروول ہوگئی تاں فیر ایہ انساناں لئی ورتی جاسکے۔ آس کیتی جاسکدی اے کہ ایہ ویکسین ایسے سال ستمبر تیک آجائے گی۔

دوجے ترقی یافتا ملکاں وانگوں آسٹریلیا دے سائنسدان دی وی ایس کھیتروچ بھرویں کھوج کررہے نیں تے پہلے مرحلے تے ایہناں نیں وی ویکسین دا ٹرائل شروع کرلتا گیا اے تے خبراں مطابق ایہناں دی کھوج وی ٹھیک جارہی اے۔ ایہناں سارے ملکاں دی کھوج توں اندازا لگاسکنے آں کہ اوتھے دیاں یونیورسٹیاں تے لیبارٹریاں تے سرکار اک مقصد لئی ، ایہ سارے جتن کررہیاں نیں تے جے اسیں اپنے ملک پاکستان ول ویکھیے تاں سر شرم نال اتانہ نہیں ہوندا، ساڈے ملک دیاں کِنیاں کُویونیورسٹیاں ایس کھوج اندر شامل نیں ؟ ساڈی سائنس دی وزارت نوں آسٹریلیا دی وزارت توں سبق سکھنا چاہیدا اے جہڑی اپنے سائنسداناں نال رل کہ کھوج کررہی اے۔

امریکی سائنسداناں ولوں اک وڈا دعوا ساہمنے آرہیااے جہڑا ایس ویلے ڈری ہوئی دنیانوں آس ، اگے ودھن دی خشی دے رہیا اے اوہنا اک اینٹی وائرل ،،ریمی ڈیسیور،، دوا بنا لئی جہڑی کرونا دا توڑاے۔ ایس دوائی دا بندراں تے استعمال کیتا گیا اے جہدے رزلٹ توقع دے مطابق آئے نیں ایس دوائی بارے دعوا کیتا جارہیااے کہ ایہ انسان دی بیماریاں نال لڑن دی طاقت ودھاندی اے تے کرونا دے وائرس نوں ماروی دیندی اے۔ ایس اینٹی وائرل دے کارن گیلائیڈ کمپنی دے شیئرز دی قیمت چ وادھا ہویااے۔ایس امریکی فارما کمپنی دی دوائی کارن کئی ورھیاں تیک امریکی سپریم طاقت ہون توں کوئی ڈک نہیں لاسکدا۔ دنیا اندر دوائی بنان دی ریس جتن دا مطلب اے کہ تسیں کئی سوورھیاں تیک معاشی طاقت ہون دا بندوبست کرلیا اے۔

سرمایہ دارانہ نظام اندر ، وڈیاں کمپنیاں ، کسے وی سرکار یاں ملک توں وڈیاں ہوندیاں نیں تے اجوکی دنیا اندرایہ حقیقت سامنے آچکی اے کیوں جے اج ٹرمپ سرکار ہووے یا اسرائیلی بنجمن دی سرکارہووے یاں اینگلا مرکل دا جرمنی ہووے یا بورس دا برطانیہ، کارپوریشنز اپنے نفع لئی کجھ وی کرسکدیاں نیں ایسے لئ دنیا دے کئی ترقی یافتا ملکاں چ اجہی اوازاں دبائی جارہیاں نیں ، جہڑیاں ایس بیماری تے ایہدے دوائی بنان دے دعوے تے شک کررہیاں نیں ۔ ایہوکارن اے کہ امریکہ چ بل گیٹس تے ڈاکٹر فاوؑچی خلاف مہم چل رہی اے۔ کل کیلی فورنیا چے لوکی لاک ڈاؤن نہ مندے ہووے باہر سڑکاں تے نکل پئے۔

رب کرے اییہ ساری سازشی تھیوریاں غلط ہون تے اسیں اگے ودھیے تے اپنی ایسے دنیا اندر جنت بنان دا جتن کریے۔ ساڈے ورگے ملکاں لئی سبق اے کہ طاقت اسلے یالڑائی نال نہیں آوندی ایہدے لئی سانوں سائنس دی دنیا اندر ڈُبکی لاونی پینی اے ۔پیروی دی عادت نوں چھڈ کہ تخلیق ول دھیان کرنا پینا اے ایہ اوکھا کم ضرور اے۔

٭٭٭٭٭