kraamaat@gmail.com
+ +92 333-430-6384


سمگلنگ روکن لئی  قانون تیار،پورے مُلک وچ لاگو ہوئے گا تاں جے عوام نوں فائدا اپڑایا جا سکے،سہولت کاراں خلاف وی کارروائی ہوئے گی:وزارت قانون۔۔۔٭ رویل نیوز٭


نمائندا رویل April 20, 2020


اسلام آباد (نمائندا رویل) وزارت قانون و انصاف نے انسداد سمگلنگ آرڈیننس دا مسودا تیار کر لیا جہدے انوسار سمگلرز نُوں 14 سال تک قید دی سزا ہو سکے گی۔ وفاقی وزیر قانون تے انصاف بیرسٹر فروغ نسیم دی اگوائی وچ ٹیم نے انسداد سمگلنگ آرڈیننس دا مسودا تیار کیتا اے‘ ایہ لاگو پورے ملک وچ فوری طور اُتے ہووے گا‘ آرڈیننس دا اطلاق غیر ملکی کرنسی‘ سونے‘ چاندی‘ کھنڈ‘ کنک‘ آٹے‘ چاؤل‘ دالاں‘ آلو‘ گنڈھے‘ خردنی تیل تے لائیو سٹاک اُتے ہووے گا۔ مسودے وچ کہیا گیا اے کہ کسٹمز‘ ایف بی آر تے قانون نافذ کرن والے ادارے کارروائی دے مجاز ہون گے‘ متعلقا ادارے کارروائی نہ کرن تے سیکرٹری قانون نُوں کارروائی دا اختیار ہووے گا‘ ایہدے علاوا خصوصی عدالتاں ملوث بندیاں خلاف سمری ٹرائل کرن گیاں۔ آرڈیننس دے تحت سمگلرز دے سہولت کاراں خلاف وی کارروائی ہو سکے گی‘ سمگلرز نُوں وارنٹ دے بغیر گرفتار کیتا جا سکے گا‘ سمگلنگ دا پھڑیا گیا مال بحق سرکار ضبط کر لیا جاوے گا‘ سمگلنگ دی اطلاع دین والے نُوں ریکوری دا 10 فیصد انعام دِتا جاوے گا۔ وفاقی وزیر قانون فروغ نسیم نے پریس کانفرنس کردیاں ہویاں کہیا کہ ذخیرا اندوزی نُوں مجرمانا فعل متھ دِتا گیا اے جہدے وچ ملوث بندیاں نُوں سخت سزاواں دا ساہمنا کرنا پوے گا۔ آرڈیننس دے خاص خاص نکات توں اگاہ کردیاں ہویاں اوہناں نے دَسیا کہ جہڑا کوئی وی آٹا‘ کنک‘ کھنڈ‘ گُڑ‘ گھیو‘ دستانیاں‘ ماسکس‘ سینیٹائزرز وغیرا دی ذخیرا اندوزی کرے اہدے لئی سخت سزاواں مقرر کیتیاں گئیاں نیں۔ایہدے علاوا سمگلنگ آرڈیننس وی تیار کر لیا گیا اے جہنوں وزیراعظم دے دفتر گھل دِتا گیا اے جتھے ایہد اُتے غور کیتا جا رہیا اے تے اگلے 2 توں 3 دن وچ ایہنوں وی شکل دے دِتی جاوے گی۔انسادد سمگلنگ آرڈیننس دی تفصیلات توں اگاہ کردیاں ہویاں اوہناں نے کہیا کہ غیر اعلانیا راہواں توں پاکستان توں باہر ڈالر دی سمگلنگ دی روک تھام تے کنک‘ کھنڈ‘ آلو وغیرا دی سمگلنگ عوامی مفاد دے خلاف اے تے وبائی صورتحال وچ ضروری اے کہ ایہناں ساریاں شیواں دی غیر اعلانیا راہواں توں سمگلنگ روکی جاوے۔ اوہناں نے کہیا کہ سمگلنگ دیاں اطلاعواں اُتے غفلت ورتن والے افسراں نُوں وی سخت سزاواں ملن گیاں۔