kraamaat@gmail.com
+ +92 333-430-6384


لاک ڈاؤن کرڑا کیتا جائے گا تے کرونا دے روگی گھٹ جاون گے،پہلاں تاں بس لاک ڈاؤن نوں ہاسے پایا گیاسی: ڈاکٹرز ایسوسی ایشن  ۔۔۔۔ ٭رویل نیوز٭


نمائندا رویل April 23, 2020


کراچی (اُچیچا نمائندا) ڈاکٹرز ایسوسی ایشن نے سندھ تے وفاقی حکومت توں مطالبا کیتا اے کہ پورے ملک وچ لاک ڈاؤن نُوں سخت کیتاجاوے تاں جے کرونا وایرس دے کھلار نُوں روکیا جا سکے۔ کراچی پریس کلب وچ ڈاکٹراں نے پریس کانفرنس کردیاں ہویاں کہیا کہ ملک وچ کرونا دے کیسز ساہمنے آن دے بعد لاک ڈاؤن کیتا گیا‘ جہدے وچ سارے طبقیاں سنے علماء کرام نے وی بھرواں تعاون کیتا‘ جے لاک ڈاؤن نہ ہوندا تے اج وباء دے کیسز بہت زیادا ہوندے۔ ڈاکٹراں دا کہنا سی کہ 14 اپریل دے بعد توں لاک ڈاؤن وچ نرمی دے بعد کرونا روگیاں دی گنتی وچ تیزی نال وادھا ہویا‘ ڈاکٹرز کمیونٹی وچ وی تشویش اے کہ کرونا دے کیسز ودھ رہے نیں‘ ہُن لاک ڈاؤن دے ناں اُتے مذاق ہو رہیا اے‘ رمضان دے نیڑے مسیتاں کھولن اُتے وی زور دِتا گیا اے‘ جے روگیاں دی گنتی ودھی تے قابو کرنا مشکل ہو جاوے گا‘ انج نہ ہووے کہ اسیں سڑکاں اُتے لوکاں دا علاج کر رہے ہوئیے۔ ڈاکٹراں نے مطالبا کیتا کہ علماء کررام تے صدر مملکت دے وچکار جہڑے نکات طے پائے‘ اوہناں اُتے مسیتاں کھولن بارے فیصلے اُتے علمائے کرام نظرثانی کرن‘ جد کہ حکومت توں وی مطالبا کردے آں کہ لاک ڈاؤن نُوں ہور سخت کیتا جاوے۔ ڈاکٹراں نے کہیا کہ ڈاکٹرز فرنٹ لائن اُتے کم کر رہے نیں‘ جونیئر ڈاکٹرز سہولتاں دی کمی دے باوجود کم کر رہے نیں‘ پر سبھ جاندے نیں کہ کرونا ٹیسٹ دا مسئلا اے تے ہسپتالاں وچ وی بہت زیادا سہولتاں موجود نہیں‘ سانوں آن والے دناں وچ اوکڑاں دا ساہمنا کرنا پے سکدا اے‘ سانوں ایس ویلے سختی نال حفاظتی تدبیراں اُتے عمل کرنا پوے گا‘ ایس ویلے بچاء دے علاوا ساڈے کول کوئی آپشن نہیں‘ لوکاں توں اپیل اے کہ ایس روگ نُوں مَٹھا نہ لین تے گھراں وچ رہ کے ایس وباء توں اپنے پ نُوں اپنے گھر والیاں نُوں بچان۔ ڈاکٹراں دا کہنا اے کہ سانوں نہیں پتا کہ پاکستان وچ اِک مہینے وچ بھُکھ نال کنے لوک مرے‘ پر ایہ ضرور پتا اے کہ کرونا نال 200 توں ودھ بندے جان دی بازی ہار چکے نیں۔ ڈاکٹراں نے کہیا کہ کرونا وایرس اُتے حکمراناں نے غلط فیصلے کیتے تے علماء نے غیر سنجیدگی دا مظاہرا کیتا۔ دوجے پاسے سٹیٹ بینک نُوں آئی ایم ایف توں 1 ارب 39 کروڑ ڈالر مِل گئے نیں۔ سٹیٹ بینک ولوں جاری اعلامیے مطابق سٹیٹ بینک نُوں آئی ایم ایف توں اِک ارب 39 کروڑ ڈالر مل گئے نیں تے آئی ایم ایف توں ایہ رقم ریپڈ فنانسنگ انسٹرومنٹ دے تحت ملی اے۔ آئی ایم ایف ولوں اعلامیے وچ واضح کیتا گیا اے کہ کرونا دی وجھا توں مستقبل وچ غیر یقینی صورتحال رہن دی توقع اے‘ کرونا دی وجھا توں پاکستان دی مالی تے ایکسٹرنل فنانسنگ دیاں لوڑاں وچ وادھا ہووے گا۔ آئی ایم ایف ولوں دِتا جان والا قرضا ڈِگدیاں ہویاں غیر ملکی زرمبادلا دے ذخایر نُوں سنبھالن وچ معاون ہووے گا‘ ایہدے نال پاکستان نُوں بجٹ لئی درکار فنانسنگ وچ وی مدد ملے گی جد کہ ایس امداد نال کرونا دی وجھا توں ہون والے وادھو اخراجات نُوں پورا کیتا جا سکے گا۔