پاکستان وچ کرونا کیس  دی نویں صورت حال۔۔۔۔ ٭رویل نیوز٭

لاہور (نمائندا رویل) پاکستان وچ کرونا وایرس دے ہُن تک رپورٹ ہون والے کیساں دی کل گنتی 10 ہزار 69 ہو چکی اے جد کہ ایس وباء نال مَوتاں دی مجموعی گنتی 212 ہو گئی اے۔ ملک وچ 7 ہزار 695 کرونا وایرس دے روگی ہُن وی ہسپتالاں وچ علاج ہیٹھ نیں‘ جہناں وِچوں 58 دی حالت ماڑی اے جد کہ 2 ہزار 162 روگی اللہ تعالیٰ دے فضل و کرم نال ایس بیماری توں صحت یاب ہو چکے نیں۔ پنجاب وچ کروا دے روگیاں دی گنتی سبھ توں ودھ 4 ہزار 328 اے جد کہ ایہدے نال ہلاکتاں 51 ہو گئیاں نیں۔ دوجے پاسے پوری دنیا وچ کرونا وایرس نال متاثرا بندیاں دی گنتی 25 لکھ 57 ہزار 181 ہو چکی اے جد کہ ایہد ے نال ہلاکتاں 1 لکھ 77 ہزار 641 ہو گئیاں نیں۔ کرونا ویارس دے پوری دنیا وچ 16 لکھ 89 ہزار 96 روگی ہُن وی ہسپتالاں وچ علاج ہیٹھ نیں‘ جہناں وِچوں 57 ہزار 245 دی حالت ماڑی اے جد کہ 6 لکھ 90 ہزار 444 روگی اللہ تعالیٰ دے فضل و کرم نال ایس بیماری توں نجات پا کے ہسپتالاں توں اپنے گھراں نُوں پرت چکے نیں۔