بے حیائی، جُھوٹھ تے کرونا

بے حیائی،جُھوٹھ تے کرونا

الیاس عباسی

سوانیاں دا فیس بک استعمال کرنا، ٹک ٹاک تے ویڈیوبنانا، غیرمحرم لوکاں دیاں پوسٹاں نوں لائیک کرنا ، فیر اوہناں نال چَیٹ کرنا،کیہ ایہ سبھ کجھ بے حیائی نہیں ؟ اوہناں دا جینز پاونا، ٹی شرٹ پاکہ بازاراں چ گھُمنا، پھرناتے مرد وچاریاں نوں اپنے ول کرنا وی بے حیائی نہیں ؟ عورت جے طوائف ناں ہووے تے فیرکیہ لوڑاے مرد نوں تماش بینی یا گناہ کرن دی ایہناں دی بے حیائی کارن ای سارے گناہگارہورہے نیں ایہناں عورتاں نوں بازار دی ذینت کہنے بنایا، کیوں میڈیا تے ایہناں نوں وکھایاجاندااے ایتھے تسیں تبلیغ بارے پروگرام چلاؤاج عورت دے سر اُتے دُپٹانہیں رہیا، میڈیا دی فیمیل اینکراں دے پروگرام چ مردآوندے نیں کیہ ایہ سبھ غلط نہیں ، جے مولاناہوری غلطی دی نشاندہی کرن تے تسیں سارے اوہناں دے پچھے پے جاندے اوعذاب توں بچنا اے تے سانوں اپنا قبلاسدھاکرن دی لوڑاے۔

اج ساڈامیڈیاجھوٹھ بولدااے پرکئی دفعامجبورن ایسے میڈیاتے مفت آکے وچارسانجھے کرنے پیندے نیں تاں جے جھوٹھاں دے ایس کارخانے اندر کوئی تے سچ بولے ایہناں نوں سُن سُن کہ وڈی ہوون والی نسل تے قوم فیر کویں سچی ہوسکدی اے ایسے لئی مولانا ہوراں نوں مجبورن کہنا پے گیا سی کہ 22 کروڑعوام وی جھوٹھی ای اے تے فیر ذرا خد سوچو،کیہ اسیں سارے عذاب توں بچ سکنے آں ؟ مولانا تے تنقید کرن آلیاں عورتاں دا ساڈے کلچر نال کیہ لینا، دینا،کل پی ٹی آئی دی انسانی حقاں دی وزیر ڈاکٹر شیریں مزاری ہوراں دی مولانا تے تنقید سراسر غلط سی ، غلط کویں ناں ہووے اوہ خود عورت جو سن ہرویلے ٹی وی تے باہرلے ملکاں چ غیرمحرم مرداں بہندی اے سگوں سرکاری اجلاساں چ وی شرکت کردی اے اوہناں دیاں چیکاں دی سمجھ آوندی اے ایسے طرحاں فیمی نسٹ عورتاں دے وجھا کرکے ای تے عذاب آیا اے ناں اے لباس اجہییا پاوون جہنوں ویکھ مرد بیچارا بے قابو ہووے ناں ای میڈیا تے یاں باہر نکلن عورت تاں گھیر بیٹھی ای سوہنی لگدی اے سگوں جدوں بے حیائی نہیں ہووے گی تے فیر ویکھ لینا ، کرونا وی مُک جاووے گا۔

ہُن دوجی کلاس اوہ اے جہنوں مولاناصاحب نال خداواسطے دا ویر اے ایہناں نوں تاں ، اوہناں دی ہرگل، دعا وچ کیڑے ای نظر آوندے نیں اوہناں میڈیانوں جھوٹھا آکھیاتاں ایہ تنقیدکرن والے فیر باز نا آئے تے فورن آکھن لگ پئے کہ جے ایہ فورم جھوٹھیاں دا اے ، ایتھے جھوٹھ بولیاجاوندااے تے فیرمولاناصاحب ایسے میڈیارا ہیں کیوں تبلیغ کردے نیں ، کدھرے اوہ خُد وی ایس جھوٹھی مافیاداحصاتے نہیں ؟ خدا ناکرے ایہ سبھ انج ہووے ایہ تے ایہناں توں وَیررکھن آلی دی سازش اے ایہ چاہوندے نیں کہ مولانا ہوری میڈیا دا بائیکاٹ کردیون کہ ایتھے جھوٹھ بولیا جاوندااے تے برائی نوں ڈکن لئی اپنا حصا پاوون۔ ذرا سوچو جے میڈیابائیکاٹ ہوگیا تاں عوام نال زیادتی نہیں ہووے گی جہڑی اوہناں تیکر نہیں اَپڑسکدی اوہ ایسے میڈیاراہیں اوہناں دی تبلیغ توں فائداچُکدی اے۔

تیجی اوس کلاس نوں پیڑھ ہورہی اے جہڑی عمران خان دی ایمانداری تے سچائی توں انکاری اے ایسے لئی تے مولانا ہورا ں نوں رو روکہ دسنا پیا کہ عمران خان ہوراں نوں اجڑیا چمن ملیا ہن اوہ بے چارے کیہ کرن اوہناں توں جادو دی آس رکھنا کوئی سیانپ دی گل نہیں ہووے گی اوہناں دا، ایس مشکل صورتحال چے وزیراعظم رہنا ای وڈا تے تواریخی کارناما اے ویسے وی ایس جھوٹھی 22 کروڑعوام نوں کیہ پتا ، بھیڈاں چوں اونٹھ سیاننا ، ایہناں نوں کتھوں آوندااے۔ ایہنی سیانپ رکھ دی تاں جدوں خان ہوراں ورلڈکپ جتیا سی اوہدوں ای وزیراعظم بنا دیندی ہن بھگتن فیر۔

حامدمیرہوراں نوں غلطی ہوئی ہوئے گی کیوں جے اوہناں اپنے پروگرام اندر مولاناہوراں نوں ٹوکیا کہ تسیں تے نواز سرکاردے درباروی جاوندے سو تاں مولانا نے اینا سوہنا جواب دتا کہ حامدمیر ورگے بندے وی لاجواب ہوگئے ، آکھن لگے کہ اوہ تاں نصیحت کرن جاندے سن غلط توں روکن جاندے سن ۔ ایتھے مولانا ہوراں ناصرف بازی جِتی سگوں میلا وی لُٹ لیا اج خان سرکارول بھجنا، ایس لئی کہ خان ساڈے دیس دا سچا، کھرا تے ایماندار لیڈر اے اوہنوں ساڈے ورگے نالائقاں نے اوہدوں حکومت چ لیاوندا جدوں مالی چمن اُجاڑ چُکے سن ہن پھُل کتھے اُگن ہر شے دا اک ویلا ہوندا ہُن وِکے گونگلوں واپس نہیں ہوندے سیاسی پنڈتاں دی دُکان تاں چلدی ای جھوٹھ تے اے۔

٭٭٭٭٭