kraamaat@gmail.com
+ +92 333-430-6384


میرا نام جوکر۔۔۔۔۔۔۔۔


خاص لیکھ April 30, 2020


میرا نام جوکر۔۔۔۔۔۔۔۔۔۔۔

اِ ک ویلا سی نوجوان مُنڈے کُڑیاں رشی کپور دیاں فلماں دا بڑی شدت نال انتظار کردے سن کیوں جے اک تاں آپ دی فلماں نوں ویکھ کے رومان دی چَس آندی سی دوجا بہت ساریاں اداواں دی جانکاری وی ایس نال ای ملدی سی۔ایس لئی آپ دا مقام نویں اداکاراں وچ سبھ توں وکھرا سی۔ کپور خاندان د اناں ہندوستانی فلمی تواریخ وچ جانیا پچھانیا اے سگوں انج کہہ لئو کہ کپور خاندان دے ذکر توں بغیر ہندوستانی فلم دی تواریخ ادھوری ای رہوے گی۔جتھے آپ دے چاہن والیاں دی تعداد بہت ودھ سی اوتھے آپ نال ورودھ رکھن والے وی موجود سن جہناں وچوں کجھ تاں "بِیف کھاون والا ہندو" آکھ کے سوشل میڈیا اُتے رشی کپور دا مذاق اُڈاندے۔

رشی کپور 4 ستمبر1952 نوں اک پنجابی پروار دے گھر ممبئی وچ جنمے۔آپ دے والد دا ناں راج کپور سی جو انڈیا دے جانے مانے اداکار نیں تے ماں جی د ا ناں کرشنا راج کپور سی۔ آپ نے کیمپین سکول ممبئی تے میو کالج اجمیر توں پڑھائی کیتی۔راج کپور دی فلم شری 420 وچ آپ نے تِن ورھیاں دی عمر وچ بھاگ لیا سی۔آپ دی اداکاری دا سفر تِن ورھیاں توں شروع ہو چکیا سی پر جمدیاں سار ای راج کپور دی گودی وچ کھیڈدیاں ای آپ نے بہت کجھ حاصل کر لیا ہویا سی جس دا وکھالا " میرا نام جوکر" وچ ویکھن نوں ملد اے۔آپ نوں 1970 وچ " میرا نام جوکر" فلم وچ اک بال اداکار دے طور تے کم کرن اُُپر بیسٹ چائلڈ آرٹسٹ دا ایوارڈ دتا گیا۔

آپ دا ویاہ جانی پچھانی ہیرؤین نیتوں سنگھ نال ہویا، رشی کپور نے نیتو سنگھ دے نال بارھاں فلماں وچ کم وی کیتا اے۔ رِدھما کپور دِھی تے پُتر دا ناں رنبیر کپور اے۔

بوبی۔لیلیٰ مجنوں،عجوبا،قرض پریم روگ،نگینہ،چاندنی ،دیوانا،دراڑ تے ہور فلماں وچ آپ نے اپنیاں صلاحیتیاں نال ویکھن والیاں د ے دِلاں وچ گھر کر لیا تے فیر اجہیا ویلا وی ویکھیا سی کہ چاہن والیاں نے آپ دی فلم دی تانگھ رکھنی ہوندی سی اداکاری دے نال نال آپ نے ڈایرکٹر دے طور تے وی کئی کامیاب فلماں دِتیاں نیں جہناں وچوں "آ اب لوٹ چلیں"،" پریم گرنتھ" ذکر جوگ شامل نیں۔

رشی کپور نوں ہڈیاں دے گُودے دا کینسر سی جس دا علاج کئی ورھیاں توں چل رہیا سی پچھلے دیہاڑ اوہناں دی طبعیت وگڑن کر کے ممبئی دے ایچ این ریلائنس ہسپتال وچ داخل کروایا گیا جتھے اوہناں نے یارھاں گھنٹیاں بعد آخری ساہ لیا۔میرانام جوکر توں اپنی اداکاری دے سفر نوں شروع کرن والا رشی اپنے چاہن والیاں دے دِلاں وچ ہمیش رہوے گا۔۔۔۔۔۔