kraamaat@gmail.com
+ +92 333-430-6384


حکمرانو!ایہ سیاست دا نہیں سیوا دا ویلا اے


چاند شکیل April 30, 2020


حکمرانو!ایہ سیاست نہیں سیوا دا ویلا اے

چاند شکیل

کووِڈ 19کرونا وایرس پاکستان سنے دُنیا بھر دے دو سو توں ودھ ملکاں تیکر کھلر یا ہویا اے۔دُنیا بھر وچ کرونا توں متاثرا بندیاں دی گنتی30لکھ دے نیڑے تے موتاں دی گنتی ڈیڈھ لکھ توں ودھ گئی اے۔پاکستان وچ وی ایہ وایرس کھلردار جا رہیا اے۔ہُن تیکر پاکستان وچ ایس وایرس نال متاثر ہون والیاں دی گنتی 17ہزار توں ودھ تے موتاں 350توں ودھ گئیاں نیں جدوں کہ چار ہزار توں ودھ بندے تندرست ہو ئے نیں۔

پاکستان وچ ایس وایرس نوں لے کے سیاسی پارٹیا ں سیاست کر رہیاں نیں تے ایہ کوئی نویں گل نہیں اے ایس توں پہلاں جدوں وی ہڑھ یاں زلزلے آن کار لوکائی اُتے بنی سیاستداناں سنے ہور طاقتاں نے لوکائی نال جو کیتا اوہ وی تواریخ دے پنیاں اُتے لکھیا اے۔

پاکستان دے صوبا پنجاب، کے پی کے تے بلوچستان وچ تحریک انصا ف تے سندھ وچ پیپلز پارٹی دی حکومت اے جہنے سبھ توں پہلاں کرونا دے معاملے نوں ساہمنے رکھدے ہوئے صوبے بھر وچ لاک ڈاؤن کیتا جدوں کہ وزیراعظم عمران خان لاک ڈاؤن دی حمایت توں انکاری سن پر بعدوں پنجاب،کے پی کے تے بلوچستان وچ جتھے پی ٹی آئی دی ای حکومت اے اوتھے لاک ڈاؤن کیتا گیا۔پر وزیراعظم سندھ وچ تے لاک ڈاؤن دے خلاف سن اتے جتھے جتھے اوہناں دی حکومت اے اوتھے اوہناں لاک ڈاؤن بارے کوئی گل بات نہ کیتی۔ وزیر اعظم نے لاک ڈاؤن دی ہر وار ایہو آکھ کے مخالفت کیتی کہ ایہدے نال دیہاڑی دار لوک متاثر ہون گے۔اوہناں تے ایہ وی دعوا کیتا کہ ’احساس پروگرام‘ دے تحت ہُن تیکر دُنیا بھر دے مقابلے وچ سبھ توں ودھ پیسا پاکستان دے غریباں وچ ونڈیا گیا۔ اوہناں نے آکھیا کہ ’احساس پروگرام‘ دے تحت سبھ توں ودھ پیسے وی سندھ وچ گئے۔اوہناں آکھیا کہ 81ارب رُپئے ہُن تیکر اسیں ونڈ دتے نیں۔تے ایہ امداد اک کروڑ ویہہ لکھاں خانداناں تیکر چھیتی اپڑ جائے گا۔ایہدے وچ کوئی شک نہیں کہ وزیر اعظم ماڑے لوکاں لئی بہت چنگا کم کر رہے نیں پر اوہناں نوں چاہیدا اے کہ آپ سمجھن تے اپنے وزیراں، مشیراں نوں سمجھان کہ اوہ کرونا نوں لے کے سیاست نہ کرن۔ ایہ سیاست دا ویلا نہیں اے۔ ایہ لوکائی دی سیوا دا ویلا اے،سیاست تے ہوندی رہنی اے۔اُنج وی وفاق وڈا بھرا اے تے وڈے بھرا نوں وڈے پن دا ای وکھالا کرنا چاہید اے۔

دوجے پاسے گل کرئیے تے سندھ تے وفاق وچکار مسئلا لاک ڈاؤن تیکر ای نہ رہیا سگوں پیسے تے راشن ونڈن دے معاملے اُتے وی سندھ تے وفاق وچکار ڈاڈھے سیاسی اخلافات وکھالی دتے جو اجے وی جاری نیں۔ایس سارے معاملے اُتے وفاق تے سندھ دے نمایندے نہ بولدے ایہ کیویں ہو سکدا سی؟دوواں حکومتاں دے نمایندیاں ولوں اک دوجے اُتے لائے گئے الزاماں دے جواب دیندے ہوئے ایہو ای آکھیا جاندا اے کہ اسیں تے جواب دا جواب دتا اے، اسیں تے ایس روگ اُتے سیاست نہیں کر رہے۔ اسیں تے بس اپنا موقف لوکائی ساہمنے لیا رہے آں۔ پرلوکائی نوں اوہناں دے تنقیدی موقف اُتے کیہ لگے اوہ وچاری تے ہمیشا وانگ انج دے نااہل تے ناسمجھ ٹولیاں ہتھوں خوار ہو ئی۔

ایہ ویلا لڑ ن دا نہیں اے سگوں اِک ہون دا اے۔سیاستاں بعدوں وی ہو جان گیاں، بعدوں وی اک دوجے نوں گلمیوں پھڑیا جا سکدا اے پر ایس ویلے لوڑ، اے تے اوہ بس ایہو اے کہ اک ہو کے ایس روگ خلاف لڑیا جائے۔ایہ سبھ اودوں ای ہوئے گا جدوں اسیں آپسی وَیر بُھلا کے اگانہ ودھاں گے۔جہڑیاں قوماں اک ہوکے لڑدیاں نیں کامیابی اوہناں دا مقدر ہوندی اے۔

٭٭٭٭٭