یوم مئی تے پاکستان

یوم مئی تے پاکستان

الیاس عباسی

مئی دی ہرپہلی تاریخ نوں ایس گل داوکھالاکیتاجاندااے کہ اسیں مزدوراں نوں اوہناں دے حق دواواں گے تے کساناں ، مزدوراں نال ہوئے ظلم نوں روکن وچ اپنیاں کوششاں جاری رکھاں گے پوری دُنیاایس دیہاڑنوں بڑے جوش نال مناؤندی اے تے پوری دنیادے مزدوراکومُٹھ ہوکے سرمایادارتے کارخانےداردے ظلم اگے کھلون دی بہادری داوکھالاکردے نیں مزدوراں دی حالت وانگوں ، ایس دیہاڑدی تریخی حیثیت وی بہت ای ڈراونی اے جدوں امریکی شہرشکاگو دے مزدوراں نے اپنے حق لئی ، اپنیاں جاناں پیش کیتیاں اج ساری دنیااندر، اوہناں مزدوراں دی شہادت نوں یاد کردیاں ایس گل نوں دھرایاجاندااے کہ مزدوردے حقاں لئی جدوجہد نہیں رُکے گی وڈیاں طاقتاں دی بقاء ای ظلم تے اے اپنی ہوند نوں قائم رکھن لئی ایہ محکوم تے ماڑے طبقیاں دے استحصال وچ اگے اگے ہوندیاں نیں ایہوکارن اے کہ اجہیاں طاقتاں لُٹ مارویلے اک ہوجاندیاں نیں تے ایہناں داساتھ دین لئی سماج دے وڈے پیرتے مذہبی رہنماوی اکوکجھ ہوجاندےنیں سیاستداناں تے ہوئی سرمایاکاری نوں سُودسمیت واپس لین لئی ، اوہناں کولوں سرمایادارپالیسیاں بنائیاں جاندیاں نیں تاں زیاداتوں زیادافائداچُکیاجاسکے پاکستان ورگے ملک وچ ایہ لوکی گٹھ جوڑاُتے یقین رکھدےنیں ایسے لئی سانوں جہانگیرترین ورگے ،،سیاستدان،، وی دسدے نیں جہڑے الیکشن مہم دوران کروڑاں روپیا لاؤندے نیں فیراوسے اسمبلی راہیں سبسڈی لیندیاں کئی گناپیسا وصول کرنا، اپنا جماؤندراحق سمجھ دے نیں چینی سکینڈل نے ایس پول توں پرداچُک لتااے تے ایہ ساراکجھ اجہی جماعت وچکارہویاجہڑی لوکائی نوں ساوے باغ دکھارہی سی جیس نے انساناں تے سرمایاکاری ورگے نعرے لائے جہڑی جماعت کہندی سی کہ ساڈے کول جدوں حکومت آئی تے اسیں اجہیاں پالیسیاں بناواں گے کہ عام آدمی نوں فائداہووے گا سرمایاداراں دی کوئی نہیں سُنی جاووے گی شریفاں دی حکومت نوں چگھن دا اک کارن ایہ وی دسیاجانداسی کہ اوہ خود تاجرنیں سرمایاکارنیں ایسے لئی اجہے سیاست دان ملک دابھلا کویں کرسکن گئے لوکائی دی ماڑی حالت ای ، ایہناں دی طاقت داراز اے تے اجہے سیاسی چمکیلے نعریاں راہیں حکومت وچ آکے ، ہُن خان ہوری وی ایسے نظام دا شکارنیں تے سرمایاکاراں دے مفاد توں پرانہ کجھ نہیں کرسکدے ۔ ایہنے دے اختیاروچ اینا ای اے کہ خسروبختیارہوری چینی چوری کردے پھڑے جاون تاں اوہناں دی وزارت بدل دیو۔

کل نوں فیرایہو بنیے جنوبی پنجاب دے استحصال دا روناروون گے تے سیاسی نعریاں راہیں لوکاں دی ماڑی حالت توں فائداچُکدیاں فیرحکومتی دربارداحصاہوون گے سرکارداحصاہوندیاں ، ایہناں نوں اپنے علاقے دے کساناں تے مزدوراں دی ماڑی حالت نہیں دِسدی ایس منافقت بھری سیاست نوں چمکان لئی ضروری اے کہ ایتھے تعلیم تے سیاسی شعورعام ناں ہووے تے ایہداوکھالاسرکارولوں ، تعلیم تے خرچ کیتاجاون آلاپیساویکھ لو۔ یُواین او ولوں دسیاجاندااے کہ کسے وی ملک نوں اپنی جی ڈی پی دا%4 تعلیم تے خرچنا چاہیدااے تے جدوں داپاکستان بنیااے کسے اک حکومت ولوں وی اجہی کوشش نہیں ہوئی اج دی عمران خان دی حکومت وی پچھلیاں حکومتاں وانگوں ایس کھیتر وچ کوئی دلچسپی نہیں رکھ رہی سرکاربنان آلے وڈیرے ، جاگیردار تے سرمایاکارکویں چاہوون گے کہ خان ہوری انساناں تے خرچ کرن لئی بجٹ بنان اوہناں نوں سرکاربنان وچ اک پاسے جہانگیرترین داپیسا لگیاہویااے تے دوجے پاسے قریشی ہوری دی پیری دیاں کرامات نیں اجہیاں طاقتاں ساڈے وزیراعظم توں ودھ طاقت رکھدیاں نیں تبدیلی ناواں دی اے سماج وی اوہوای اے تے نظام وی اوہوای اے پاکستان داسیاسی نظام وچ جمود اے ایس نوں ودھان وچ ملک اندرلگے مارشل لا تے آمراں دیاں لوکائی دشمن پالیسیاں سن جہڑیاں اج وی اوسے طرحاں نیں۔ مزدوراں نوں سیاست توں دوررکھن دامقصد اوہناں دے حق تے ڈاکامارناسی تے سرمایاداردابھلاسوچنااے کئی ورھیاں تک سکولاں ، کالجان تے مزدوراں نوں سیاست تے اپنے حق لئی اواز اُچی کرن توں قانون راہیں ڈکیا گیا ایہ ساراجتن سرکارولوں کیتاگیا تے اج پاکستان دامزدور طبقے دااستحصال کسے توں لُکیاہویانہیں اے۔

ملک دی دولت 22 خانداناں توں کجھ ہورخانداناں تیکراپڑگئی اے پر عام بنداتے مزدوراج وی بھکھاسوندااے تے ایسے بھکھ پاروں انسان داایمان خطرے وچ پے گیا اے اج بھُکھ نوں مٹاون لئی سوانیاں نوں اپناجسم ویچناپیندااے ڈی ڈبلیودی اک ڈاکیومنٹری راہیں پتاچلدااے کہ خیبروچ کئی مُنڈیاں نوں روٹی کھاون لئی ، گھرداخرچاچلان لئی اپناجسم ویچناپیندااے بُھکھ نے پاکستان اندر سیکس دی انڈسٹری نوں ودھایااے۔ اج لاہورورگے شہراں وچ ہزاراں کُڑیاں اجہیا نیں ، جہڑیاں اپنا گھر چلان لئی ایس دھندے وچ نیں تے ایہدے لئی کسے لمی چوڑی تحقیق کرن دی وی لوڑ نہیں کیہ حقیقت توں مونہ پراں کرن نال ایہ سبھ کجھ جھوٹھ ہوجائے گا ؟

کارخانیاں وچ کم کرن آلیاں عورتاں نال ورتارا دس دا اے کہ مزدورداذہنی ، جسمانی تے معاشی استحصال ہورہیااے گھراں وچ کم کردے بچے تے عورتاں دی گھٹ توں گھٹ تنخاہ ارے کیہ قانون سازی ہوئی اے ساڈے سماج وچ گھراں وچ کم کرن آلیاں نوں کوئی عزت نہیں ایہناں تے ظلم کرن آلیاں وچ اوہ وی شامل نیں جہڑے ایس سماج وچ انصاف دین دے منصب تے بیٹھے ہوئے نیں اج لفظ ،،کم آلی ،، اک ٹیبوبن چکیااے تے ایہ ساراکُجھ اجہے ملک وچ ہوریااے جتھے دی حکمران جماعت دا ناں ،،تحریک انصاف،، اے جہڑی مدینہ دی ریاست بنان دادعوا بڑے ای مان نال کردی اے۔

کساناں توں سستاگناخریدن آلے سرمایادار، چینی دی قلت کرکے فیرایہنوں مہنگاویچدے نیں ایس مہنگی چینی نوں اوہ کسان وی لین تے مجبوراے جہڑاآپ سستاگنا ویچ رہیااے ایہ ساراکجھ اوہ کردے نیں جہناں ایہ سرکاربنائی تے ایہنوں طاقت اج دے درباری مُلاں تے پیردیندے نیں جہڑے کروڑاں دے گھر وچ رہندے نیں تے لکھاں دی گڈی وچ سفرکردے نیں تے لوکائی نوں سادگی تے صبردی نصیحت کردے نہیں تھکدے ایہناں نیں مذہب راہیں لوکاں دی خدمت گھٹ کیتی تے اوہناں دے حقاں لئی اواز کدی اُچی نہیں کیتی۔ کسے وڈے مُفتی نے ایہ فتوا نہیں دتا کہ گھر وچ کم کرن آلیاں دے وی حق ہوندے نیں اوہناں دی گھٹ توں گھٹ تنخاہ کِنی کوُ ہووے کسے نیں ایہ جُرئت نہیں وکھائی کہ سرمایاکار، فیکٹری مالک ماڑیاں داحق ناں کھوہن ۔ عام بندیاں دیاں گلاں کردے ایہناں کول ایہناں پیسا کتھوں آجاوندااے محلاں وچ رہن آلے ماڑیاں لئ کجھ وی نہیں کرسکدے سگوں ایہناں دے استحصال وچ ای ، ایہناں دی امیری اے۔

٭٭٭٭٭