kraamaat@gmail.com
+ +92 333-430-6384


"مسعود چودھری دا غزل سنگریہ "وَنّ سونّے دُکھ


خاص لیکھ May 02, 2020


مسعود چودھری دا غزل سنگریہ "وَنّ سونّے دُکھ"

مسعود چودھری اِک کہانیکار تے شاعر وجوں پنجابی اَدب وچ جانے پچھانے جاندے نیں۔آپ نے ادبی سفر دا مُڈھ 1960 دے دہاکے وچ پنجابی لکھاریاں دی سنگت وچ بیٹھن نال شروع کیتا جو اجے وی جاری اے ایس گل دا اظہار اوہناں نے ایس شعری پراگے دے مُڈھ وچ وی کیتا اے۔ایہ شعری پراگا اج دے جیون دی گل کردا اے تے اج دے جیون دیاں اوکڑاں تے لوڑاں تھوڑاں نوں موضوع بنایا گیا اے۔ شاعر نے گلشن دی علامت راہیں پتّے پتّے تے بوٹے بوٹے دی کہانی دسی اے اوہناں نوں چفیرے کھلری بارود دی بُو کسے طور وی پسند نہیں اے۔اج دے جیون دیاں گلاں دے نال نال عشق دا موضوع وی مسعود چودھری نے خوب نبھایا اے تے عشق نوں بیانن دا انداز روایتی اے تے محبوب وچ وی ساریاں گلاں روایت نال جُڑیا ں ای بیانیاں گئیاں نیں پر ایہناں نوں بیانن دا ڈھنگ مسعود چودھری دا اپنا اے تے جہدے وچ نواں پن ویکھیا جا سکدا اے۔اخلاق عاطف ایس شعری پراگے بارے اپنے وچار انج بیان کردے نیں:

"وَنّ سونّے دُکھ" وچ شامل غزلاں دی نِینہ اُس فکری حقیقت دی دس پاندی اے جس نوں سنجیدا فکر لکھاری ہمیش مُکھ رکھدے نیں تے ایہو حقیقت شناسی کسے وی سنجیدا فکر لکھاری دے فن نوں سپھل منزلاں ولے لے کے جاندی اے "ص۔14

پروفیسر اکرم سعید ہوریں آپ دی شاعری بارے انج گل کردے نیں:

" مسعود چودھری ہوراں دے شعر و ادب دا رن تے اندز دے وکھرا ہون تے ادبی دُنیا وچ اوہناں دی اپنی شناخت والے دعوے دا اک وڈا ثبوت ایہ وے کہ اوہ تنگ نظر مُلاں،متعصب پنڈتاں،گیاں گھاٹ سوچ دے دھارنی پادریاں تے کم ظرف باقی مذاہب دے ٹھیکے داراں ورگی سوچ نہیں رکھدے ۔اوہناں دی اکھ تعصب دی عینک لاہ کے صرف انسانیت دے ناتے ای لوکائی نوں ویکھدی اے تے بِنا کسے مذہبی ٹھیکیدار دے فتوے دی پرواہ نہ کیتیاں کھل کھلا کے آکھدے نیں:

ہندو،مسلم،سکھ،عیسائی سارے اِکو باغ دے پُھل

میرا مسلک انسانیت ،میں سبھناں لئی جینا واں"ص۔34

آپ نوں منظراں وچ راج کردی اُداس کردی اے تے اوہ اجہے پنچھی وانگ اُدنا چاہندے نیں جو پراں وچ اسمان نوں سانبھ کے رکھدے نیں۔

دل مندراں وچ سکون لبھن دی چاہ

"اوہدی دانش تے کیہ کراں تبصرا

انھیاں دی نگری وچ جو شیشے ویچدا"ص۔56

امن دے چاہیوان لکھاری تاں توپ دے مونہ وچ آلھنا بناون دی گل کردے نیں تاں جو بد امنی،جبر تے ظُلم نوں جڑھوں ای مُکایا جاوے تاں چنگا اے۔ مسعود چودھری نے اپنے شعراں راہیں امن تے اصلاح دا سنیہا دِتا اے ایس لئی جتن کرن ول پریردے نیں تے اوہ اپنے شعراں وچ اوہناں نوں نِنددے وکھالی دیندے نیں جو ذہناں وچ بیمار سوچاں نوں بھر رہیا اےجویں کہ اوہ کہندے نیں:

"ذہناں دی اصلاح لئی تلوار دے گیا

ذہنی بیمار،سوچ وی بیمار دے گیا"68

ایس غزل سنگریہ نوں فکشن ہاؤس ولوں چھاپیا گیا اے کُل صفحے208 تے مُل500 روپے اے۔ایہ کتاب اکتوبر 2019 وچ شایع ہوئی سی۔