پاکستان وچ اینی سَستائی؟ تے وکاؤ میڈیامہنگائی دا پراپیگنڈا کردا اے

پاکستان وچ اینی سَستائی؟ تے وکاؤ میڈیامہنگائی دا پراپیگنڈا کردا اے

جمیل احمد پال

3 مئی‘ ساری دُنیا وچ پرچاکاری دی ازادی دا دیہاڑ سی۔ پرچاکار ایس دن پک کردے نیں کہ اوہ ازادی تے ذمے واری دے نال پریشر گرپاں‘ تشدد کاراں تے ریاستی دباء توں بے خوف رہ کے لوکائی دے اطلاعواں تیکر رسائی دے حق لئی لڑدے رہن گے۔

خبرکاری اک عظیم تے شاندار کم ہون دے نال نال عجیب ”منحوس“ جہی چیز وی اے۔ ایہدی بنیاد منفی ہوندی اے۔ جہدی پوچھل توں کپڑا چکو‘ اوہی ناراض۔ نارمل حالات ہوون تاں اخبار واسطے خبر ای کوئی نہیں ہوندی۔ نرا حکمراناں دے بیان چھاپ کے اخبار نہیں چلایا جا سکدا۔ البتاجے بھچال آ جاوے‘ کوئی قاتل سو پنجاہ بندے مار چھڈے‘ دہشت گردی دی واردات وچ پنج سو بندے مارے جاون تاں سمجھو اخبار ویچن لئی چنگی سرخی مل گئی۔ (پاکستان دے پنجابی اخبار اجے ویچن دے ایس مرحلے تیکر نہیں اپڑے۔)

خبرکاری نال دُوجی گل ایہ اے کہ ایس شعبے وچ بندے دے اعصاب مضبوط ہونے چاہیدے نیں۔ کسے دباء‘ کسے دھمکی‘ کسے خوف‘ کسے لالچ وچ پھس گیا تاں سمجھو گیا۔ ایسا بندا اخبار دے کم دا نہیں رہندا۔ لالچ وچ آ جاوے تاں کاروباری ہو جاندا اے‘ اخبارچی نہیں رہندا۔ ایس شعبے وچ کوئی نشے ورگی چیز وی اے۔ لوک اپنے پیشے تے کاروبار بدل لیندے نیں۔ پرچاکار مر کے ای ایس کھیتر وچوں باہر نکلدا اے۔ کدی نہیں سُنیا کہ کسے پرچاکار نے پرچاکاری چھڈ کے دال چاول دی ریڑھی لا لئی ہووے یاں سبزی دی آڑھت شروع کر دتی ہووے۔ پچھلے دنیں اردو میڈیا نے ہزاراں بندیاں نوں نوکریوں کڈھ دتا۔ بھُکھے مر رہے نیں پر مجال اے کسے ہور پاسے مونہ کرن۔

پرچاکاری دی اہمیت پاروں ملک دشمن عناصر وی ایس شعبے نوں نشانا بناندے نیں‘ پرچاکاراں نوں خریددے نیں تے اوہناں دے ذریعے اپنیاں ملک دشمن سرگرمیاں نوں اگے ودھاندے نیں۔ ایسے پاروں ای تے سوشل میڈیا اُتے میڈیا بارے ون سونیاں گلاں نظر آوندیاں نیں۔ پرچاکاراں واسطے ”بکاؤ صحافی“ دی اصلاح تے تسیں سُنی ویکھی ای ہووے گی۔ کتے والا کارٹون وی ویکھیا ہووے گا جو ہڈی مگر نس رہیا اے۔

ایہناں ای ”بکاؤ صحافیاں ”پاروں ایہ گل عام کیتی جاندی اے کہ دیس اندر مہنگائی بہت اے تے غریب آدمی بھُکھے مر رہے نیں۔ میں دعوے نال کہنا آں کہ دیس اندر سبھ وستاں نہ سہی‘ کجھ چیزاں تے بہت ای سستیاں نیں۔

کسے نیوز ایجنسی ولوں اک تصویر آئی اے‘ گورنر سندھ دے فوکل پرسن محسن گھمن ہوری رخسار نامی کڑی دے والد نوں پنجاہ ہزار دا چیک پیش کر رہے نیں۔ 9سال دی رخسار نوں حیدرآباد دے جی او آر علاقے وچ گینگ ریپ دے بعد قتل کر دتا گیا سی۔ میں دو واری پڑھیا‘ کدھرے میں غلط نہ پڑھ رہیا ہوواں۔ چیک پنجاہ لکھ دا نہیں‘ پنجاہ ہزار دا ای اے۔ ایس حاتم طائیے عمل دی فوٹو وچ ویکھو تاں فوکل پرسن تے کڑی دا پیو دوویں شاید پھوڑھی اُتے بیٹھے نیں۔ مشیر ہوراں دی ٹھوڈی اُتے کرونا پاروں کالے رنگ دا ماسک وی اے۔ (کالا رنگ شاید ”سوگ“ پاروں)۔ کڑی دے پیو دے چہرے اُتے اوہ ازلی بدقسمتی اے جہڑی ایس خطے دِیاں کڑیاں دے پیوواں اُتے ہزاراں سال توں نظر آوندی اے۔ 9سال دی جہڑی کڑی نوں گینگ ریپ دے بعد قتل کر دِتا جاوے‘ اوہدے پیو کول باقی کیہ رہ جاندا اے؟ کیہ ایسے پیو نوں زندا آکھاں گے؟ کرونا وباء وچ مرن والے تاں شہید مِتھے گئے نیں‘ گینگ ریپ دے بعد مارے جان والے بچے تے بچیاں نوں کیہ آکھاں گے؟ مقتول؟ مرحوم؟ کہ شہید؟

پتا نہیں ایہ 50ہزار دی خطیر رقم‘ جہڑی کسے عام پروار لئی مہینے ڈیڈھ دا خرچا ہوندی اے‘ وزیر اعلا ولوں کس کھاتے وچ پیش کیتی گئی اے؟ مقتول دی خون و گائی اے‘ گینگ ریپ دا مُل اے‘ زبان بند کرن لئی دِتی گئی اے یاں فیر ایویں مہربانی دے اظہار لئی اے۔ پنجاہ ہزار رُپیا غریباں لئی وڈی چیز اے۔ دیس اندر روز ای تے نکے بال ریپ تے قتل ہوندے نیں۔ جے حکومت ہر اجہے بچے دے ماپیاں نوں پنجاہ پنجاہ ہزار دین لگ پوے تاں ادھا بجٹ تاں ایتھے ای مُک جاوے۔

مینوں یاد نہیں‘ جدوں ریمنڈ ڈیوس نے بارونق شہر لاہور وچ سڑک اُتے دو قتل کر دتے سن تاں خون وگائی کیہ دِتی گئی سی۔ اینا یاد اے‘ اوہ کروڑاں وچ سی۔ تے ایتھے 9 سال دی بچی دی عزت تے زندگی دوہاں دا مِل؟ لکھاں وی نہیں‘ صرف ہزاراں ……

ملک دشمن غلط کہندے نیں کہ پاکستان وچ بہت مہنگائی اے۔ بعض چیزاں تے بہت ای سستیاں نیں۔ عام انسان‘ اوہدی عزت‘ اوہدی زندگی۔ البتا لوک بہت لالچی نیں۔ سو دیو تاں ہزار چاہندے نیں‘ ہزار دیو تاں لکھ‘ لکھ دیو تاں کروڑ اُتے ایہناں دی نظر ہوندی اے۔ لالچی کسے پاسے دے۔

رخسار نوں میں اینا ای کہنا سی‘ تیری عزت تے جان دوہاں دا مُِل پنجاہ ہزار پے گیا۔ اینا وی نہ پیندا تے توں کیہ کر لینا سی؟

البتا جے تینوں زیادا پیسے چاہیدے سن تاں بہتر سی امریکیاں ہتھوں گینگ ریپ تے قتل ہوندی۔ پیسے کافی زیادا مِل جانے سن۔

٭٭٭٭٭