kraamaat@gmail.com
+ +92 333-430-6384


پنجاب وچ اک کروڑ بارھاں لکھ بندے بے روزگار ہو سکدے نیں: ایشین ڈویلمپنٹ بینک۔۔۔٭رویل نیوز٭


نمائندا رویل May 07, 2020


لاہور (نیوز رویل) ایشین ڈویلمپنٹ بینک (اے ڈی بی) نے پنجاب بارے اِک تہلکا خیز رپورٹ جاری کیتی اے جہدے وچ کہیا گیا اے کہ صوبے وچ 1 کروڑ 12 لکھ بندے بیروز گار ہو سکدے نیں۔ رپورٹ وچ کہیا گیا اے کہ کرونا وایرس نال پنجاب نُوں 23 کھرب رُپئے دا نقصان ہووے گا‘ پنجاب سرکار نے وزیراعظم سیکرٹریٹ نُوں رپورٹ گھل دِتی اے۔ عمران خان نُوں پیش کیتی گئی رپورٹ وچ ایشین ڈویلپمنٹ تے پاکستان انسٹیٹیوٹ آف ڈویلپمنٹ دے نویں ہوش اُڈا دین والے آنکڑے ساہمنے لیاندے نیں۔ پنجاب وچ 3 درجے دے لاک ڈاؤن ہون نال صوبائی معیشت نُوں ہون والا نقصان کنا ہووے گا؟ مکمل لاک ڈاؤن کرن نال 23 کھرب‘ درمیانے درجے دے لاک ڈاؤن نال صوبائی معیشت نُوں 11 کھرب 10 کروڑ جد کہ معمولی درجے دے لاک ڈاؤن نال صوبائی معیشت نُوں 1 کھرب 43 ارب رُپئے دا نقصان ہووے گا۔ رپورٹ وچ کہیا گیا اے کہ مکمل لاک ڈاؤن کرن نال 1 کروڑ 12 لکھ بندے‘ درمیانے درجے دے لاک ڈاؤن نال صوبے وچ 90 لکھ 30 ہزار بندے جد کہ معمولی درجے دے لاک ڈاؤن نال 10 لکھ 80 ہزار بندے بیروزگار ہون دا دھرُکو اے۔ نویں رپورٹ مطابق پنجاب وچ غربت ودھن دا دھرُکو 54 فیصد ظاہر کیتا گیا اے‘ مکمل لاک ڈاؤن ہون نال صوبے وچ غربت 34.3 فیصد ودھ سکدی اے۔ درمیانے درجے دے لاک ڈاؤن نال غربت 19.9 فیصد ودھن دا دھرُکو ظاہر کیتا گیا اے۔ معمولی درجے دے لاک ڈاؤن نال غربت 9.4 فیصد ودھ سکدی اے۔