اج دا دِن

اج دا دِن

احمد نعیم ارشد

اج دا دِن ہے اوس ماں لئی
جِہڑی ماں نے پُتر دے لئی
ساری زندگی چُپ چپیتی
تِکھے سورج دی دُھپ پیتی
سینے تے اِک پتھر رکھیا
بلڈوزر دا دھواں پَھکیا
نویاں سڑکاں نوں جس ماں نے
لُک وچ مُڑھکا پا کے دِتا
سارا دن مزدوری کرکے
ٹھیکیدار دی ہر اِک خواہش پوری کرکے
حق حلال دا رزق کمایا
چھاتی دے وِچ دُدھ بنا کے
جِس پُتر نوں رج پلایا
اج اوہ پُتر
چرس دے گھوڑے اُتے بہ کے
پاؤڈر دی خُشبو دے پِچھے
اینٹی نارکوٹکس دے منہ تے
چِھتر مار کے دوڑ گیا اے

اج دا دن ہے اوس ماں لئی
اوس ماں لئی.............!

٭٭٭٭٭