اسمبلی اجلاس وچ سیاسی تقریراں  نال ویلا ضایع کیتا جا رہیا اے،صرف اک دوجے اُتے الزام لائے جا رہے نیں:فواد چودھری۔۔۔٭رویل نیوز٭

اسلام آباد (نمائندا رویل) وفاقی وزیر سائنس و ٹیکنالوجی فواد چودھری نے کہیا اے کہ اسمبلی اجلاس وچ صرف سیاسی تقریراں ویلے دا ضیاع اے‘ سیاسی تقریراں تے پریس کانفرنس کر کے وی کیتیاں جا سکدیاں نیں۔ ٹویٹر بیان وچ وفاقی وزیر دا کہنا اے کہ اوہناں نے ڈپٹی سپیکر قومی اسمبلی قاسم سوری نُوں خط لکھیا اے جہدے وچ اوہناں نے کہیا اے کہ ممبران نُوں اکٹھا کیتا اے تے پہلے اوہناں نُوں سائنٹسٹ تے وائرولوجی ماہرین توں بریفنگ دلوان کہ کرونا وایرس ہے کیہ؟‘ بریفنگ دلوان کہ کرونا وایرس کھلر کیوں رہیا اے‘ ایہدے اُتے ریسرچ کہڑی سٹیج اُتے اے‘ دنیا کدوں تک ایہدا علاج لبھ سکدی اے؟ بریفنگ دلوان کہ 5 پاکستانی یونیورسٹیاں کرونا دی ساخت اُتے سٹڈی کیتی اے‘ اوہناں دی ریسرچ کیہ کہندی اے؟ ایہو جہے اجلاس دا کیہ فایدا کہ اِک ایدھروں سیاسی تقریر کردا اے‘ دوجا اودھروں نِشتر چلاندا اے‘ اللہ اللہ خیر صلا۔