سلیم ملک دا بے گناہی ثابت کرن لئی آئی سی سی  جاون دا فیصلا٭پی سی بی توں انصاف نہ مِلیا تے سبھ کجھ ساہمنے لے آواں گا: سلیم ملک۔۔٭رویل نیوز٭

لاہور (نیوز ڈیسک) پچھلے کپتان سلیم ملک دا کہنا اے کہ پاکستان کرکٹ بورڈ اوہناں نُوں انصاف نہیں دیندا تے اوہ سبھ کجھ ساہمنے لے آن گے۔ فکسنگ ایشو دُبارا چُکے جان دے بعد پی سی بی نال رابطے اُتے سلیم ملک نے کہیا کہ وار وار رابطے دے باوجود پیس ی بی ولوں کوئی جواب نہیں مل رہیا۔ جے پی سی بی نے انصاف نہ دِتا تے میرے کول آئی سی سی وچ جان دا راہ کھُلّا اے۔ جے بورڈ انصاف نہیں دیندا تے میں سبھ کجھ ساہمنے لیاواں گا۔ میں کسے دے خلاف نہیں آں تے نہ ای میں کدی کسے دا ناں لیا اے۔ میں شروع توں کہندا آ رہیا آں کہ جسٹس قیوم دی رپورٹ پڑھو۔ ہُن لوکاں نے ایہ رپورٹ پڑھی اے تے سمجھ آئی اے۔ وسیم اکرم بارے سلیم ملک نے کہیا کہ وسیم اکرم نے کدی میرے توں کجھ سکھن یاں پُچھن دی خاہش نہیں کیتی‘ ایس لئی میں آپ اوہناں نُوں کجھ دَسیا نہیں۔ شروع توں عادت رہی اے کہ جدوں تک کوئی مشورا نہ منگے بلا وجھا تے بغیر پُچھے کسے نُوں مشورا نہیں دیندا۔