نبیلہ احمد دیاں تِن نظماں

نبیلہ احمد دیاں نظماں

میں نہ لخنی
نہ شکایت کرنی آں
پر جیڑے تسآں کی خوش کرنے نی کوشش کرنین
انہآں کی تسآں زیادہ آزمائی تہ
انہآں کی تڑوڑی تہ
اپنے وی گمائی تہ
کہہ حاصل کرنے او؟
اگر تسآں کی لغنا اے
کہ او تسآں نے ہونے
تہ ہارنے نی سن
تہ تسآں نی سوچ غلط اے
او تہ ہمیشہ تسآں نے اے سن
تہ ہمیشہ رہسن
پر انسان ان
خطا تسآں انہآں نے وجود نا حصہ بنایا اے
میں نہ لخنی
نہ شکایت کرنی آں
٭٭٭٭٭
امی، پلیز بئی جاو

جی پتر، کہہ غل اے؟

امی، خالا فوت ہوئی گین

تہ پتر فر بئی کہ جاں، اٹھو انہاں نے کہاڑ جلاں

(سر سٹی تہ)
امی صرف دس بندے جائی سکنین

تہ ماری پین اے، میں تہ انہآں دس بندیاں وچ شامل آں

(نظرآں قاسم پر بائی تہ، دھیمی وازے وچ)

امی، اے بیماری دسنی کوئی نی، تہ بخشنی وی کسے کی نی

امی نظرآں قاسم پر جمائی شوریآن۔ او تہ چار سال پہلے اس نے آپریشن نے واری آئے سن۔ قاسم وچ تہ انہاں نی جان سی

خاموشی نال بئی گے

چل ماریے سونیے پہنے، تکی اتھوں بیئ تہ ہی قتا اللہ نے والے

قاسم اچھی گدا وچ بیئ گیا

بیجی کیاں رونے او؟

مارا سونا بچہ، میں کوئی نا رونی۔ او بیجی تواری ایویں وی بڈی سی۔ مرنا تہ اے ای نا

٭٭٭٭٭

مڑے غلط رقعے لکھن
ڈرے نال کڑیاں کی چانے پین

سارے زور نال بولو
کڑی ہی اییے جی اے

ھتھ چاچے، مانوے لایا اے
کڑی روئی روئی چپ نی کرنی

سارے زور نال بولو
کڑی ہی اییے جی اے

مڑے کی الف بے نی اشنی
نہ شکل چنگی، نہ بصف چنگے، نہ دل
کڑی مکڑی گئی اے

سارے زور نال بولو
کڑی ہی اییے جی اے

نہ اٹھنیاں بہنیاں ٹوئی
نہ کھانے لانے نہ صواد
سویرے توں شامی تک طعنیاں نال سلی وی
دل ترٹی ہوئی کڑی پیکے مری آئی اے

سارے زور نال بولو
کڑی ہی اییے جی اے

چار آپریشن کرائی رہیئ اے
اللہ کی ترس نی آیا، پر ڈاکترآن آپریشن کڑی شوریا اے
ساوریاں پوری کڈی اے باہر
انہاں نے پترے کی وارث چاہنا اے

سارے زور نال بولو
کڑی ہی اییے جی اے

کڑے آلا تے مری گیا ایس
دھیرے نال بیاہ توں مکڑنی اے
فلانا پڑاہ بڑے مندے کرنا ایس

سارے زور نال بولو
کڑی ہی اییے جی اے

پورے ڈیڑے نہ زہر چلی چلی تہ
جلے کلیجہ کھان گیا اے، دل پھٹی گیا اے
جلے پاگل ہون نغی اے
تہ ساوریاں کولوں بھک ہوئی گئی اے

سارے زور نال بولو
کڑی ہی اییے جی اے

پوری زندگی اییے نعرے لاے
جلے وی کسے نی تیو نی غل بجی
اج اپنے کہار ساریاں آئی گیاں نان
ہن لوک اسآں نیاں بچیاں کی تکی تہ آخنین

سارے زور نال بولو
انہاں نیاں کڑیاں ای ہی اییے جیاں نے

٭٭٭٭٭