ونگ تے وِینی دا رِشتا۔۔۔۔۔۔۔

ونگ تے وِینی دا رِشتا۔۔۔۔۔۔۔

بالپن دا اوہ ویلا کویں بُھل جاوے جدوں ساریاں سکھیاں مِل کے بیٹھدیاں سن تے ونگ دا اِک ٹوٹا پھڑ کے اوس نوں متھے،ٹھوڈی،سجی گلھ تے فیر کھبھی گلھ تے لاندیاں کہیا جاندا سی

اَتّ

مَتّ

قلعی

گھلہت

میرا تے۔۔۔۔۔ دا کِنا کُو پیار

بعدوں ونگ نوں بھنّ کے تَلی تے رکھ کے توڑیا جاندا تے جدوں دو ٹکڑیاں وچکار والا نِکا جہیا ,ماسا جہیا ٹوٹا ہوندا اوس نال پیار نوں ناپیا جاندا۔ونگاں نوں چُوڑیاں،بنگڑی تے بنگڑی توں ای بنیا لفظ بینگل وی کہیا جاندا اے۔بنگڑی مراٹھی زبان دا لفظ اے، پشتو تے بلوچی وچ وی بنگڑی ای کہندے نیں جد کہنیپالی وچ چُوڑا تے اُردو یاں ہندی وچ چُوڑی تے پنجابی زبان وچ ونگاں کہیا جاندا اے۔مِٹی دیاں ونگاں وی بنائیاں جاندیاں سن ایس توں پِتل،تانبا،لوہیا،سونا،چاندی،کچ،لکڑ دیاں ونگاں دے نال نال اجوکے سمے پلاسٹک دیاں ونگاں وی بڑیاں عام نیں۔

برصغیر وچ پرانیاں سمیاں توں سوانیاں ونگاں پاندیاں آ رہیاں نیں سولاں سنگاراں وچوں اک سنگار ہوون دے نال نال ایس دی اک سائینٹیفک وجھا وی سی تے اوہ وجھا سی سوانیاں دی صحت دا دھیان رکھنا جویں باقی سنگاراں وچ وی کئی بھیت لُکے ہوئے نیں ایہدے وچ وی کئی بھیت نیں۔ونگاں وِینی نال رگڑ کھاندیاں رہندیاں نیں جو اوس نوں کمزور ہوون توں بچاندیاں نیں ا تے ہڈیاں دی مضبوطی دا وی کارن بن جاندیاں نیں۔دوجی اک ہور خوبی ایہ وی اے کہ ونگاں دی رگڑ نال خون دی گردش ٹھیک رہندی اے جہڑیاں سوانیاں ونگاں پاندیاں نیں اوہناں نوں بلڈ پریشر نہیں ہوندا تے اوہ تگڑیاں رہندیاں نیں،اوہناں دے گُٹاں وچ طاقت وی بھری رہندی اے۔ہڑپا دی تہذیب اندر وی اجہیاں سوانیاں دے بُت لبھے نیں جہناں نے باقی گہنیاں دے نال نال ونگاں وی پائیاں ہوئیاں سن۔اک تاں اوس ویلے دی فنی کاریگری دا وی پتا چلد ا اے تے نال نال شوقین مزاجی دا وی وکھالا ہوندا اے۔

2600قبل مسیح دا جہڑا سوانی دا بُت ملیا اے اوس دی کھبھی بانہ تے ونگاں پائیاں ہوئیاں نیں،بنگال تے اُڑیا دیاں سوانیاں سمندری گولہ نوں وی ونگ وانگ بنا کے وِینی وچ پاندیاں سن انج صرف ویاہیاں سوانیاں ای کر سکدیاں سن تے کئی تھاواں تے اجے تیکر وی ایہ ای رواج قایم اے۔اج وی کئی تھاواں تے بنگالی بینگل دے ناں ہیٹھ خاص قسم دے سونے دیاں ونگاں نوں ویچیا جاندا اے جو پُوری دُنیا وچ مشہور نیں۔

راجستھان وچ ویاہیاں تے کواریاں دیاں ونگاں دا رنگ وکھ وکھ ہوندا اے گُٹ توں لے کے موڈھے تک جہناں نے ونگاں پائیاں ہوندیاں نیں اوہناں دی پچھان وکھری ہوندی اے تےگُٹ توں ارک تک جہناں نے ونگاں پائیاں ہوندیاں نیں اوہ وکھری پچھان رکھدیاں نیں۔کجھ لوکاں دا مننا اے کہ ایہ ونگ پانا وی نتھ پاون وانگ کسے نوں غلامی ول دھکیلنا ہوندا اے ؛ایسے لئی جدوں کسے سوانی دا گھر والا مردا تاں اوہ ونگاں توڑ دیندی کہ ہُن اوس دی غلامی مُک گئی پر دوجا نظریا ایہ اے کہ ایس نوں سہاگ دی علامت وجوں ورتیا جاندا اے تے جس سوانی دا سہاگ اُجڑ جاوے تاں اوہ اپنیاں ونگاں نوں بھنّ دیندی اے۔خالی بانہ نوں چنگا شگن نہیں مِتھیا جاندا اے۔ہندوواں دا تے ایہ وی عقیدا اے کہ روحانی طاقت لئی ونگاں ضروری نیں ایس لئی اوہناں دے سنت سادھوواں نے وی ونگا ں پائیاں ہوندیاں نیں۔

جنگل وچ وسدیاں کسے نے ٹُردیاں ٹُردیاں جدوں رُکھ دی لچکیلی ٹہنی نوں پھڑیا ہونا تے اوس نوں مروڑ کے اپنی وِینی وچ سجا لیا ہونا یاں مٹی نوں گو کے اوس نوں اپنے گُٹ تے ول لیا ہووے گا ایس لئی جہڑی پہلی ونگ ہونی اوس نوں فطرت توں وکھ نہیں کیتا جا سکدا۔کواریاں کُڑیاں نوں ماپیاں،ماسیاں،پُھپھیاں ولوں تحفے دے طور تے ونگاں دینا ساڈے سماج دی اک سوہنی رِیت اے،عیداں تے شبراتاں واسطے ایہ ضروری گہنا اے ہر نِکی یاں وڈی عمر دی سوانی نے ونگاں نوں ضرور وِینی وچ سجایا ہوندا اے۔ویاہواں شادیاں تے وِینی نوں ونگاں نال ای سجایا جاندا اے ایہناں موقعیاں تے شوخ بھڑکیلے رنگاں والیاں ونگاں پسند کیتیاں جاندیاں نیں سوانیاں اپنے سُوٹ یاں دُپٹے نال دے رنگ دیاں ونگاں پانیاں پسند کردیاں نیں۔چُوڑا،اِک توں چوّی تک دی گنتی اُکری ہوندی سی تے ایہ ویاہواں واسطے خاص تیار وی کروایا جاندا سی۔سِکھاں وچ کُڑی والے مُنڈے نوں کَڑا تحفے وجوں دیندے نیں جو لوہے،چاندی یاں سونے دا بنیا ہوندا اے۔ونگاں دیاں وی کئی قسماں ہوندیاں نیں جویں کہ جڑاؤ بینگل ایس نوں کُندن وی کہیا جاندا اے،لاخ بینگل ہوندیاں تاں پتلیاں جہیاں نیں پر ایہناں نوں وزنی کرن لئی ایہناں وچ لاخ بھری جاندی اے۔مِینا کاری بینگل ایہ اجہیاں ونگاں ہوندیاں نیں جہدے اُتے سنہری رنگ دی ڈیزائننگ اندر والے حصے تے کیتی گئی ہوندی اے۔ہوندی تاں اندر والے حصے تے اے پر نظر باہر نوں آندی اے جہدی وجھا توں ونگ تے وِینی سوہنی لگن لگ پیندی اے۔

سولاں سنگار دا اک لازمی حصا ونگ نوں وکھ وکھ رنگاں وچ سجایا جاندا اے تے ایہناں وکھ وکھ رنگاں وچ وی کجھ لُکیا ہویا اے جویں کہ سبز رنگ دیاں ونگاں ودھن پُھلن تے زرخیزی دی علامت اے،لال رنگ طاقت تے خُشحالی واسطے،پیلے رنگ دیاں ونگاں دا مطلب ہوندا اے خُشیاں دا مُڈھ،چِٹیاں ونگاں علامت ہوندیاں نیں جیون دے نویں مُڈھ واسطے،سونے دیاں ونگاں دولت تے خشحالی دی علامت نیں۔