سمارٹ فون ڈیولپرز  دا دعوا٭کرونا ٹیسٹ کرن والی موبائل ایپ دی تیاری ۔۔۔٭رویل نیوز٭

لاہور (نمایندا رویل) سمارٹ فون ڈیولپرز نے دعوا کیتا اے کہ اوہ چھیتی ایہو جہی موبائل ایپ تیار کرن والے نیں جہڑی ڈیوائس دے اندر اِک مائیکرو فون استعمال کرکر ساہ لین دی اواز وچ ہون والی تبدیلی دا جایزا لے کے کرونا وایرس دی تشخیص کر سکے گی۔ یونیورسٹی آف پٹسبرگ دے کھوجکاراںدا کہنا اے کہ جے ایہ تجربا کامیاب ہو گیا تے فیر اوہناں دی تحقیق نال ایہ فایدا ہووے گا کہ بہت ای گھٹ خرچے وچ پوری ابادی دا ٹیسٹ کر کے وایرس لاحق ہو ون دا پتا لایا جا سکے گا۔ ایہ ایپ حالے منصوبا بندی دے مرحلے وچ اے‘ ایس لئی ایپ سٹو وچ ایہدی دستیابی وچ حالے کجھ ویلا لگے گا۔ ٹیم دا کہنا اے کہ پہلے اِک نویں صوتی لہر دی قسم ڈیزائن کرنی اے۔ ایس ٹیکنالوجی وچ مصنوعی ذہانت نُوں استعمال کر کے آن والی انسانی ائر ویز دی اواز دا جایزا لے کے ایہ اندازا کیتا جاوے گا کہ کیہ ایہ کرونا وایرس دے روگیاں دی اواز نال رلدی اے یاں نہیں۔