آؤ رَل کے حیاتی نوں حیاتی دان کریئے

آؤ رَل کے حیاتی نوں حیاتی دان کرئیے

دِلشاد کسانہ

حیاتی اللّہ دی دین اے جہڑی صرف اِک واری ای ملدی اے۔ ایس لئی ایس انملّے تُحفے دی قدر کرنا تے بھر پور اَنگ نال جینا ای انساناں دا شیوا تے پہلا فرض اے۔ درحقیقت جدوں اسیں حیاتی دے مقصد نوں جان لیندے آں تے فیر سانوں احساس ہوندااے کہ ساڈی تے دوجیاں دی حیاتی دے سارے ای رنگ قابلِ قدر نیں۔ ایس وجھا پاروں ایہناں دی چمک نوں برقرار کھنا ساڈا پہلا فرض اے۔

جے اسیں ایس دُنیا وچ حیاتی دی حقیقت تے غور کرئیے تے ایہ سانوں سسکدی ہوئی نظریں آؤندی اے۔ حیاتی پھٹّر ہو چکی اے تے ایہ ہر واری ہو رہی اے، پر اسیں اپنی مستی اِچ مگن ایس قدر لاپرواہی دا وکھالا کردے آں کہ ایس تے گوہ ای نہیں کردے۔حقی گل تے ایہ وے کہ حیاتی جادو ٹونے دی کیفیت دا ناں اے۔سویرتوں شام ہوون تیکردا سفر کسے طلسماتی دنیا دی سیر جہیا ای تے ہے ”کُھل جا سم سم“ دی واج دے نال اِک جادو نگری اِچ داخل ہونا تے فیر غار دا مونہ بند ہوون تیکر پیر پیر تے شعبدہ بازی دے ہزاراں مظاہریاں دا مشاہدہ کرنا ای ایس حیاتی دے سفر دا خاصا بن چکیا اے۔ حیاتی دا قافلا جے کر خوبصورت موڑ تے آکے رُکے تے حیاتی خوبصورت،جے نہ رُکے تے حیاتی بوجھ بن جاندی اے، ایس ای سلسلے وچ چلدے چلدے اسیں ساری حیاتی لنگھا دیندے آں تے آخر اِچ ساڈا حال غالب دے ایہناں شعراں جہیا ہو جاندا اے:

نہ تھا کچھ تو خدا تھا، کچھ نہ ہوتا تو خدا ہوتا

ڈبویا مجھ کو ہونے نے،نہ ہوتا میں توکیا ہوتا

ہوا جب غم سے یوں بے حس تو غم کیا سر کے کٹنے کا

نہ ہوتا گر جُدا تن سے تو زانو پر دھرا ہوتا

ہوئی مدت کہ غالب مر گیا پر یاد آتا ہے

وہ ہر اِک بات پر کہنا کہ یوں ہوتا تو کیا ہوتا

ایہ گوہ گوچرا اَنگ اے کہ ساڈی سوچ نہیں سگوں ساڈے عمل ساڈی حیاتی بناؤندے نیں۔ ایس لئی ایس حیاتی نوں بناون لئی حیاتی دا تحفظ انت لوڑیندا اے۔پر صرف اپنی ای حیاتی دا تحفظ نہیں سگوں دُوجیاں دیاں حیاتیاں دا تحفظ وی ساڈامڈھلا فرض اے۔ ہن سوال ایہ پیدا ہوندا اے کہ ساڈی ای حیاتی محفوظ نہیں تے فیر اسیں دوجیاں دیاں حیاتیاں نوں کِنج تحفظ دے سکدے آں؟پر میں ایہ کہندا آں کہ روشنی نوں ویکھن لئی اکھاں کُھلیاں رکھنیاں پیندیاں نیں،بند اکھاں نال روشنی ویکھی نہیں جا سکدی۔ایس لئی حیاتی نوں تحفظ دین لئی سانوں اپنیاں اکھاں کھلیاں رکھنیاں ہوون گِیّاں۔سانوں ویکھنا ایہ ہے کہ حیاتی کتھے کتھے ساڈی وجھاپاروں تباہی تے بربادی دا شکارہو رہی اے۔ کُھلیاں اکھاں ای بیداری پیداکردیاں نیں،فیربیداری ارتقاء اِچ تبدیلی دی وجھا بن دی اے۔دُنیا دی

موجوداحالت ملاوٹ،جنگ وجدل،تباہی،بربادی،دہشت گردی تے قتل و غارت تے مبنی اے۔

ایہ حقیقت اے کہ اسیں وی ایس صورت حال وچ برابر دے شریک آں تے ساڈے اندر وی ایس سلسلے دی کشمکش دی سرد جنگ

چل رہی اے پر سانوں ایس سرد جنگ نوں ختم کرنا اے۔سوال فیر توں اک واری اپنا سِر چُکدا اے کہ سرد جنگ کویں ختم ہووے گی؟ایس دا ساد ا جہیا جواب ایہ ہے کہ اگر اسیں اپنیاں سوچاں تے روّیاں دی تربیت کر لیئے، نفس تے قابو پا لیئے تے فیر سانوں اپنے توں وکھ دنیا اِچ وسن والی ہر اِک حیاتی ای خوبصورت نظریں آوے گی۔اِنج ساڈے اِچ احساس ذمہ داری دی تحریک پیدا ہووے گی تے اسیں ”جیو تے جینے دو“ دی راہ اپنا کے ہر پاسے حیاتی ای حیاتی ویکھن دے قابل ہو جاواں گے۔

جی ہاں! سانوں حیاتی دے وادے تے روشنی ویکھن لئی اپنے دل تے دماغ نوں جگانا تے ہلانا ہووے گا۔ لکھ ہتھاں نوں چُک چُک کے دُعاواں منگیئے،تبدیلی لیاؤنی اے تے سانوں ایہناں نوں حرکت اِچ لیاؤنا ہووے گا تے ایہناں دی سرد جنگ نال نبڑنا ہووے گا۔

آؤ عزم کرئیے کہ اسیں سارے مل کے حیاتی نوں تحفظ دیواں گے تے جِتھے جِتھے حیاتی انساناں دی وجھاپاروں بے رنگ،بے مقصد تے بے جان ہو رہی اے اسیں اُتھے حیاتی دے رنگ تے حیاتی دی حقیقی رونق واپس لیاواں گے۔

٭٭٭٭٭