کیہ وباء نے حکومتاں نال وعدا کیتا ہویا اے اوہ ہفتے تے ایتوار نُوں نہیں آئے گی:چیف جسٹس پاکستان۔۔۔٭رویل نیوز٭

اسلام آباد (نمایندا رویل) چیف جسٹس پاکستان گلزار احمد نے پورے ملک وچ شاپنگ مالز کھولن سنے ہفتے تے ایتوار نُوں وی ساریاں نِکیاں مارکیٹاں کھلیاں رکھن دا حکم جاری کر دِتا۔ چیف جسٹس نے ریمارکس دِتے کہ کیہ وباء نے حکومتاں نال وعدا کیتا ہویا اے اوہ ہفتے تے ایتوار نُوں نہیں آئے گی‘ کیہ حکومتاں ہفتا‘ ایتوار نُوں تھک جاندیاں نیں‘ کیہ ہفتے ایتوار نُوں سورج مغرب توں نکلدا اے‘ عید اُتے رَس ودھ جاندا اے‘ ہفتے تے ایتوار نُوں وی مارکیٹاں بند نہ کروائیاں جان‘ 500 ارب رُپئے کرونا روگیاں اُتے خرچ ہون تے ہر روگی کروڑ پتی بن جاوے‘ ایہ سارا پیتا کتھے جا رہیا اے؟ حکومت کسے اُتے احسان نہیں کر رہی‘ محکماصحت وچ کالیاں بھیڈاں موجود نیں‘ سرکاری ہسپتالاں وچ کمیشن کھان دے چکر وچ تھرڈ کلاس دوائیاں ہوندیاں نیں‘ سپریم کورٹ وچ چیف جسٹس گلزار احمد دی اگوائی وچ 5 رکنی لارجر بینچ نے کرونا از خُد نوٹس کیس دی سنوائی کیتی جہدے وچ ایڈیشنل اٹارنی جنرل عدالت وچ پیش ہوئے جد کہ اٹارنی جنرل خالد جاوید نے ویڈیو لنک راہیں کراچی رجسٹری توں دلایل دِتے۔ کیس دی سنوائی دوران چیف جسٹس نے ایڈووکیٹ سندھ تے کمشنر کراچی نُوں ہدایت کیتی کہ اوہ چھوٹے دُکانداراں نُوں کم کرن توں نہ روکن۔ حکومت ولوں کرونا خطرے دے پیش نظر 2 دن کاروبار بند رکھن دے حکم نُوں آئین دے آرٹیکل 184 تے 25د ی خلاف ورزی متھدیاں ہویاں سوال چُکیا اے کہ سانوں منتطق دَسی جاوے‘ کیہ وباء نے حکومتاں نال وعدا کر رکھیا اے اوہ ہفتے تے ایتوار نُوں نہیں آئے گی‘ تُسیں دکاناں بند کرو گے تے دُکاندار تے کرونا دی بجائے بھُکھ نال مر جاوے گا‘ دُکانداراں نُوں ڈران دی بجائے سمجھاؤ۔ جے باقی مارکیٹاں کھلیاں نیں تے شاپنگ مال کیوں بند رکھے نیں؟ ایس او پیز اُتے مالز وچ بُہتا عملدرآمد ہو سکدا اے‘ عید اُتے خریداری لئی رَش تے ہووے گا‘ ایہو جہے کئی گھر نیں جہڑے صر ف عید اُتے نویں کپڑے خریددے نیں‘ کئی گھرانے سال وچ مِٹھی عید تے بکرا عید اُتے اِک جوڑا بناندے نیں‘ کدھرے انج نہ ہووے کرونا توں بچ جان والے لوک بھُکھ نال مر جان‘ زینب مارکیٹ غریب پرور مارکیٹ اے‘ کراچی دی زینب مارکیٹ نُوں کھول دوو‘ مارکیٹ والیاں توں رشوت نہ لوو‘ اوہناں نوں مارو نہ‘ دَسیا جاوے کہ کرونا دے حوالے توں ارباں رُپئے خرچ ہو چکے نیں‘ ایہ کیتھے جا رہے نیں؟ 500 ارب رُپئے کرونا روگیاں اُتے خرچ ہون تے ہر روگی کروڑ پتی ہو جاوے گا‘ ایہ سارا پیسا جا کتھے رہیا اے؟ اینی رقم لان دے بعد وی جے 600 لوک واصل ہو گئے تے ساڈیاں کوششاں دا کیہ فایدا؟ کیہ 25 ارب دی رقم نال تُسیں کثیر منزلا عمارتاں بنا رہے او؟ ایس ملک دی لوکائی صوبائی تے وفاقی حکومتاں دی غلام نہیں اے‘ تُسیں اکلاپے دے ناں اُتے لوکاں نُوں یرغمال بنا رہے او‘ لوکائی دے حقاں دی آئین وچ ضمانت دِتی گئی اے‘ حکومت کسے اُتے احسان نہیں کر ہی‘ سانوں کرونا خلاف چُکے گئے اقدامات دا وی اعتراف اے پر محکما صحت وچ کالیاں بھیڈاں وی موجود نیں‘ ہسپتال وچ کم کرن والے لوکاں دے دوائیاں بنان والیاں کمپنیاں نال کمیشن طے ہوندے نیں‘ ایہناں سارے معاملات نُوں وی ویکھنا پوے گا‘ اِک روگی اُتے لکھاں رُپئے خرچ ہون دا کیہ جواز اے؟ کرونا ایس لئی نہیں آیا کہ کوئی پاکستان دا پیسا چُک کے لے جاوے‘ ٹڈی دل لئی این ڈی ایم اے نے کیہ کیتا اے؟ ٹڈی دل اگلے سال ملک وچ فصلاں نہیں ہون دیوے گا‘ صنعتاں فعال ہو جان تے زرعی شعبے دی اینی لوڑ نہیں رہوے گی‘ صنعتاں ملک دی ریڑھ دی ہڈی سن۔ڈپٹی اٹارنی جنرل سہیل محمود نے ایس موقع اُتے عدالت نُوں دَسیا کہ این سی او سی نے کنسٹرکشن دا سیکٹر کھولن دا فیصلا کیتا سی‘ کنسٹرکشن سیکٹر 11 مئی توں کھولیا گیا‘ دوجا فیصلا چھوٹیاں دُکاناں تے کمیونٹی مارکیٹ کھولن دا سی‘ وڈے شاپنگ مال کھولن دا فیصلا نہیں کیتا گیاسی‘ زینب مارکیٹ صدر‘ راجا بازار‘ بوہری بازار‘ انا کلی بازار کمیونٹی مارکیٹ وچ نہیں آندے‘ اسیں صرف مالز بند کیتے باقی مارکیٹاں کھُلیاں نیں۔ نمایندا این ڈی ایم اے نے اِک موقع اُتے عدالت نُوں دَسیا کہ ساڈے لئی 25 ارب مختص ہوئے نیں‘ ایہ ساری رقم حالے خرچ نہیں ہوئی‘ ایہ رقم حالے پوری طرحاں نہیں ملی۔ کمشنر کراچی نے عدالت نُوں دَسیا کہ کجھ مارکیٹاں نُوں ایس او پیز اُتے عمل نہ کرن کارن سیل کیتا اے۔ ایڈووکیٹ جنرل خیبر پختونخوا نے کہای کہ پشاور وچ کوئی شاپنگ مال نہیں اے۔ عدلات نے ایس موقع اُتے متھ دِتا کہ ایس او پیز اُتے عملدرآمد دے حوالے توں متعلقا حکومتاں ذمے دار نیں‘ پنجاب وچ شاپنگ مال فوری طور اُتے اج کھُلن گے‘ سندھ شپانگ مل کھولن لئی وزارت صحت توں منظوری لوے گا‘ عدالت توقع کردی اے کہ وزارت صحت کوئی غیر ضروری رکاوٹ پیدا نہیں کرے گی تے کاروبار کھول دیوے گی ایس او پی دی خلاف ورزی دی صورت وچ دُکان بند نہیں کیتی جاوے گی‘ نہ ای کسے نُوں ہراساں کیتا جاوے گا‘ صرف ایس او پیز اُتے عملدرآمد لئی اقدامات کیتے جا سکدے نیں۔ عدالت نے این ڈی ایم اے دی رپورٹ اُتے عدم اطمینان دا اظہار کردیاں ہویاں کہیا اے کہ کرونا دے حوالے توں کنے پیسے خرچ کیتے گئے ایس حوالے توں این ڈی ایم اے حکام تے اٹارنی جنرل نُوں وکھرا سُناں گے‘ بظاہر پاکستان وچ کرونا وباء دی صورت وچ ظاہر نہیں ہویا‘ ہور ملکاں دی نسبت پاکستان کرونا وباء توں بظاہر بُہتا متاثر نہیں ہویا‘ پاکستان وچ وباء دی اوہ صورتحال نہیں جہدے اُتے ایس طرحاں پیسا خرچ کیتا جاوے‘ ہر سال اسلام آباد وچ پولن الرجی کارن 1 ہزار مَوتاں ہوندیاں نیں‘ پاکستان وچ دل دے روگ‘ جگر‘ گردیاں ورگیاں بیماریاں وی نیں‘ عدالت توقع کردی اے کہ حکومت صرف اِک بیماری اُتے سارا پیسا خرچ نہیں کرے گی‘ عدالت ایہ توقع کردی اے کہ حکومت ایس طرحاں سارے اداریاں نُوں مفلوج نہیں کرے گی‘ عدالت نے ایس موقع اُتے چیف کمشنر کراچی توں کراچی وچ شاپنگ مالز دی تفصیلات منگدیاں ہویاں معاملے دی سنوائی 1 دن لئی ملتوی کر دِتی اے۔