سندھ سرکار تے اپوزیشن دا گٹھ جوڑ کرونا تے صرف سیاست ہو رہی اے:وفاقی وزیر اطلاعات شبلی فراز۔۔۔٭رویل نیوز٭

اسلام آباد (نمایندا رویل) وفاقی وزیر اطلاعات شبلی فراز دا کہنا اے کہ سندھ سرکار ہر میٹنگ دے بعد واپس جا کے سیاست شروع کر د یندی اے‘ اوہنے کرونا اُتے بہت سیاست کیتی اے۔ اسلام آباد وچ پریس کانفرنس کردیاں ہویاں وفاقی وزیر اطلاعات شبلی فراز دا کہنا سی کہ وزیراعظم عمران خان دی صدارت ہیٹھ کرونا دے حوالے توں اجلاس ہویا جہدے وچ سارے متعلقا شعبیاں دے بندیاں نے رلت کیتی‘ لوکائی دے پر زور اصرار اُتے ٹرین اپریشن بحال کرن دا فیصلا ہویا‘ عیدالفطر تے لوکائی دی سہولت لئی ٹریناں نُوں بحال کیتا گیا اے۔ وفاقی وزیر دا کہنا سی کہ کرونا کدوں تک اے تے رہوے گا ایہدے اُتے کوئی کجھ نہیں کَہ سکدا‘ پاکستان غریب ملک اے لاک ڈاؤن دی پالیسی اُتے دیر پا عمل نہیں ہو سکدا‘ ساڈے کول گنجایش نہیں اے‘ پاکستان وچ کرونا نے اوہ نقصان نہیں کیتا جہڑا یورپ وچ ہویا‘ کرونا وباء دے نال معاشی سرگرمیاں نُوں نال کے چلنا ضروری اے۔ حکومت نہیں چاہندی لوک کرونا دی بجائے بھُکھ نال مر جان‘ سپریم کورٹ دے فیصلے دا خیر مقدم کردے آں۔ شبلی فراز نے کہیا کہ اپوزیشن سیاست کر رہی اے تے سندھ حکومت نے تے کرونا ایشو اُتے بہت سیاست کیتی اے‘ میٹنگ دے بعد سندھ سرکار واپس جا کے سیاست شروع کر دیندی اے‘ مخالفین ملک وچ کنفیوژن کھلار رہے نیں اوہناں نُوں انج نہیں کرنا چاہیدا‘ حکومت یاں وزیراعظم کسے دا ہتھ پھڑ کے روک نہیں سکدے پر اپوزیشن توں درخاست کردا آں حکومت دے نال چلن۔ اوہناں نے کہیا کہ احساس پروگرام دے تحت جہڑے لوک بیروزگار ہوئے اوہناں دی مدد کیتی جاوے گی‘ شاپنگ مالز وڈے شہراں وچ نیں اوہناں نُوں کھولن دی اجازت دے دِتی گئی اے تے ہُن ہفتا تے ایتر نُوں وی شاپنگ مال کھولے جا سکدے نیں۔