بھارت جنگی جنون وچ اے،اسیں امن دی گل کردے آں:شاہ محمود قریشی۔۔۔٭رویل نیوز٭

اسلام آباد (نمایندا رویل) وزیر خارجا شاہ محمود قریشی نے کہیا اے کہ پاکستان جنگی جنون وچ مبتلا نہیں ہونا چاہندا پر بھارت جعلی فلیگ اپریشن دی منصوبا بندی کر رہیا اے‘ اوہنے مہم جوئی کیتی تے فروری وانگوں مونہ توڑ جواب دواں گے۔ میڈیا نمایندیاں نال گلبات کردیاں ہویاں اوہناں دا کہنا سی کہ افغانستان امن عمل وچ کجھ طاقتاں رکاوٹاں پا رہیاں نیں۔ رخنا پان والیاں وچ اِک قوت ساڈے گوانڈھ وچ اے۔ وزیر خارجا نے کہیا کہ اشرف غنی تے عبداللہ عبداللہ وچ اِک معاہدا طے پایا اے۔ افغانستان وچ دیر پا امن لئی افغان گرُپاں وچ وی مذاکرات ضروری نیں۔ افغانستان وچ قیدیاں دی رہائی دے عمل نُوں تیز کرنا چاہید ااے۔ امن لئی سازگار ماحول درکار اے‘ ایہدے وچ سبھ نُوں کردار ادا کرنا اے۔ شاہ محمود قریشی دا کہنا سی کہ 1 لکھ 10 ہزار توں ودھ پاکستا نیاں نے وطن واپس آن لئی رابطا کیتا اے۔ ایہناں وچ پڑھیار تے مزدوراں سنے پرچارلئی گئے پاکستانی شامل نیں۔ اوہناں دا کہنا سی کہ پاکستان جنگی جنون وچ وچ مبتلا نہیں ہونا چاہندا پر بھارت نے مہم جوئی کیتی تے فروری وانگوں مونہ توڑ جواب دواں گے‘ جے بھارت نے کوئی حماقت کیتی تے جواب دا منتظر رہوے۔ ملکی معاشی صورتحال اُتے گل کردیاں ہویاں اوہناں دا کہنا سی کہ حکومت ایہ ارادا رکھی اے کہ کاشت کار نُوں کھاد دیاں قیمتاں وچ ریلیف دِتا جاوے۔ وزیراعظم دے حکم اُتے پٹرولیم مصنوعات دیاں قیمتاں وچ خاطر خواہ کمی کیتی گئی۔ لوکاں نُوں زراعت تے ٹرانسپورٹ وچ ریلیف ملے گا۔ سیاسی مخالفاںنُوں تنقید دا نشانا بناندیاں ہویاں اوہناں نے کہیا کہ پیپلز پارٹی سندھ کارڈ نہ کھیڈے‘ ایہ پاکستان کارڈ کھیڈن دا ویلا اے۔ پیپلز پارٹی وی پنجاب وچ آئے‘ اوہدا حق اے جد کہ سندھ وچ جانا ساڈا استحقاق اے۔ سانوں سندھ وچ جان لئی کسے دے این او سی دی اجازت نہیں چاہیدی‘ بلاول نُوں سمجھان دی کوشش کیتی‘ میں اوہناں نُوں اودوں دا ویکھیا اے جدوں اوہ نکڑ وچ کھلوتے محترما توں جھڑکاں کھاندے سن۔