مُنڈے نہیں روندے ؟

اکرم اج اجہیا مُنڈا سی جہڑا تھلڑے طبقے نال تعلق رکھدا سی یعنی کے نہ ودھ پیسے تے نہ ودھ وسیلے۔لیکن سدھراں بھرویاں،چاہواں بھرویاں رکھدا۔گھر وچ سبھ توں نکا سی جس کر کے انتاں دی محبت وچ پلیا سی۔زندگی دی کرنی کُجھ ایسی ہوئی کے اوہ جد ا ٹھویں وچ اَپڑیا تاں اوہدا پیو مر گیا۔جس سبھ توں ودھ اوہنوں لاڈ لڈائے سن بھیناں تے بھراواں او ستوں مونہ موڑ لیا اوہ وی ہولی ہولی اِکلا ہنجو پونجھن سکھ گیا۔

اوس میٹرک دا امتحان دتا تے شہر آ گیا اوتھے بھین بھراواں اُتے اوہ بوجھ بن گیا سی دو ویلے دی روٹی اوس واسطے بہت اوکھت ہو گئی سی۔وسائل نہ ہوون توں بعد وی اوس ہمت نہ ہاری بے یارو مددگار اپنیاں اُمیداں اُتے اوس نوکریاں کیتیاں تے ہولی ہولی اپبے پیراں تے کھلو گیا پر شکوا کدے وی کسے نال نہ کیتا۔ جد وں وی دل بھر آندا تے اوہ اکلا بہ کے اپنے رب اَگے رو کے دل ہلکا کر لیندا سی۔

کہیا جاندا اے کہ جو گھر دا بہتا لاڈلا ہوندا اے اوہنوں زندگی بہت روواندی اے۔

اکرم نال وی کُجھ اجہی واپری سی۔

ویلا گُزرن دے نال اوہ مظبوط ہوندا چلاگیا تے ہولی ہولی اپنی محنت پاروں اوہ اِک چنگے مقام تے اُپڑ گیا۔ اوہ فیر وی اپنے بھین بھراواں نوں نہ بُھلیا سبھ دے کم آ یا پر گُزرے ویلا دا کسے نال ذکر نہ کیتا تے نہ کدے کوئی شکایت کیتی۔بُرے ویلے کسے اوہنوں نہ پُچھیا پر چنگے ویلے سبھ اوس توں کم لین آ ندے رہے اوس کدے وی کسے نوں وخالی نا موڑیا سگوں اپنے اُتے رب دی رحمت سمجھ کے سبھ دے کم آ ندا رہیا۔

کیہ اک مرد دے کوئی جذبات نہیں ہوندے،اوہدے کول دل نہیں ہوندا؟ پر ایہ اک معاشرتی المیا اے کہ اسیں بال پُنے توں ای مُنڈیاں نوں سکھانے آں کے روون والے مُنڈے نا مرد ہوندے نیں۔

”مُنڈے نہیں روندے“

اسے طرحاں کتھارسز نہیں ہو ندا تے ضروری نہیں اے کہ ہر مُنڈا اکرم وانگوں مثبت حیاتی گُزارے تے اکرم ای بنے۔اکثریت منفی رویے نوں اپنا لیندی اے تے اپنا آ پ تباہ کر لیندے نیں سانوں ایہ گل سمجھنی ات ضروری اے کہ مرد اں کول وی ساریاں ورگے جذبات ہوندے نیں ا۔وہناں نوں کدے وی رون توں نہیں ڈکنا چاہیدا اوہناں تے کئی طر حاں دے بھار ہوندے نیں تے اوہناں نوں وی کتھارسز دا حق ہوندا اے۔۔۔۔۔۔۔۔۔۔۔۔۔۔۔۔۔۔