ٹرین سروس بحال کرن دا اعلان،احتیاطی تدبیراں کراں گے:وفاقی وزیر ریلوے شیخ رشید۔۔۔٭رویل نیوز٭

اسلام آباد (نمایندا رویل) وفاقی وزیر ریلوے شیخ رشید نے کہیا اے کہ وزیراعظم عمران خان نے ایس او پیز اُتے عملدرآمد دی شرط دے نال 20 مئی توں پورے ملک وچ 30 ٹریناں چلان دی منظوری دے دِتی اے۔ وفاقی وزیر ریلوے شیخ رشید نے پریس کانفرنس وچ پورے ملک وچ ٹرین سروس بحال کرن دا اعلان کردیاں ہویاں کہیا کہ ابتدائی طور اُتے 20 مئی توں 30 ٹریناں چلائیاں جان گیاں تے حالات سازگار رہے تے پہلی جونت وں ساریاں ٹریناں بحال کر دواں گے۔ ٹریناں دا نواں شیڈول جاری کر دِتا گیا اے۔ شیخ رشی دنے ہور کہیا کہ وزیراعظم عمران خان نے ایس او پیز اُتے عمل کردیاں ہویاں ٹریناں چلان دی منظوری دِتی اے۔ ایس او پیز اُتے عملدرآمد دے حوالے توں کل سارے سٹیشناں اُتے ریہرسل کیتی جاوے گی۔ ٹریناں وچ سواری ادھی کر دِتی گئی اے تے کرائے وچ وادھا نہیں کیتا گیا اے۔ ایس موقع اُتے وفاقی وزیر ریلوے نے لوکائی توں مسافراں نُوں چھڈن لئی ریلوے سٹیشن نہ آن دی التجا کردیاں ہویاں کہیا کہ صرف مسافر ریلوے سٹیشن آن تے ماسک پا کے آن تے شہری ہر ویلے لا الہ الا انت سبحانک انی کنت من الظالمین دا ورد جاری رکھن۔ ایس او پیز دی خلاف ورزی ہوئی تے ڈویژن ہیڈ خلاف کارروائی کراں گا۔ اوہناں نے ہور کہیا کہ ملک لُٹن والے اندر ہون گے‘ 31 جولائی توں پہلے جھاڑو پھر جاوے گا۔