کسان نُوں قیمت گھٹ ادا کیتی جاندی رہی،کچی پرچی تے کمیشن وی مُکانی پینی،حکومت مافیا نوں بے نقاب کرے گی،کھنڈ بحران انکوایری رپورٹ جاری۔۔۔٭رویل نیوز٭

اسلام آباد (نمایندا رویل)کھنڈ بحران انکوایری رپورٹ جاری‘ قیمت وچ وادھے دے ذمے دار ریگولیٹرز قرار‘جہانگیر ترین گرُپ دیاں شوگر مِلاں اوور انوائسنگ تے ڈبل بلنگ وچ ملوث نیں۔وفاقی کابینا نے کھنڈ بحران دے ذمے داراں خلاف کیسز نیب تے ایف آئی اے نُوں گھلن دا فیصلا کیتا اے۔ وزیراعظم دی صدارت ہیٹھ وفاقی کابینا دا خصوصی اجلاس ہویا جہدے وچ کھنڈ بحران اُتے تحقیقاتی کمیشن دی رپورٹ پیش کیتی گئی‘ اجلاس وچ کابینا نے شوگر انکوایری کمیشن دی رپورٹ پبلک کرن دا فیصلا کردیاں ہویاں رپورٹ وچ ذمے دار متھے جان والیاں خلاف کیسز نیب تے ایف آئی اے نُوں گھلن دا فیصلا کیتا اے اے‘ ایہدے علاوا کابینا نے مفادات دے ٹکراؤ دا قانون چھیتی نافذ کرن دا وی فیصلا کیتا اے۔ کابینا اجلاس بعد وزیراعظم عمران خان دے معاون خصوصی برائے احتساب شہزاد اکبر نے اسلام آباد وچ پریس کانفرنس کردیاں ہویاں کھنڈ بحران بارے رپورٹ نُوں جاری کیتا‘ انکوایری کمیشن دی حتمی رپورٹ وچ کھنڈ دیاں قیمتاں ودھن دا ذمے دار ریگولیٹرز نُوں متھیا گیا اے۔ شہزد اکبر دا کہنا سی کہ وفاقی کابینا نے کھنڈ بحران دی انکوایری رپورٹ نُوں ساہمنے لیان دا فیصلا کیتا سی۔ اوہناں نے کہیا کہ پاکستان دی تواریخ دا اج بہت اہم دن اے‘ پاکستان دی تواریخ وچ ایہو جہی کسے دی جرئتنہیں سی کہ اوہ ایہو جہیا کمیشن بنائے۔ اوہناں دا کہنا سی کہ کھنڈ دی قیمت وچ مسلسل وادھا ہویا جہدی وزیراعظم عمران خان نے تحقیقات دا حکم دِتا۔ شہزاد اکبر دا کہنا سی کہ ایس تواریخ ساز دن اُتے سانوں سلاہنا چاہیدا اے کہ اسیں صحیح پاسے ودھ رہے آں۔ اوہناں نے کہیا کہ رپورٹ وچ بڑے حیران کن انکشافات نیں‘ سارے پہلوواں دا احاطا کیتا گیا‘ رپورٹ وچ لکھیا گیا کہ شوگر ملز کساناں نُوں امدادی قیمت توں گھٹ قیمت دیندے نیں۔ اوہناں دا کہنا سی کہ رپورٹ وچ دَسیا گیا کہ کس طرحاں کساناں نُوں نقصان پہنچایا گیا‘ کساناں نُوں گنے دے وزن وچ 15 فیصد توں ودھ کٹوتی کیتی جاندی اے۔اوہناں دا کہنا سی کہ کچی پرچی تے کمیشن ایجنٹ راہیں گھٹ قیمت اُتے کساناں توں گنا خریدیا جاندا اے۔ وزیراعظم دے اُچیچے صلاحکار نے کہیا کہ گنا گھٹ قیمت اُتے خرید کے اوہدی لاگت بُہتی وکھائی جاندی اے‘ کٹوتی دی مد وچ کسان نُوں قیمت گھٹ ادا کیتی جاندی اے۔ شہزاد اکبردا کہنا سی کہ وزیراعظم ہمیشا کہندے نیں کہ کاروبار کرن والا سیاست وچ وی کاروبار کرے گا‘ پر ایس وار ایہ گل سچ ہو گئی اے۔ اوہناں دا کہنا سی کہ کسان نُوں تسلسل دے نال نقصان پہنچایا گیا‘ 2019 وچ گنا 140 رُپئے توں وی گھٹ وچ خریدیا گیا‘ کسان نال کٹوتی دے ناں اُتے زیادتی کیتی گئی‘ شوگر مِلاں 15 توں 30 فیصد تک ماترا گھٹ کر کے کساناں نُوں نقصان پہنچاندیاں رہیں۔ ایس موقع اُتے وفاقی وزیر اطلاعات و نشریات شبلی فراز دا کہنا سی کہ حکومت دا منشور تبدیلی لیانا تے مافیا نُوں بے نقاب کرنا اے۔ اوہناں نے ہور کہیا وزیراعظم عمران خان دی ہدایت مطابق غیر منتخب رکن وی اپنے اثاثے ڈکلیئر کرن گے۔ اوہناں دا کہنا سی کہ رپورٹ دے مطابق مارکیٹ وچ کھنڈ دی قیمت وچ وادھا شوگر ملز مالکان دے بغیر ممکن نہیں اے۔ اوہناں نے کہیا کہ کھنڈ دی قیمت دے نال اِک طرحاں دا جووا ہو رہیا اے‘ گنا گھٹ پیسیاں وچ خرید کے بُہتی قیمت ظاہر کیتی گئی‘ کمیشن نے ریکوری دا وی تعین کیتا اے۔ شہزاد اکبر نے کہیا کہ رپورٹ وچ دَسیا گیا کہ مارکیٹ وچ کھنڈ دی قیمت ودھن دا وی تعین کیتا گیا اے‘ شوگر ملز نے دو دو کھاتے بنا رکھے نیں‘ اِک کھاتا سرکار لئی ہوندا تے دوجا سیٹھ لئی ہوندا اے‘ بے نامی کسٹمزر دے ناں اُتے سیل وکھائی گئی اے‘ بے نامی سیل اُتے ٹیکس چوری ہوندا اے‘ ساریاں ملاں نے کرشنگ دی صلاحیت نُوں ودھایا ہویا اے‘ ملز بغیر لائسنس دے اپنی کرشنگ دی صلاحیت نُوں نہیں ودھا سکدیاں۔ اوہناں نے کہیا کہ شوگر ملز سیلز ٹیکس شامل کر کے لاگت لاندیاں نیں‘ سبسڈی دی مد وچ کمیشن نے 5 سال سا جایزا لینا سی۔ اوہناں دا کہنا سی کہ پاکستان وچ تقریبن 25 فیصد گنا انڈر رپورٹڈ اے‘ ایہدے نال گنے اُتے ٹیکس وی نہیں دِتا جاندا۔ شہزاد اکبر نے کہیا کہ مراد علی شاہ نے صرف اومنی گرُپ نُوں فایدا دین لئی سبسڈی دِتی‘ 2019 وچ وفاقی حکومت نے کوئی سبسڈی نہیں دِتی‘ پنجاب نے 2019 وچ 3 ارب رُپئے دی سبسڈی رکھی‘ کھنڈ دی قیمت وچ 1 رُپیا وادھا کر کے 5.2 ارب رُپئے منافیا کمایا جاندا اے۔ شہزاد اکبر نے دَسیا کہ سندھ سرکار نے اومنی گرُپ نُوں سبسڈی دے کے فایدا پہنچایا‘ 5 سال وچ 29 ارب رُپئے دی سبسڈی دِتی گئی‘ برآمدات دی مد وچ 58 فیصد کھنڈ افغانستان جاندی اے۔ اوہناں ن کہیا کہ کمیشن نے کھنڈ بحران دا ذمے دار ریگولیٹرز نُوں متھیا‘ ریگولیٹرز دی غفلت کارن کھنڈ بحران پیدا ہویا تے قیمتاں ودھیاں۔ شہزاد اکبر دا کہنا سی کہ کمیشن نے کیسز نیب‘ ایف آئی اے تے اینٹی کرپشن نُوں گھلن دی سفارش کیتی اے۔ اوہناں دا کہنا سی کہ وزیراعظم نے فوری طور اُتے رپورٹ پبلک کرن دے احکامات دِتے‘ کابینا نے نظام نُوں فعال‘ اداریاں نُوں متحرک کرن دی منظوری دِتی۔ شہزاد اکبر دا کہنا سی کہ کابینا نے ہور ملاں دا وی فرانزک آڈٹ کرن دی ہدایت دِتی جد کہ کابینا نے ریکوری کر کے پیسے لوکائی نُوں دین دی سفارش کیتی۔ وزیراعظم دے معاون خصوصی دا کہنا سی کہ کابینا نے مینوں ذمے داری دتیاے‘ عید دے بعد وزیراعظم دی ہدایت اُتے سفارشاں تیار ہون گیاں۔ اِک سوال دے جواب وچ شہزاد اکبر دا کہنا سی کہ حالے کسے دا ناں ای سی ایل اُتے نہیں پایا گیا۔ شہزاد اکبر دا ایہ وی کہنا سی کہ کوئی تحقیقات ادارا کہوے گا تے کابینا ناں ای سی ایل وچ پان اُتے غور کرے گی۔اوہناں نے ہور کہیا کہ شہباز شریف فیملی دیاں شوگر مِلاں وچ ڈبل رپورٹنگ د ے شواہد ملے نیں‘ العربیا وچ کچی پرچی دا رو اج بہت ملیا اے تے ایہنے کساناں نُوں 40 کروڑ رُپئے گھٹ دِتے‘ جے ڈی ڈبلیو گرُپ دیاں شوگر مِلاں کارپوریٹ فراڈ وچ ملوث نکلیاں نیں‘ جہانگیر ترین گرُپ دیاں شوگر ملز اوور انوائسنگ تے ڈبل بلنگ وچ ملوث نیں‘ شریف فیملی دیاں شوگر مِلاں وچ ڈبل رپورٹنگ ثابت ہوئی۔