افغانستان وچ امن نال بُہتا فایدا پاکستان نوں ہونا اے:  امریکی نایب معاون وزیر خارجا ایلس ویلز ۔۔۔٭رویل نیوز٭

اسلام آباد/ واشنگٹن (نیوز ڈیسک) امریکی نایب معاون وزیر خارجا ایلس ویلز دا کہنا اے کہ سی پیک دے سودے پاکستان دی لوکائی لئی شفاف ہونے چاہیدے نیں۔ ویڈیو لنک راہیں صحافیاں نال گلبات کردیاں ہویاں امریکی نائب معاون وزیر خارجا ایلس ویلز نے کہیا کہ افغانستان وچ امن پاکستان دے وسیع تر مفاد وچ اے‘ پاکستان دا وی ایہو کہنا اے کہ علاقے وچ امن و استحکام دا افغانستان دے بعد پاکستان نُوں ای سبھ توں ودھ فایدا ہووے گا۔ امریکی نائب وزیرخارجا دا کہنا سی کہ طالبان نُوں مذاکرات دی میز اُتے لیان لئی ایمبیسیڈر زلمے خلیل زاد نُوں پاکستان دا بھرواں تعاون حاصل رہیا‘ پاکستان نے حافظ سعید دے خلاف مؤثر کارروائی کیتی تے خطے وچ عدم استحکام لئی کردار ادا کرن والیاں تنظیماں دے خلاف اقدامات کیتے پر پاکستان نُوں دہشتگردی دے خاتمے لئی ہور کردار ادا کرنا پوے گا جہدے لئی کالعدم تنظیماں خلاف مؤثر کارروائی ضروری اے۔ سی پیک دے حوالے توں گل کردیاں ہویاں ایلس ویلز دا کہنا سی کہ سی پیک یاں دوجے ترقیاتی منصوبیاں لئی اسیں سرمایا کاری نُوں عالمی معیار دے مطابق ویکھنا چاہندے آں‘ ایہ سرمایا کاری دیر پا ہونی چاہیدی اے جہڑی خطے دے فایدے وچ ہووے‘ سی پیک وچ شفافیت دی کمی اُتے سانوں سخت تشویش اے‘ پاک چین تجارتی حجم وچ بہت زیادا عدم توازن اے جد کہ کرونا وایرس دی وباء دے اوس ویلے جدوں دنیا نوں معاشی چیلنجز درپیش نیں‘ چین نُوں پاکستان نُوں غیر منصفانا ادھار دیاں شرطاں بدلنیاں چاہیدیاں نیں۔ ایلس ویلز نے ہور کہیا کہ چین قرضیاں دے حوالے توں غیر منصفانا شرطاں ختم کرے تے سی پیک دے سودے پاکستان دی لوکائی لئی شفافیت اُتے مبنی ہونے چاہیدے نیں۔