جھُوٹھے الزام لائے جا رہے نیں،ہر الزام دا جواب دیاں گا:جہانگیر ترین۔۔۔٭رویل نیوز٭

لاہور (نمایندا رویل)پاکستان تحریک انصاف دے آگو جہانگیر ترین نے کہیا اے کہ شوگر انکوایری کمیشن دی رپورٹ وچ لائے گئے الزامات نال مینوں جھٹکا لگا اے۔ پی ٹی آئی آگو جہانگیر خان ترین نے شوگر کمیشن دی رپورٹ اُتے ردِ عمل دیندیاں ہویاں کہیا اے کہ میں ہمیشا صاف ستھرا کاروبار کیتا اے۔ جہانگیر ترین دا کہنا سی کہ میرے خلاف جھوٹھے الزامات نال مینوں جھٹکا لگا اے۔ اوہناں نے کہیا کہ پورا پاکستان جاندا اے کہ میں گنے دے کاشتکاراں نُوں ہمیشا نقد ادائیگی کیتی اے۔ جہانگیر خان ترین دا کہنا سی کہ میں کدی دُہرے کھاتے نہیں بنائے‘ میں ہمیشا ذمے داری نال ٹیکس ادا کیتے نیں۔ اوہناں دا ایہ وی کہنا سی کہ میں اپنے خلاف لگن والے ہر الزام دا جواب دواں گا تے ایہنوں غلط ثابت کراں گا۔ شوگر انکوایری کمیشن دی رپورٹ اُتے مسلم لیگ ق دے آگو چودھری مونس الٰہی دا ردِ وی ساہمنے آیا اے۔ چودھری مونس الٰہی دا کہنا اے کہ کسے شوگر ملز دی مینجمنٹ وچ شامل آں نہ کسے شوگر ملز دے بورڈ دا حصا آں‘ اوہ سٹے تے کھنڈ دیاں قیمتاں وچ ساز باز نال جوڑ توڑ روکن لئی قانون سازی لئی کمیشن دیاں سفارشاں دی حمایت کردے نیں۔ مونس الٰہی نے کہیا کہ اوہ پہلے ای کَہ چکے نیں کہ اوہ کسے شوگر ملز دی مینجمنٹ وچ شامل نیں نہ ای کسے شوگر ملز دے بورڈ دا حصا نیں۔ دوجے پاسے پاکستان مسلم لیگ (ن) دے آگو ملک احمد خان نے کہیا اے کہ کھنڈ مہنگی کرن تے 10 لکھ ٹن تک کھنڈ برآمد کرن والیاں دا ذکر کھنڈ انکوایری رپورٹ توں غایب اے‘ پنجاب سرکار نے سبسڈی دِتی پر کسے نوںذمے دار نہیں متھیا۔اوہناں دا ایہ وی کہنا سی کہ وفاقی حکومت وچ وی سبسڈی دین اُتے کسے ذمے داری نہیں ۔ اوہناں نے کہیا کہ کھنڈ بارے رپورٹ وچ ایہناں ذمے داراں نوں متھناسی جہڑا نہیں کیتا گیا‘ وزیراعظم نُوں جہناں لوکاں نے غلط رپورٹ دِتی کیہ اوہناں خلاف کارروائی کیتی گئی؟۔ اوہناں نے کہیا کہ 20 رُپئے فی کلو کھنڈ مہنگی کیتی گئی‘ اِک ملین ٹن ایکسپورٹ کیتی گئی ایہدا ذکر رپورٹ وچ نہیں اے۔