قومی مالیاتی کمیشن دی تشکیل خلاف درخاست دی سنوائی،فیصلا سپریم کورٹ دے آرڈر دی روشنی وچ کراں گے: ہائیکورٹ۔۔۔٭رویل نیوز٭

اسلام آباد (نمایندا رویل) 10 ویں قومی مالیاتی کمیشن دی تشکیل دے خلاف ن لیگ دے خرم دستگیر دی درخاست اُتے سنوائی جسٹس میاں گل حسن اورنگزیب نے کیتی‘ درخاست گزار ولوں عمر گیلانی ایڈووکیٹ نے دلایل دِتے۔ سنوائی دورا ن جسٹس میاں گل حسن اورنگزیب نے ریمارکس دِتے کہ تہاڈی مرکزی استدعا ایہو اے کہ مشیر خزانا عبدالحفیظ شیخ کمیشن دے ممبر نہیں ہو سکدے؟ جہدے اُتے عمر گیلانی ایڈووکیٹ نے عدالت نُوں دَسیا کہ ایہ صرف اِک گراؤنڈ اے کہ وزیراں دے علاوا سارے ممبرز لئی گورنرز نال مشاورت ضروری اے‘ آئین دے تحت قومی مالیاتی کمیشن دے اجلاس وچ سارے ارکان دی موجودگی ضروری اے‘ عدالت نے ریمارکس دِتے کہ تہاڈیاں گلاں مفروضیاں اُتے مبنی نیں‘ درخاست اُتے نوٹس جاری کرن دا فیصلا سپریم کورٹ دے آرڈر دی روشنی وچ کراں گے‘ تُسیں وی اوہ آرڈر پڑھ کے آؤ‘ عید دیاں چھٹیاں بعد پہلے ورکنگ ڈے اُتے ایس کیس نُوں سناں گے۔