کھنڈ سکینڈل رپورٹ وچ عمران خان نوں بچا کے ہورناں نوں قربانی دا بکرا بنا دِتا گیا:خواجا آصف۔۔۔٭رویل نیوز٭

سیالکوٹ (نمایندا رویل) پاکستان مسلم لیگ (ن) دے مرکزی آگو خواجا آصف نے کہیا اے کہ کھنڈ سکینڈل دی رپورٹ وچ عمران خان نُوں بچایا گیا اے تے کجھ لوکاں نُوں قربانی دا بکرا بنایا گیا اے‘ کھنڈ سکینڈل دے اصل سہولت کار وزیراعظم عمران خان نیں۔ جمعے والے دن سیالکوٹ وچ میڈیا نال گلبات کردیاں ہویاں خواجا آصف نے کہیا کہ ساڈا ایس رپورٹ توں پہلاں وی ایہو مطالبا سی کہ ایس سکینڈل دے اصل سہولت کار وزیراعظم عمران خان نیں‘ ایس رپورٹ اُتے مٹی پان دی پوری کوشش کیتی گئی‘ اسیں ایس رپورٹ د ے اصل حقایق ساہمنے آن تک چُپ نہیں رہواں گے۔ خواجا آصف نے ہور کہیا کہ مسلم لیگ (ن) کلی پارٹی اے جہدا احتساب ہو رہیا اے‘ نواز شریف عدالتاں وچ پیش ہوئے ایہ عدالتاں دا احترام اے‘ عمران خان نے 2002 توں منی لانڈرنگ شروع کیتی سی‘ فارن فنڈنگ معاملے وچ حکم امتناع کیوں لیا گا‘ بلین ٹری کتھے نیں؟ ایہدا حساب دینا پوے گا‘ کل تک کنٹینر اُتے کھلو کے بھڑکاں مارن والے وزیراعظم اپنے آپ نُوں احتساب لئی کیوں نہیں پیش کردے۔ اوہناں نے کہیا کہ پی آئی اے دے بیرون ملک ہوٹلاں دا سودا کیتا جا رہیا اے‘ ہوٹل انڈسٹری بَہ گئی اے ایسے لئی ہوٹل ویچے جا رہے نیں‘ ایہ اِک ہور ڈاکے دی تیاری کیتی جا رہی اے جہدے پچھے وزیراعظم دے چہیتے معاون خصوصی نیں۔