صوبائی  سماجی سیواتے کرونا وبا نال نِبڑن لئی پنج سو ملین ڈالر اں دی منظوری:عالمی بینک دے بورڈ آف ڈائریکٹرز۔۔۔٭رویل نیوز٭

اسلام آباد (نمایندا رویل) عالمی بینک دے بورڈ آف ڈائریکٹرز نے کرونا وایرس دی عالمگیر وباء دے حوالے نال کہیا کہ پاکستان لئی 500 ملین ڈالر دے پروگرام دی منظوری دے دِتی اے۔ پروگرام دے تحت عالمگیر وباء دے اثرات دے تناظر وچ صحت عاما‘ تعلیم‘ سوانیاں لئی اقتصادی موقعیاں دی فراہمی تے سماجی تحفظ دے نظام نُوں مضبوط بنان وچ معاون فراہم کیتی جاوے گی۔ عالمی بینک ولوں جاری بیان دے مطابق سیکیورنگ ہیومن انویسٹمنٹ ٹو فوسٹر ٹرانسفرمیشن (شفٹ) پروگرام دے تحت کرونا وایرس دی وباء دے تناظر وچ انسانی سرمائے دے تحفط لئی پالیسی اصلاحات متعارف کروائیاں جان گیاں۔ پروگرام دے تحت پولیو تے ہور بیماریاں دی روک تھام وچ وفاق تے صوبیاں دے وچکار رابطا کاری نُوں ودھایا جاوے گا۔ شفٹ پروگرام راہیں اِک کروڑ 20 لکھ بندیاں نُوں امداد دی فراہمی دے ضمن وچ حکومت پاکستان دے سماجی تحفظ دے پروگراماں وچ وی معاونت فراہم کیتی جاوے گی۔ پاکستان وچ عالمی بینک دے کنٹری ڈائریکٹر الانگو پیچو موتو نے دَسیا کہ کرونا وایرس دی وباء نال پاکستان وچ معمول دی زندگی متاثر ہوئی اے‘ ایہدے نال نہ صرف اقتصادی سرگرمیاں سگوں انسانی سرمائے نُوں وی نقصان پہنچیا اے۔ اوہناں نے کہیا کہ پروگرام نال صحت عاما تے سماجی تحفظ دے حوالے توں خدمتاں دی عالمگیریت ی اہمیت اجاگر ہوندی اے۔ پروگرام دی ٹاسک ٹیم دی لیڈر کرسٹینا پناسکو سانتوز نے دَسیا کہ پاکتان دی کرونا وایرس دی وباء نُوں گھٹ کرن دی اہلیت تے اہمیت دا انحصار ایس گل اُتے اے کہ پاکستان کنے گھٹ عرصے وچ مؤثر طریقے نال سماجی تحفظ دے پروگرام نُوں معاشرے دے پسماندا تے غریب طبقیاں تک پہنچان وچ کامیابی حاصل کردا اے۔ا وہناں نے کہیا کہ عالمی بینک دے ایس پروگرام نال احساس پروگرام تے صوبائی حکومتاں دے سماجی تحفظ دے پروگراماں نُوں مربوط بنان تے ایہدے ثمرات معاشرے دے غریب تے کمزور طبقیاں تک پہنچان وچ مدد ملے گی۔ ایس پروگرام لئی انٹرنیشنل ڈویلپمنٹ ایسوسی ایشن مالی معاونت فراہم کرے گی‘ پروگرام دی میچوریٹی دی مدت 30 سال اے جہدے وچ 5 سال دی رعایتی مدت وی شامل اے۔