قوم نوں لُٹن دی اجازت   دین اُتے عمران خان تے سردا بزدار  دے استعفے دی منگ:شہباز شریف ۔۔۔٭رویل نیوز٭

لاہور (نمایندا رویل)پاکستان مسلم لیگ (ن) دے صدر شہباز شریف نے وزیراعظم عمران خان تے وزیر اعلا پنجاب دے استعفے دا مطالبا کر دِتا۔ اپنے بیان وچ شہباز شریف نے کہیا کہ وزیراعظم اقتصادی رابطا کمیٹی تے کابینا دے آگو دے طور اُتے ہر فیصلے دے ذمے دار نیں‘ دوجیاں نُوں قربانی دا بکرا بنان نال عمران خان دی ذمے داری ختم نہیں ہووے گی‘ آٹا کھنڈ چوری دے سارے فیصلیاں دی منظوری عمران خانں نے دِتی‘ عمران خان نے قوم توں لُٹ مار دا لائسنس دِتا‘ ایہدے اُتے دستخط عمران خان نے کیتے‘ عمران خان نے پہلے قومی خزانا لُٹن دی اجازت دِتی فیر کہیا جہناں نے لُٹیا اوہناں نوں گرفتار کر لوو۔ شہباز شریف نے کہیا کہ لوکائی دی کھنڈ چوری کرن والے گرُپ دے سرغنا دا ناں وزیراعظم عمران خان اے‘ کھنڈ باہر گھلن دی اجازت دین توں لے کے اوہدی ذخیرا اندوزی تے مقامی مارکیٹ وچ مہنگی ویچنا عمران خان دے جرایم نیں۔ قوم نُوں لُٹن دی اجازت دین والے وزیراعظم عمران خان مستعفی ہون۔ایس توں وکھ پاکستان مسلم لیگ (ن) دے صدر تے قائد حزب اختلاف محمد شہباز شریف نے القدس دیہاڑ اُتے فلسطینی لوکائی دے نال ایکے دا اظہار کردیاں ہویاں کہیا اے کہ مقبوضا فلسطین تے مقبوضا کشمیر دی لوکائی نُوں انصاف ملن تک اقوام متحدا‘ سلامتی کونسل دی ساکھ اُتے سوال رہوے گا‘ نہتے فلسطینیاں تے کشمیریاں دے جایز قانونی حق نُوں اسرائیل تے بھارت پامال کر رہے نیں۔ اپنے بیان وچ اوہناں نے کہیا کہ اسرائیل تے بھارت انسانیت دے قاتل بن چکے نیں‘ امت مسلما فلسطین تے مقبوضا کشمیر دے مظلوم مسلماناں دی قرض دار اے‘ فلسطین تے کشمیر دے شہدا نُوں سلام اے جہناں دا لہو دنیا توں انصاف دا تقاضا کردا اے۔