فنکاراں نوں فاقیاں توں بچان لئی اقدامات دی لوڑ: کومل ناز۔۔۔٭رویل نیوز٭

لاہور(نمایندا رویل) سینئر سٹیج آرٹسٹ کومل ناز نے آکھیا کہ موجودا آرٹسٹ ایسوسی ایشن دے عہدیداراں، ضلعی انتظامیا تے مختلف کمپنیاں دے تعاون توں عید توں پہلے فنکاراں لئی عید پیکج دا انتظام کرن۔ اوہناں آکھیا کہ لاک ڈاون پاروں تھیٹرز دی بندش برقرار اے تے بے روزگار فنکاراں وچ ایس سلسلے وچ بہت تشویش پائی جارہی اے کہ اوہ عید دیاں تیاریاں کویں کرن کیوں کہ اوہناں کول ضرورت دیاں شیواں دا سامان تیکر نہیں اے تے اوہ فاقا کشی نیڑے نیں۔ اوہناں آکھیا کہ فنکاراں توں وکھ سٹیج اتے کم کرن والے ہور معاون تے ہنرمنداں دا وی ایہو حال اے۔ ایس لئی عید توں پہلے عید لئی بہتر انتظام لئی آرٹسٹ ایسوسی ایشن فوری اقدامات چکے۔