kraamaat@gmail.com
+ +92 333-430-6384


اسیں کون؟


نسرین انجم بھٹی December 09, 2019


اسیں کون آں؟

چھان بُوریوں لُوچے

گلیاں دے وچ ہوکا

ترکڑی چ بچ رہیاں بُھکھاں

ترکڑی چ ودھ رہیاں رجاں

ترکڑی چ لُوچے

ترکڑی چ بیر۔۔۔اجے کتنی کُو دیر

ہتھ پک کے تراما تھیون

تے روٹیاں کچیاں رہون

ویلے لنگھ گئے آٹے کھاون دے

ریتا چب چب دند جھڑے

کِرکاں نے بھکھ گوائی

اتھرو چبدے بال،حکم وکیندے ہٹیاں۔۔۔۔عمراں ترٹھیاں

اجے کتنی کُو دیر اے

اسیں کون ؟۔۔۔۔۔ وے اسیں چھان بُوریاں لُون

لُون پہاڑاں دا رتا

وچ اتھرو جہے ہسن تے اکھاں وچ لَون مچ پوے

لُوں لُوں انھا ہو ونجے

گلیاں چ ہانڈیاں چڑھیاں

گلیاں چ ہانڈیاں بھجیاں

تے بوٹیاں دیواراں نال جا چِنبڑیاں

چمڑے دے بوٹاں ہیٹھ میں کیہ پئی جھاتاں

اپنے سودا لین گئے بالک دیاں بوٹیاں

ریڑھی والیا کھلوویں۔۔۔۔۔میرا ساہ ڈکدا تیرا ہوکا

تیرے ابے دادے دی روزی

تیرے بال بچڑے دا ٹُکر

ہوکا کیتی رکھ۔۔۔۔اسیں کوئی وی نہ

چھان بوریوں سیویاں

اسیں کوئی وی نہ

چھان بُوریاں لُوچے

اسیں کوئی وی نہ

چھان بُوریوں کھجوراں

اسیں کوئی وی نہ

چھان بُوریوں لُون

اسیں کوئی وی نہ

اسیں کوئی وی نہ۔۔۔۔۔۔ اسیں کوئی وی نہ

.....................................