kraamaat@gmail.com
+ +92 333-430-6384


تکبیر دیہاڑ


شیخ محمد انور May 28, 2020


تکبیر دیہاڑ

شیخ محمد انور

قوم اج 28مئی نوں عزیر وطن دے ایٹمی قوت توں سرفراز ہون دی 22 ویں سالگرا تکبیر دیہاڑ دی صورت وچ اک نویں جوش تے جذبے نال منارہی اے۔ ایس موقع اتے ملک دی ایٹمی قوت، سماجی تنظیماں تے مزدور تنظیماں دلوں ملک بھر وچ خصوصی تقریباں دا اہتمام کیتا جاندا اے جہدے وچ ملک دے ایٹمی قوت بنن دی اہمیت نوں اجاگر کیتا جاوے گا تے ایٹمی قوت توں سرفراز کرن والیاں شخصیتاں دیاں خدمتاں نوں سراہندے ہوئے اوہناں نوں اسلام عقیدت تے محبت پیش کیتا جاوے گا جد کہ ملک بھر وچ فجر دی نماز بعد تکبیر دے حوالے نال ملک دی ازادی، خدمختاری تے ترقی تے سلامتی لئی خصوصی دعاواں منگیاں جان گیاں۔ ایس موقع اتے اسلام آباد، آزاد جموں وکشمیر، شمالی علاقیاں تے چارے صوبائی دارلحکومتاں سنے ملک بھر وچ ریلیاں تے تقریباں دا اہتمام کیتا جارہیا اے۔ قوماں دی زندگی وچ انج دے لمحات ضرور آوندے نیں جدوں اک صحیح فیصلا اوہدی تقدیر بدل کے رکھ دیندا اے۔ انج دا ای وقت پاکستان دی تاریخ وچ وی 28 مئی 1998 نوں آیا جدوں اک صحیح تے ویلے سر فیصلے نے اک انج دا معجزا کروکھایا کہ دنیا حیران رہ گئی۔ پاکستان دی تاریخ وچ دو وڈے معجزے ہوئے پہلا 14 اگست 1947 پاکستان بنن دا اے کہ کویں اک کھلری قوم نے جدوجہد کرکے ہندوواں تے انگریزاں دی غلامی توں ازادی حاصل کیتی تے اپنا وکھرا ملک حاصل کرن وچ کامیاب ہوگئے۔

پاکستان قدرت دا عطا کیتا انمول تحفا اے جو لیلتہ القدر دی رات وچ نازل ہویا پر ایس توں بعد قتل وغارت پاروں دوویں پاسے لوکائی نوں قربانیاں دینیاں پیئاں۔ بھارت دے وزیراعظم اٹل بہاری واجپائی نے برسرقتدرار آوندے اہ اپنے جارحانا عزایم دا بھرپور طریقے نال اظہار کیتا تے جنگی تیاریاں شروع کردتیاں تے پاکستان نوں دھمکیاں دینا شروع کردتیاں۔ 11مئی 1998 نوں بھارت نے 3 تے 13 مئی 1998 نوں 2 ہور ایٹمی دھماکے کرکے پاکستان نوں ایہ پیغام دتا کہ بھارت کسے وی ویلے پاکستان نوں دنیا دے نقشے توں مٹا سکدا اے۔ بھارت دی جارحیت پاکستانی قوم، فوجاں تے ساریاں جماعتاں لئی ناقابل برداشت سی۔ پوری قوم دی ایہ خاہش سی کہ بھکھا رہنا منظور اے پر انڈیا دی غلامی منظور نہیں تے پاکستان نوں ایٹمی دھماکیا دا جواب بھرپور طریقے نال دینا چاہیدا اے۔ لہذا پاکستانی ساینسداناں، پاکستان تے سیاسی قیادت دے فیصلے اتے 28 مئی 1998 نوں جمعرات دے دن دوپہر 3 وج کے 40 منٹ اتے چاغی دے مقام اتے واقع کوہ کامبران وچ کھودی ہوئی 1کلو میٹر لمی زگ زیگ سرنگ وچ 5 تے 30 مئی نوں صحرائی دے مقام اتے چھیواں ایٹمی دھماکا کرکے بھارت دا مونہ توڑ جواب دتا تے گوانڈھی دشمن ملک بھارت دا غرور مٹی وچ رول دتا تے ایہدے نال ای پاکستان اسلامی دنیا وچ پہلا تے دنیا وچ ستواں ایٹمی ملک بن گیا۔پاکستانی دے ایٹمی دھماکیاں دی طاقت بھارت توں کئی گناہ ودھ سی۔ عالمی طاقتاں حیران ہوگئیاں کہ پاکستان نے کدوں تے کوین ایٹمی ٹیکنالوجی حاصل کرلئی۔

پاکستان دے وزیراعظم ذولفقار علی بھٹو نے جو خاب ویکھیا اوہدی تعبیر 28 مئی 1998 نوں مکمل ہوئی۔ ایٹمی دھماکے وچ ڈاکٹر قدیر خان دی نگرانی وچ تے دوجے قومی ساینسداناں دی معیشت وچ جدوں ایٹمی دھماکے کیتے گئے تے اوس ویلے پورا ملک خشی نال جھوم اٹھیا۔ اوس ویلے امریکا دے صدر نے وزیراعظم نواز شریف نوں آکھیا کہ اوہ دھماکے نہ کرے تے اوہدے بدلے اوہناں دا سارا قرضا معاف کردتا جاوے گا تے ہور مراعاتاں وی دتیاں جان گیاں۔پر پاکستانی لوکائی دی اپیل اتے دھماکے کردتے گئے۔ خورے پاکستان جے ایٹمی طاقت نہ بندا تے اج پاکستان دا حال وی نیپال، بوٹان، مالدیپ، سری لنکا تے بنگلا دیش ورگا ہوندا تے بھارت ایس خطے اتے حاکم ہوندا تے پاکستان نوں ہضم کرچکا ہوندا۔ جدوں پوری قوم، سیاسی قوتاں تے فوج اک موقف اتے کھلو جان تے فیر دنیا بھر دی کوئی طاقت اوہنوں ہرا نہیں سکدی۔پاکستان نوں اپنے وجود نوں قایم رکھن لئی 1965تے 1971 وچ بھارت نال جنگاں لڑنیاں پئیاں۔

ہن جد کہ پاکستان ایٹمی ٹیکنالوجی تے میزایل ٹیکنالوجی نال مالا مال اے اوہدے باوجود ہندوستان اج فیر بلوچستان، کے پی کے، پنجاب تے سندھ سنے جتھے وی موقع ملیا اپنے پالتو ایجنٹاں راہیں تخریب کاری کراندا رہندا اے جہدے وچ آئے دن پاکستانی فوجی جوان شہید ہوندے رہندے نیں۔ اینیاں شہادتاں 65 تے 71 دی جنگ وچ نہیں ہوہیاں جنیاں ردلفساد دے سلسلے وچ ہوئیاں۔ سوچن دی گل اے کہ جے اسیں 28 مئی 1998 نوں دھماکے نہ کردے تے ساڈا اج کیہ حال ہوندا؟ ایس لئی ایہ دن ساڈے لئی فخر تے ازادی دا دن اے۔رب دا احسان اے کہ اوہنے قومی جذبے توں سرشار رائے عاما دے تابع اوس ویلے دی سیاسی قیادت نوں ہمت تے توفیق دتی جہناں 28 مئی دے یادگار لمحے اتے چاغی اتے ایٹمی بٹن نپ کے ملک دے ایٹمی قوت ہون دا باضابطا اعلان کیتانہیں تے ساڈی سالمیت خلاف دشمن دے جو عزایم سن اوہدی روشنی وچ اج ساڈے داستان تیکر وی نہ ہوندی۔ اج تکبیر دیہاڑ جس جذبے تحت ہر سال منان دے سرکاری فیصلا ہویا سی انتہائی دکھ تے افسوس نال آکھنا پیندااے کہ خورے اج اوہ جذبے ٹھنڈے پے چکے نیں۔پاکستان دے ایٹمی پروگرام دے خالق ڈاکٹر عبدالقدیر خان اج جس حال وچ نیں اوہ افسوس ناک ای نہیں شرمناک وی اے۔ اوہناں نوں ہیرو توں زیرو بنان والیاں دے عزایم کیہ نیں ایہ تے رب ای جاندا اے۔ پورا عالم 28 مئی دا شکرگزار اے جس نے مبارک موقع فراہم کیتا۔ ایٹمی قوت ہون پاروں اسیں ہور جنگاں توں محفوظ ہوئے پر ہن دشمن نے دوجے حربے استعمال کرنے شروع کردتے نیں۔ اسیں دنیا دے ساہمنے دہشتگرد ملک ثابت ہو رہے ہاں ساڈا ایٹمی پروگرام نہایت محفوظ ہتھاں وچ اے تے اندرونی تے بیرونی کسے پاسیوں خطرا نہیں۔ ٹیکنالوجی دے فارمولیاں مطابق ایہنوں انتہائی نگہداشت عمل توں اراستا مکمل خفیا نظام نال جوڑیا اے۔