جنگ لئی تیاری شروع کر دو! چینی صدر دا فوج نُوں حکم،فوج بدترین حالات لئی اپنیاں مشقاں مکمل کر لوے: شی جن پنگ۔۔۔٭رویل نیوز٭

بیجنگ (رویل نیوز)چینی صدر شی جن پنگ نے پیپلز لبریشن آرمی نُوں کہیا اے کہ ملک دا دفاع ہور مضبوط کیتا جاوے‘ فوج بدترین حالات لئی اپنیاں مشقاں مکمل کر لوے۔ پیپلز لبریشن آرمی دے نمایندیاں نال گلبات کردیاں ہویاں صدر شی جن پنگ نے کہیا کہ پوری طاقت دے نال قومی خُد مختاری‘ سیکیورٹی تے ترقی نال منسلک مفادات دی حفاظت کیتی جاوے گی۔ چینی صدر نے کہیا کہ سارے حالات نال فوری تے مؤثر طریقے نال نبڑن لئی فوج اپنی ٹریننگ نُوں ودھائے۔ غیر ملکی خبر رساں ادا رے دے مطابق شی جن پنگ ولوں فوج نُوں تیار رہن دے حکم نُوں بھارت نال فوجی ٹکراؤ دے ودھدے دھرُکوواں دے پیش نظر غیرمعمولی متھیا جا رہیا اے۔ چینی میڈیا دا کہنا اے کہ صدر شی جن پنگ دا ایہ بیان ایہو جہے ویلے ساہمنے آیا اے جدوں بھارت تے چین دیاں فوجاں دے وچکار کشیدگی مسلسل ودھدی جا رہی اے‘ ایس لئی ایہ غیر معمولی اے۔ اودھر یورپی یونین دے وزیر خارجا جوزف بوریل نے اپنے اِک انتہائی اہم بیان وچ کہیا اے کہ عالمی طاقت دا توازن امریکا توں ایشیا منتقل ہو رہیا اے۔ برطانوی نشریاتی ادارے بی بی سی دے مطابق یورپی وزیر خارجا جوزف بوریل نے ایہ گل پچھلے دن اِک پریس کانفرنس نال خطاب وچ کیتی۔ اوہناں نے کہیا کہ امریکا ہُن دنیا دی رہنمائی کردا ہویا نظر نہیں آ رہیا‘ تواریخ وچ کرونا وایرس نُوں فیصلا کن موڑ دے طورا ُتے ویکھیا جاو یگا۔ اوہناں نے جرمن سفارتکاراں دی کانفرنس نال خطاب کردیاں ہویاں کہیا کہ تجزیا کار عرصے توں امریکا دی اگوائی وچ چلن والے عالمی نظام دے خاتمے تے ایشیائی صدی دی آمد دیاں گلاں کر رہے سن۔ ماہرین جہڑی ایشیائی صدی دی آمد دی پیشن گوئی کر رہے سن اوہدا شاید ظہور ہو چکیا اے۔ ہُن یورپی یونین نُوں اپنے مفادات نُوں ساہمنے رکھدیاں ہویاں چین دے حوالے توں اِک ٹھوس پالیسی بنانی پوے گی۔ ساڈے اُتے کسے اِک سائیڈ دا انتخاب کرن لئی دباء ودھدا جا رہیا اے‘ چین عالمی طاقت دے طوراُتے امریکا دی تھاں لے رہیا اے تے یورپی یونین نُوں چین دے حوالے توں اِک مضبوط پالیسی طے کرنی پوے گی تے کسے دا آلا کار بنن توں بچنا پوے گا۔