حدوں ودھ مہنگائی کارن لوکائی  تنگ آ چکی اے: آصف علی زرداری۔۔۔٭رویل نیوز٭

کراچی (نمایندا رویل) پچھلے صدر آصف علی زرداری نے کہیا اے کہ شدید مہنگائی دے کارن لوکائی حکومت توں تنگ آ چکی اے‘ موجودا حکومت دا خاتما ای لوکائی لئی ریلیف ہووے گا۔ بدھ والے دن پچھلے صدر آصف علی زرداری تے پیپلز پارٹی دے آگو نیر بخاری وچکار ٹیلیفون رابطا ہویا جہدے وچ ملک دی موجودا صورتحال سنے اہم امور اُتے گلبات کیتی گئی۔ ایس موقع اُتے پچھلے صدر نے کہیا کہ ہُن پہلے توں طبیعت کافی بہتر اے‘ صحتیابی بارے پارٹی آگوواں‘ کارکناں سنے پوری قوم دا شکر گزار آں۔ اوہناں نے کہیا کہ شدید مہنگائی دے کارن لوکائی موجودا حکومت توں تنگ آ چکی اے‘ لوکائی ایس موجودا حکومت توں نجات چاہندی اے کہ کرونا وباء دے دوران وفاق دی کوئی حکمت عملی نظر نہیں آئی‘ ٹڈی دل نے فصلاں نُوں تباہ کر دِتا اے پر وفاق دی کوئی پلاننگ نظر نہیں آ رہی۔ پچھلے صدر نے کہیا کہ پہلے دن توں ٹڈی دل دی تباہی بارے دھرُکو دا اظہار کردا رہیا آں‘ ٹڈی دل نے پور ے ملک نُوں لھویٹ وچ لے کے فصلاں نُوں شدید نقصا پہنچایا اے۔ آصف زرداری نے کہیا کہ ٹڈی دل ورگے حساس مسئلے نُوں نظر انداز کرنا مذمت جوگ عمل اے۔