اَج توں لوڈشیڈنگ شروع کر دِتی جاوے گی:لیسکو۔۔۔٭رویل نیوز٭

لاہور (نمایندا رویل) بجلی دی ونڈ کار کمپنی لیسکو نے گرمی دی شدت وچ وادھے کارن شہر وچ لوڈشیڈنگ شروع کر دِتی‘ اج 28 مئی توں شروع ہون والی لوڈشیڈنگ دے حوالے توں لیسکو حکام دا کہنا اے کہ سخت گرمی کارن بجلی دی ڈیمانڈ وچ وی وادھا ہو گیا اے۔ ایس ویلے جدوں کمرشل تے صنعتی سیکٹر بند نیں بجلی دی ڈیمانڈ 3600 میگا واٹ اے‘ جدوں ایہناں سیکٹراں نُوں بجلی دی فراہمی شروع کر دِتی جاوے گی تے ڈیمانڈ 4000 میگا واٹ توں ٹپ جاوے گی‘ پر لیسکو وسیلیاں دا کہنا اے کہ بجلی دی لوڈشیڈنگ شہر دے مختلف علاقیاں وچ لاین لاسز کیٹیگری دے حساب نال کیتی جاوے گی‘ جہناں علاقیاں وچ بجلی دے لائن لاسزز 40 فیصد توں ودھ نیں اوہناں علاقیاں وچ 5 گھنٹے دی لوڈشیڈنگ کیتی جاوے گی‘ جہناں علاقیاں وچ بجلی چوری ٹیسی اُتے اے تے اوہناں علاقیاں وچ 6 گھنٹے دی لوڈشیڈنگ ہووے گی‘ 20 فیصد لاء لاسز والے علاقیاں نُوں لوڈشیڈنگ توں مستثنا متھیا گی ااے جد کہ 30 فیصد لائن لاسز والے علاقیاں وچ 3 گھنٹے دی تے 50 فیصد لائن لاسز والے علاقیاں وچ 6 گھنٹے دی لوڈشیڈنگ کیتی جاو ے گی۔ دوجے پاسے وزیراعظم دے معاون خصوصی برائے اطلاعات و نشریا ت تے چیئرمین سی پیک اتھارٹی لیفٹیننٹ جنرل عاصم سلیم باجوا نے کہیا اے کہ بجلی دی قیمت نُوں گھٹ کرنا حکومت دی پہلی ترجیح اے‘ 874 میگا واٹ سکی کناری ہائیڈرو پاور پراجیکٹ اُتے تیزی نال کم جاری اے‘ ایہ ہائیڈل پاور پراجیکٹ خیبر پختونخوا دے ضلع مانسہرا وچ اُساریا جا رہیا اے۔ ٹویٹر اُتے اپنے بیان وچ اوہناں نے کہیا کہ کووڈ 19- نال متاثرہوئے بغیر 50 فیصد کم مکمل ہو چکیا اے۔ اوہناں نے کہیا کہ ایہ پراجیکٹ دریائے کنہار وچ 1.9639 ارب ڈالر دی لاگت نال اُساریا جا رہیا اے۔ اوہناں نے کہیا کہ ایس پراجیکٹ نال 4250 لوکاں نُوں روزگار فراہم کیتا گیا اے۔ اوہناں نے کہیا کہ بجلی دی قیمت گھٹ کرنا حکومت دی پہلی ترجیح اے۔