مودی سرکار پورے خِطے واسطے خطر ناک اے،شہریت ایکٹ دے بعد بنگلا دیش تے نیپال نُوں دھمکیاں، بھارتی جاسوس کواڈ کاپٹ کاپٹر پاکستانی حداں وچ 650 میٹر اندر داخل ہویا  تاں پاک فوج نے کارروائی کیتی۔۔۔٭رویل نیوز٭

راولپنڈی /اسلام آباد (نمایندا رویل) چین دے بعد پاکستان نے وی بھارت نُوں مونہ توڑ جواب دیندیاں ہویاں لائن آف کنٹرول اُتے اوہدا جاسوس ڈرون مار سُٹیا اے۔ پاک فوج دے شعبا تعلقات عاما آئی ایس پی آر دے ڈائریکٹر جنرل بابر افتخار نے جاسوس کواڈ کاپٹر ڈیگن دی تصدیق کیتی اے۔ اوہناں دا کہنا سی کہ بھارتی جاسوس کواڈ کاپٹ کاپٹر پاکستانی حداں وچ 650 میٹر اندر داخل ہو گیا سی۔ اوہناں نے دَسیا کہ بھارتی جاسوس کواڈ کاپٹر ایل او سی دے رکھ چکری سیکٹر اُتے ڈیگیا گیا۔ اوہناں دا ہور کہنا سی کہ بھارت دہشتگردی نُوں بڑھاوا دے رہیا اے۔ وزیراعظم عمران خان نے ٹویٹر اُتے اپنے ٹویٹ وچ کہیا کہ مودی انتہا پسند حکومت خطے دے امن لئی خطرا اے‘ مقبوضا کشمیر دی ازاد حیثیت ختم کرنا چوتھے جنیوا کنونشن دے تحت جنگی جرم اے‘ مودی حکومت بھارت وچ رہن والیاں اقلیتاں لئی خطرا اے‘ بھارت وچ اقلیتاں نُوں دوجے درجے دا شہری متھیا جا رہیا اے‘ مودی انتہا پسند حکومت پورے خطے دے امن لئی خطر ااے۔ وزیراعظم نے کہیا کہ ہندو توا دی علمبرداری مودی حکومت گوانڈھی ملکاں لئی خطرا بن رہی اے‘ متنازع شہریت ایکٹ دے بعد بنگلا دیش تے نیپال نُوں دھمکیاں دِتیاں جا رہیاں نیں جد کہ مودی سرکاری پاکستان نُوں وی جھوٹھے فلیگ اپریشن دیاں دھمکیاں دے رہی اے۔ وزیر خارجا شاہ محمود قریشی نے کہیا اے کہ چینی فوج دے ہتھوں بھارتی فوج دی شرمناک رسوائی ہوئی اے‘ بھارت متنازعا علاقے وچ فضائی پٹی بنان دی کوشش کر رہیا اے‘ بھارت دے ارادے چنگے وکھائی نہیں دیندے‘ انڈیا خطے دے امن نال کھیڈ رہیا اے‘ بھارت نُوں ڈائیلاگ دا طریقا اپنا کے معاملا سلجھانا چاہیدا اے‘ بھارت مقبوضا کشمیر سنے خطے دے سارے متنازعا معاملات اُتے گلبات تے مذاکرات نُوں ترجیح دیوے۔ وزیر خارجا شاہ محمود قریشی نے کہیا کہ مشرقی لداخ وچ چینی تے بھارتی فوجاں دی جھڑپ دے بعد بھارت دے ارادے چنگے وکھائی نہیں دے رہے کیوں جے بھارت نے پہلے ای مقبوضا کشمیر وچ محاذ آرائی دی کیفیت پیدا کیتی ہوئی اے جو ظلم ہو رہیا اے اوہ سبھ نے ویکھیا تے ویکھ رہے نیں۔ اوہناں نے کہیا کہ بھارت دا نیپال نال رویا وی درست نہیں اے۔ وزیر خارجا نے کہیا کہ بھارت افغانستان دی سرزمین نُوں پاکستان دے خلاف استعمال کر رہیا اے۔ وزیر خارجا نے کہیا کہ ایہناں ساریاں حرکتاں نال خطے دا امن داء اُتے لگا ہویا اے۔ شاہ محمود قریشی نے کہیا کہ بھارت متنازعا علاقیاں وچ تعمیراتی کم‘ سڑکاں تے فوجی بنکرز بنا رہیا اے جو کہ ایہدے توسیع پسندانا عزایم نُوں ظاہر کردا اے۔ اوہناں نے کہیا کہ 1962 وچ ایسے علاقے وچ چین تے بھارت وچ جنگ وی ہو چکی اے جد کہ اج فیر بھارت نے متنازعا علاقے وچ جارحانا رویا اپنایا اے جہدے نال پورے خطے دا امن خطرے وچ اے۔ اوہناں نے کہیا کہ پاکستان دی خاہش اے کہ بھارت مقبوضا کشمیر سنے خطے دے سارے متنازعا معاملات نُوں گلبات تے مذاکرات نال سلجھان نُوں ترجیح دیوے پر ایس گل دا تعین بھارتی وزیراعظم نریندر مودی دی بھارتی فوجاں دے آگوواں نال ہون والی میٹنگ دے بعد لایا جا سکے گا کہ بھارت دے خطے دے امن نُوں تباہ کرن دے عزایم کیہ نیں۔ اوہناں نے کہیا کہ اقوام متحدا توں اپیل اے کہ اوہ بھارتی جارحانا تے امن دشمن پالیسیاں دا نوٹس لوے تاں جے خطے وچ کشیدگی نُوں ودھن توں روکیا جا سکے۔ وزیر خارجا نے کہیا کہ بھارتی لوکائی وی حکومتی پالیسیاں توں خُش نہیں‘ بھارت نُوں ڈائیلاگ دا طریقا اپنا کے معاملا سلجھانا چاہیدا اے۔