فیر کدی مِلیں گا کہ نہیں

فیر کدی مِلیں گا کہ نہیں

ارشاد سندھو

کِھڑنی اے روں وی تے

کنکاں وی پکناں

لگنے نیں مُڑ مُڑ

مکیاں دے ڈھیر وی

انبیاں دے بوٹیاں نوں

انب وی نیں لگنے

پکنے نیں ہر سال

بیریاں دے بیر وی

ٹالھی والے کُھوہ تے

کماد وی چھلیجنے

ٹٹنے نیں سرہوں دیاں

گندلاں دے ساگ وی

کِکراں تے کاواں نیں وی

پانیاں کہانیاں

پِپلاں تے چِڑیاں نیں

چھیڑنے نیں راگ وی

وڑایاں چ پکنا اے

رینڈی تے متیریاں

ہوونا اے کُجھ دِن

جمواں دا زور وی

توت دیاں ٹہنیاں تے

لالھیاں وی بولنا

پاونا مروداں اُتے

توتیاں نے شور وی

مِٹھے تے مسمّیاں دے

دِن وی نیں آونے

لگنے نیں تھاؤں تھائیں

کِنواں دے بولھ وی

آلواں تے گاجراں دے

توڑی وی بھریجنے

ہوونے نیں ہر پاسے

ہلدی دے تول وی

ہوونے بھرپیاں چ

روسے تے منیونے

آہنڈیاں گواہنڈیاں نے

ہوونا اے دور وی

وکھ ہونا کدی کدی

توَناں توں کنالیاں

تپنے نیں آپو آپ

بھٹھ تے تندور وی

آونے نیں کئی واریں

گنڈھ کِتے منگنے

سکیریاں چ جمنے نیں

کئی واریں بال وی

سال پِچھوں قبراں چ

قبراں لنبیجنا

ونڈیجنی اے گھر گھر

داہیاں وچ دال وی

لگدے نیں جِویں ہُن

میلے وی نیں لگنے

سجنے نیں کئ واری

گلیاں تے راہ وی

کئی وار ہونیاں نیں

حج دیاں دعوتاں

کئی وار آونے نیں

پِنڈ چ ویاہ وی

رُکنا نہیں دِناں نے وی

راتاں وی نہیں رُکنا

رُک رُک روکیاں وی

رُتاں نہیں کھلونیاں

مُڑ مُڑ ہر واری

آؤنی شبرات وی

عید دیا چنا کئی

عیداں وی نیں ہونیاں

کئی واری آؤندیاں نیں

غمیاں تے خُشیاں

کئی واری ہوجاندے

نفعے نُقصان وی

ہوندے رہندے کئی واری

کٹھ وی نیں سوہنیا

کئی واری آؤندے رہندے

پِنڈا چ مہمان وی

سچ سچ دس سانوں

فیر کِتے دِسیں گا کہ نہیں

سچ سچ دس سانوں

فیر کدی مِلیں گا کہ نہیں

٭٭٭٭٭