نیب دا ہر فیصلا قانون مطابق ہوئے گا،کسے دھمکی یاں پراپیگنڈے دی پرواہ نہیں: نیب دا اجلاس۔۔۔٭رویل نیوز٭

اسلام آباد (نمایندا رویل) قومی احتساب بیورو دے چیئرمین جسٹس جاوید اقبال دی صدارت ہیٹھ نیب دا اجلاس نیب ہیڈ کوارٹرز اسلام آباد وچ ہویا۔ اجلاس وچ ڈپٹی چیئرمین نیب‘پراسیکیوٹر جنرل اکاؤنٹیبلٹی‘ ڈی جی آپریشنز نیب تے نیب دے سارے ڈائریکٹر جنرلز نے ویڈیو لنک راہیں رلت کیتی۔ اجلاس وچ میگا کرپشن دے وائٹ کالر مقدمیاں وچ ہُن تک دی ٹورا کاری‘ نواز شریف‘ شہباز شریف‘ حمزہ شہباز‘ سلیمان شہباز‘ حسن نواز‘ حسین نواز‘ احد چیما‘ فواد حسن فواد‘ شاہد خاقان عباسی‘ احسن اقبال‘ مفتاح اسماعیل‘ عمران الحق شیخ تے ہوراں خلاف ہُن تک دی تحقیقات‘ جعلی بینک اکاؤنٹس مقدمات‘ آصف علی زرداری‘ عبدالغنی مجید‘ انور مجید تے ہوراں خلاف کیتی گئی تحقیقات تے ملزماں توں ہُن تک قوم دی لُٹی گئی رقم دی واپسی تے قومی خزانے وچ جمع کروان دا جایزا‘ پنجاب دیاں 56 کمپنیاں دے مقدمیاں دی تحقیقات‘ کنک تے کھنڈ سکینڈل دی تحقیقات خصوصن سندھ وچ کنک دی چوری تے خرد برد دے مقدمیاں وچ 10 ہزار ارب رُپئے دی ریکوری‘ کچھی کینال‘ گوادر ڈویلپمنٹ اتھارٹی‘ 435 آف شور کمپنیاں وچ سیف اللہ برادران‘ علیم خا تے ہوراں خلاف ہُن تک دی تحقیقات تے مختلف ملکاں وچ گھلیاں گئیاں میوچل لیگل اسسٹنٹس دیاں درخاستاں اُتے ہُن تک دی صورتحال دا جایزا‘ خیبر بینک پشاور‘ انجینئر امیر مقام‘ کیپٹن صفدر‘ سردار مہتاب عباسی‘ اکرم درانی تے ہوراں خلاف ہُن تک دی تحقیقات دا جایزا‘ جعلی ہاؤسنگ کوآپریٹو ہاؤسنگ سوسائٹیاں‘ مضاربا/ مشارکا سکینڈلز دا جایزا لیا گیا تے متاثرین نُوں رقماں دی چھیتی توں چھیتی واپسی لئی سارے ممکن وسایل استعمال وچ لیان دا فیصلا کیتا گیا۔ اشتہاری تے مفرور ملزماں دی گرفتاری لئی ہُن تک کیتے گئے اقدامات دا وی جایزا لیا گیا تے ایس گل دا فیصلا کیتا گیا کہ مفرور تے اشتہاری ملزماں دی قانون مطابق گرفتاری لئی سارے ممکن وسایل استعمال کیتے جان گے۔ اجلاس وچ فیصلا کیتا گیا کہ نیب وچ جاری شکایت دی پُن چھان‘ انکوایریاں تے انوسٹی گیشنز نُوں قانون دے مطابق مکمل کیتا جاوے گا تے مختلف احتساب عدالتاں وچ سنوائی ہیٹھ مقدمیاں دی چھیتی سنوائی لئی درخاستاں دایر کیتیاں جان گیاں۔ چیئرمین نیب نے کہیا کہ نیب نے قانون دے مطابق اِک منزل دا تعین کیتا اے جہدا مقصد ملک نُوں کرپشن فری بنانا اے‘ نیب دا تعلق کسے سیاسی جماعت نال نہیں‘ نیب اِک قومی ادارا اے جہدے افسراں دی وابستگی صرف ریاست پاکستان نال اے جو قانون دے مطابق اپنے فرائض سر انجام دین اُتے سختی نال یقین رکھدے نیں‘ نیب ہر قسم دے دباء‘ دھمکی تے پرپیگنڈے دی پرواہ کیتے بغیر قانون دے مطابق اپنے فرایض سر انجام دے رہیا اے تے دیندا رہوے گا۔