kraamaat@gmail.com
+ +92 333-430-6384


اِستنبول توں تل ابیب


الیاس عباسی May 30, 2020


اِستنبول توں تل ابیب

الیاس عباسی

انسان تے جدوں وی دُکھ تکلیف آئی اے اوہناں اپنابھرواں دفاع کیتا اے تے اپنی ہوند نوں قائم رکھیاہویااے شاید اسے لئی ایہ اشرف المخلوقات دے درجے اُتے فائز اے ایس کائنات تے لکھاں مخلوق نیں پر انسان اپنی عقل تے سوچ پاروں سبھ توں وکھ اے جنگاں داویلاہووے یاں کسے بیماریپاروں وباپھیل جائے انسان اِک مُٹھ ہوکے اپنے بچاء لئی جُت جاندااے سوورھے پہلاں دا سپینش فلو ہووے یاں اج دی کروناوبا، حضرت انسان اپنی جدوجہد توں نہیں ہار من رہیا تے ایس بیماری تے قابو پاون لئی جتن کیتے جارہے نیں امریکا توں چین، وینزویلا توں ہندوستان تے ترکی توں اسرائیل ہر پاسے انسانیت نوں بچاون دی دوڑ لگی ہوئی اے ایس بیماری نے جتھے نفرت پھیلائی اوتھے ہی سانجھے داری تے امن ، پیار دا سبق وی دتا اے کسے وی سیاسی یاں مذہبی ونڈ توں بغیر انساناں نوں بچاون لئی کوششاں ہورہیاں نیں تے ایسے کھیتر وچ پِچھلے دناں ترکی دے شہر استنبول وچ اسرائیلی طیارے نوں امدادی سامان لئی اُترنا پیا ترک اپنی انسان دوستی پاروں مشہورنیں اوہناں کُھلے دل نال اسرائیلی جہاز نوں جی آیاں نوں آکھیا ایہ وکھالا کُجھ ورھیاں بعدوں سلاہن جوگ اے کیوں جے اسرائیل ولوں تل ابییب توں یروشلم نوں دارالحکومت منن پِچھوں ، ترک ناراض سن۔

ایس وبا کارن دس سال بعد ترک ۔ اسرائیل تعلقات نوں قومانتری میڈیا تے لوکاں نے بہت سلاہیا اسرائیل اپنی معاشی تے فوجی طاقت پاروں مڈل ایسٹ وچ اک وڈی تے حقیقی طاقت بن چکیا اے ایتھوں دی قومی آمدن تے گروتھ ریٹ پوری دنیا وچ اپنی مثال آپ اے اسرائیل اپنے گوا وچ ماضی نوں لبھن تے اوہنوں بحال کرن وچ کامیابی نال رُجھیا ہویا سی کہ ایس بیماری نے اسرائیلی معیشت نوں وی چنگا نقصان اپڑایا، بلومبرگ دے اِوان لیونگسٹن مطابق سال دا ایہ کوارٹر پِچھلے 20 ورھیاں وچوں بھیڑا ترین اے تے کُجھ ورھے پہلاں تک ایہ علاقا امن تے کامیابی دابُوہا کھولے ہراسرائیلی نوں نعمتاں دے رہیاسی تے اپریل تیکر ایتھوں بے روزگاری دی شرح %30 ہوچکی اے تے دوجے ملکاں نوں برآمدات وی گھٹ چکیاں نیں جہنے رہندی کھوہندی کسر وی کڈھ دتی حکومتاں وی انساناں تے سرمایاکاری کرن تے مجبور ہوگئیاں نیں دفاعی بجٹ گھٹ کیتے جارہے نیں تے اسحلے خریدن والے ہُن اپنی لوکائی نوں بچاون لئی صحت تے خرچ زیاداکرن تے مجبور نیں ایسے لئی ایس بیماری دی دوا لئی اک دوڑ لگی ہوئی اے تے اسرائیلی وزیر وی اعلان کرچکے نیں کہ اسرائیلی دوا چھیتی ای مارکیٹ وچ ہووے گی۔

اج دنیا سُنگڑ کے اک پنڈ بن چکی اے ہن اک دوجے توں وکھ نہیں رہیا جاسکدا ایسے لئی کارپوریٹ دنیا آون والے کل لئی سوچ رہی اے جتھے سارے رل مل کے اپنے اپنے مُفاد لئی جتن کررہے نیں انٹرنیشنل پالیٹیکس نوں جانن والے کہندے نیں کہ قومانتری سطح تے کوئی دوست ، دشمن پرماننٹ نہیں ہوندی سوائے تُہاڈے قومی مفادات دے

ایسے اُصول نوں ساہمنے رکھ کہ ترک اسرائیل دوستی نوں ویکھن دی لوڑ اے کیوں جے ترک اپنی زہانت تے دلیری پاروں اسلامی دنیا وچ اپنی حیثیت منواچکے نیں ترک اردووان اپنی ڈِگدی معیشت توں پریشان اے ایہنوں سنبھالادین لئی کئی اسلامی ملکاں نال تجارتی معاہدے وی ہووے جہدے وچ پچھلی نوازسرکار دی پنجاب حکومت نے تے کئی معاہدے وی کیتے جہداسبھ توں وڈافائیدا ترکی نوں ہویا اوتھوں دی صنعت دا پہیا چلن لگ پیا۔

اسرائیلی جہاز راہیں امریکا لئی امداد ترکی ولوں تعلقات نوں جوڑن دااک اشاراسی ایسے لئے اسرائیلی کمپنی نے ترک سرکارنوں درخواست کرچھڈی کے ایہدیاں فلائیٹس بحال کیتاجاون تاں اج دی فری مارکیٹ توں سبھ فائداچُکن ایسے لئی قومی جذبیاں نوں اُتانہہ چکن لئی ترکی اسرائیل دے جھنڈیاں نال امدادی سامان نوں سجایاگیا تے ترک ، اسرائیل ولوں امریکہ نال مشکل دی ایس گھڑی کھلوہن داجتن کیتاگیا تے ایہ جہاذ انقرہ توں اُڈ کے اپنے گھر تل ابیب لئی ٹریا جہدی اگلی منزل امریکا سی۔ عرب نیوز مطابق اسرائیلی ڈاکٹرنمرود گورین ہوراں داخیال اے کہ اجہیاں کارگوفلائیٹ راہیں دوناں ملکاں وچکارتعلقات بہتر کیتے جاسکدے نیں اجہے عمل چنگے مقصد لئی بہت ضروری ہوندے نیں اوہناں دی اسرائیل نال سانجھ کوئی نویں گل نہیں ایہناں دوناں ملکاں نوں شام وچ ہوون والی لڑائی نے وی اک دوجے دا نال سنگت تے مجبور کردتا اے کیوں جے بشارالاسد داساتھ دین والے ترکی تے اسرائیل دوناں لئی دشمن نیں تے ایہ گل کِنی کُو سچی ہوجاندی اے کہ دشمن دادشمن ، دوست ہوندااے ، کجھ ہی چِر پہلاں ترکی صدر ہوری تے ساڈے وی وزیراعظم نال گِلا کرچکے نیں کہ تہاڈے بندے ایران راہیں ترک فوج دے خلاف شام وچ لڑرہے نیں جہنوں ساڈے وزیراعظم ہوراں دسیا کہ پاکستان دی ریاست کدی وی اجہے عمل نوں سپورٹ نہیں کردی ایہ ریاست اپنے ترک بھراواں نال اے۔

ترکی پہلا اسلامی ملک سی جہنے 1949 وچ اسرائیل نوں من کے ایہدے نال سفارتی رشتے داری دی نینہ رکھی اج دی دنیا وچ ترکی واحد ملک اے جہڑا اسرائیل راہیں فلسطین دی مدد کررہیا اے کیوں جے اج سبھ توں زیاداماڑی حالت فلسطین دی اے تے ایہ ترکی ہی اے جہڑا اپنے سفارتی تعلقات پاروں فلسطینیاں دی مدد کرن جوگ اے ترکی دا اسلامی دنیا تے اسرائیل وچکار کردار پُل وانگوں اے جہدا سبھ توں زیادافائدا فلسطین تے اسلامی ملکاں نوں ہوندااے عرب تے اسرائیلی سیاست نوں سمجھن والے پاکستانی صحافی احمد قریشی ہوراں تے پاکستان اسرائیل دی بیک ڈور ڈپلومیسی تے وی لکھ دے نیں تے اوہناں ورگے کئی پاکستانی سمجھدے نیں کہ ہن ویلا اے ترکی وانگوں اسرائیل نال سفارتی تعلقات بنا کے اپنے اسلامی بلاک دی سیوا کیتی جاوے سگوں ایسراں فلسطین دی حقیقی معنیاں وچ مدد کیتی جاسکدی اے پھوکھے نعرے لاون دا ویلا لنگھ گیا اے اج دے دور وچ اپنی معیشت نوں تگڑا کرنا پینا اے تےفیر کوئی تہاڈی گل تے گوہ کرے گا۔

٭٭٭٭٭